Loꞌꞌo Haymaanootee Xoossaa Qaalaa Bonchanaadan Minttettees
YESUUSI Xoossaa Qaalaa, Geeshsha Maxaafaa bonchanaadan minttettiis. Dabloosi Yesuusa paaccido wode i zaaridoban hegee qoncciis. (Maatiyoosa 4:4-11) Leemisuwau, shuchaa oyttau laammanaadan Seexaanay paaccido wode, Yesuusi woygidi zaaridee? Neeni Zaarettido Wogaa 8:3n nabbabana danddayiyo, ayyaanay denttettin Muusee xaafido qaalaa yootiyoogan Yesuusi he paaciyaa eqettiis. Qassi Yesuusi issitoo assi goynnikko, alamiyaa kawotettaa ubbaa haaranaadan ayyo immanaagaa Seexaanay yootido wode, Yesuusi woygi zaaridee? Zaarettido Wogaa 6:13n neeni beꞌana danddayiyo, Geeshsha Maxaafaa baaso siraataa yootiyoogan Yesuusi he shoobiyaa ixxis giis.
Ane issi kutti qoppa! Yesuusi Xoossaa Naꞌaa gidikkokka, tamaarissiyo wode Geeshsha Maxaafaa naqaasha oottidi goꞌettiis. Qassi i asa wogaa xoqqu oottidi, Xoossaa Qaalaa mule xaasayibeenna. (Yohaannisa 7:16-18) Gidoppe attin, Yesuusa wode deꞌida haymaanootiyaa kaalettiya daroti i bonchidoogaadan Xoossaa Qaalaa bonchibookkona. Aybissi? Eti asa wogaa Geeshsha Xuufetuppe aattidi xeelliyoogaa doommidosona. Yesuusi haymaanootiyaa kaalettiya he asatuyyo: “Intte intte wogaa polanau Xoossaa qaalaa xaissideta. Ha lo77o milatiya iita asatoo, Isiyaasi balennan inttebau hananabaa yootiiddi, ‘Xoossai hagaadan yaagiis; “Hagee asai tana ba bolla doonan bonchchees; shin eta wozanai taappe haahuwan de7ees. Asai tau mela goinnees; aissi giikko, asi oottido azazuwaa Xoossaa higgiyaa milatissidi tamaarissees” giis’ yaagiis” yaagidi mammottennan yootiis.—Maatiyoosa 15:6-9.
Alamiyan deꞌiya, Kiristtaane giyonne Kiristtaane gidenna daro haymaanooteti Geeshsha Maxaafaa bonchiyaabadan yootoosona. Gidoppe attin, Xoossaa Qaalan deꞌiya qoncce timirttiyaara moggenna wode asa wogaa aggi bayiya aappun haymaanooteta eray? Naaꞌꞌu leemisota beꞌa.
HUUPHE YOHUWAA: Haymaanootiyaa kaalettiyaageeti xeegettiyo boncho sunttaa.
GEESHSHA MAXAAFAY TAMAARISSIYOOBAA: Bonchettanau koyiyaanne boncho sunttan xeesettanau dosiya, ba wode deꞌida haymaanootiyaa kaalettiyaageeta Yesuusi pirddiis. Yesuusi he asati: “Asi banttana imattiyoosan bonchcho sohuwaa dosoosona; qassi Aihuda woosa keettatunkka daro lo77iya oidiyaa dosoosona. Asi giyan banttana bonchchidi sarotanaagaanne ‘Tamaarissiyaagoo’ giidi banttana xeesanaagaa koyoosona” yaagidi yootiis. Yesuusi kaallidi ba erissiyo ashkkaratussi: “Ha sa7an oonanne ‘Aawa’ giidi xeesoppite; aissi giikko, intteyyo saluwan de7iya issi Aawai de7ees. Issoi issuwaa, ‘Godau’ giidikka xeesoppite; aissi giikko, intteyyo issi Godai, Kiristtoosa xalaalai de7ees” yaagidi yootiis.—Maatiyoosa 23:1-10
OYSHAA: Ha haymaanootiyaa kaalettiyaageeti boncho sunttan xeesettanaunne deretettan bonchettanau koyiyoonaayye, hegaadan oottennaadan Yesuusi azazidoogaa naagiyoonaa?
HUUPHE YOHUWAA: Goynuwan misiliyaa goꞌettiyoogaa.
GEESHSHA MAXAAFAY TAMAARISSIYOOBAA: “Bolla saluwan de7iyaabaa, woikko garssa sa7an de7iyaabaa, woikko sa7aappe garssan haatta giddon de7iyaabaa aibanne malatissada neeyyo goinniyo misileta kessoppa. Etayyo hokkoppa woikko etayyo goinnoppa.”—Kessaabaa 20:4, 5.
Kiitettida Yohaannisi Kiristtaanetussi: “Eeqatuppe intte huuphiyaa naagite” yaagidi xaafiis.—1 Yohaannisa 5:21.
OYSHAA: Xoossaayyo goynniyo wode misiliyaanne eeqaa goꞌettiyoogaa diggiya Geeshsha Maxaafaa qoncce azazuwaa ha haymaanootee naagii?
Suure Ogiyaa Demmana Danddayaasa
Ha wodiyan, dooranau metiya keehi daro haymaanootee deꞌishinkka, deꞌuwau efiya haymaanootiyaa demmana danddayaasa. ‘Xoossaa sinttan pokkoy baynna geeshsha ammanuwaa’ shaakki eranau maaddiya darobay deꞌees. (Yaaqooba 1:27) Ogiyaa bessiya malaataadan, ha huuphe yohotun qonccida xiqiseti neeni he haymaanootiyaa demmanaadan maaddana danddayoosona.
Ha huuphe yohotun denddida oyshatu zaaruwaa qonccissanaadan aybissi Yihoowa Markkata oychikkii? Eti yootiyoobaa qoppaydda, koyro xeetu layttan Beeriyaa kataman deꞌida asatu loꞌꞌo leemisuwaa kaalla. Eti kiitettida PHauloosa sibikatiyaa siyi simmidi,“‘PHauloosi giidoogee tumakkonne’ yaagidi, ubba gallassi Xoossaa maxaafata” xannaꞌidosona. (Oosuwaa 17:11) Neeni Beeriyaa asatuugaadan Xoossaa Qaalaa bonchiyaabanne minnada xannaꞌiyaaba gidikko, deꞌuwau efiya ogiyaa demmana. Hegaappe simmada he haymaanootiyaa dooriyoogee woy aggiyoogee neeni kuuyiyooba.
[Sinttaa 9n deꞌiya misiliyaa qonccissuwaa]
Asay tamaariyoobay tumakkonne eranau Geeshsha Maxaafaa xannaꞌanaadan minttettiya haymaanootee awugee?