Nabbabiyaageeti Oychiyo Oyshaa

Taani Ay Keena Miishshaa Immana Koshshii?

‘Xoossay ufayssan immiya uraa siiqees.’ (2 Qoronttoosa 9:7) Ha qaalata alame yuushuwan deꞌiya miilooniyan qoodettiya asay erees. Gidoppe attin, haymaanootiyaa kaalliya issi issi asaayyo ba abbiyaappe aadhiyaagaa immana koshshiyaabadan siyettana danddayees. Issi issi haymaanooteti asay immana koshshiyoy ay keenakko yootoosona. Hegee asirataa kessiyoogaa geetettees; hegee issi uri demmiyoogaappe 10ppe issi kushiyaa woosa keettau immiyoogaa.

Geeshsha Maxaafay nuuni immana koshshiyay ay keenakko tumuppe yootii? Taani ay keena immana koshshii? giidi issi uri oychana danddayees.

Beni Wode Immanau Koyettiyaabatanne Dosan Immiyoobata

Israaꞌeela asay ay keenaa immanaadan Xoossay koyiyaakko Geeshsha Maxaafay qoncce azazuwaa oyqqiis. (Wogaabaa 27:30-32; Qoodaabaa 18:21, 24; Zaarettido Wogaa 12:4-7, 11, 17, 18; 14:22-27) He koyettiyaabay eti immanau danddayennaba gidenna. Ba higgiyaa azazettikko, Yihooway eta ‘darissidi anjjanaagaa’ qaalaa geliis.—Zaarettido Wogaa 28:1, 2, 11, 12.

Hara hanotatun, Israaꞌeeleti daro gidin guutta gidin, koyidoogaa keenaa bantta dosan immana danddayoosona. Leemisuwau, Kawuwaa Daawiti Yihoowa beeta maqidasiyaa keexxanau halchido wode, asay “issi xeetanne laappun tammu sha7u kilo giraame deexxiya worqqaa” immiis.a (1 Hanidabaa Odiya 29:7) Hegaa Yesuusi saꞌan deꞌido wode beꞌidobaara geeddarssa. Beeta maqidasiyan muxuwaataa yeggiyo saaxiniyan, “issi daro hiyyeesa am77iyaa naa77u bakkannaa hegan yeggiyoogaa” beꞌiis. A yeggido miishshay ay keenee? A immido miishshay, keraa oosanchay issi gallassi demmiyo miishshau xeetu kushiyaappe issuwaanne bagga. Gidikkokka, he guutta imotan Yesuusi ufayttidoogaa yootiis.—Luqaasa 21:1-4.

Kiristtaaneti Immana Koshshiyoy Ay Keenakko Odettidee?

Kiristtaaneti Israaꞌeelatuyyo imettida Higgiyaa garssan deꞌokkona. Yaatiyo gishshau, Xoossaayyo hanni keena immana koshshees geetettidi etassi odettibeenna. Gidikkokka, tumu Kiristtaane gubaaꞌiyan, immiyoogee keehippe ufayttanaadan oottiyaaba. Yesuus Kiristtoosi ba huuphe: “Ekkiyaagaappe immiyaagee anjjettidaagaa” yaagiis.—Oosuwaa 20:35.

Yihoowa Markkati bantta dosan immiyoogan saꞌa yuushuwan oottiyo sabbakiyo oosuwaa kaafoosona. Neeni nabbabaydda deꞌiyoogaa mala xuufeta attamanau, qassi Kawotettaa Addaraashaa geetettiya bantta goynuwaa sohuwaa keexxanaunne loytti oyqqanau ha imotaa goꞌettoosona. SHiiqiya miishshaappe oossinne damoozi qanxxettenna. Erissiyo ashkkara oottiyo oosuwaa bantta dosan kumetta wodiyaa oottiya issoti issoti transporttiyaunne banttassi koshshiyaabau kessido wociyau miishshay imettees. SHin ooninne hegaa mala miishshay tau imettana bessees giidi oychenna. Yihoowa Markkatuppe daroti bantta sabbakiyo oosuwau miishsha maado aybanne demmokkona. Hegaappe dumma ogiyan, etappe daroti PHauloosi bana danddayidi deꞌanau dunkkaaniyaa sikkidoogaadan, miishsha demmanau oottoosona.—2 Qoronttoosa 11:9; 1 Tasalonqqe 2:9.

Issi uri Yihoowa Markkati oottiyo oosuwaa kaafanau miishsha immanau koyikko, ay keenaa immana koshshii? Kiitettida PHauloosi: “Xoossai ufaissan immiya uraa siiqiyo gishshau, qarettiiddi woi dosennan immiyoogaa gidennan, immiya urai huuphen huuphen ba wozanan qoppidobaa immo” yaagidi xaafiis.—2 Qoronttoosa 8:12; 9:7.

[Tohossa qofata]