Xoossaa Oosoy Daridoogaanne An Ufayttiyaagaa Gida
NEENI ufayttiyaagaa gidanaadan Yihooway koyees. (Mazamure 100:2) A oosanchatuppe issuwaa gidiyoogaadan, neenikka oosoy daridoogaa gidennan aggakka. Neeni ne huuphiyaa Xoossaayyo geppido wode, haꞌꞌiigaadan oosoy daridoogaa gidennan aggana danddayaasa; shin oosuwaanne ayyaanaabaa aawatettaappe denddidaagan haꞌꞌi neeyyo toohoy deexxiyaabadan siyettana danddayees. Neeni oottanau koyiyoobaa ubbaa polana danddayenna wode, neeyyo mooranchadan siyettana danddayees. Bessiya xeelaa oyqqada Yihoowa ‘ufayssaa’ demmada deꞌanau ay oottana danddayay?—Nahimiyaa 8:10.
Daro unꞌꞌissiyaabay gakkiyo metiya wodiyan neeni deꞌiyo gishshau, giigettada deꞌana koshshees. Hegaara gayttidaagan, kiitettida PHauloosi ayyaanaa kaaletuwan: “Intte waani de7iyaakko akeekite; aadhdhida eratettaara de7iya asadan de7iteppe attin, aadhdhida eratetti bainna asadan de7oppite. Wodee iita gidiyo gishshau, intte lo77o wodiyaa coo xaissoppite” yaagido zoree goꞌꞌiyaaba.—Efisoona 5:15, 16.
He aadhida eratetta zoriyaara gayttidaagan, buzo xinaatiyaa, so asau koshshiyaabaa oottiyoogaa, haggaazuwaa, oosuwaanne hara koshshiya oosuwaa bessiyaagaadan polanau gakkana danddayiyo hoolliyaa waatada kessana danddayay?
Neeni ne huuphiyaa geppiyo wodenne xammaqettido wode ay keena ufayttidaakko hassayay? Yihoowabaanne a halchuwaabaa eridoogan ufayttadasa. He eraanne ufayssaa demmanau daro aginaa minnada xannaꞌiyoogaa koshshennan aggibeenna. SHin neeni hegaadan baaxetidoogee bessiyaaba. Hegaadan xannaꞌidoogee ne deꞌoy giiganaadan oottiis.
Neeni ubbatoo ufayttanau ayyaanaabaa qumaa aggennan maana koshshees. Geeshsha Maxaafaa nabbabanaunne xannaꞌanau wodiyaa demmanau metootikko, neeni galla galla oottiyoobata zaarettada akeeka. Galla galla amarida daqiiqaukka gidin, xannaꞌiyoogeenne wotta denttada qoppiyoogee neeni Yihoowakko shiiqanaadan oottees; hegee neeni ufayttanaadan oottanaagee qoncce.
Xoossaa ashkkaratuppe daroti keehippe koshshennaban wuriya wodiyaappe amaridaagaa keehippe koshshiya oosuwau peeshshana danddayoosona. ‘Taani maxeeteta woykko gaazeexaa nabbabiyoogan, televizhiiniyaa beꞌiyoogan, muuziqaa ezggiyoogan, woykko wodiyaa aattiyo haraban ay keena wodiyaa wurssiyaanaa?’ yaagada nena oycha. Hegaa malabati bessiyaagaadan goꞌettiyo wode ufayssiyaaba gidana danddayoosona. (1 Ximootiyoosa 4:8) Neeni ne wodiyaa bessiyaagaadan goꞌettennaagaa akeekiyaaba gidikko, ne prograamiyaa giigissa.
Machiyaanne heezzu naati deꞌiyo, qassi gubaaꞌe cima gidida Addaamee: “Taani sima deꞌo deꞌanau baaxetays. Wodiyaa coo xayssiya, wodiyaa aattiyoobatuppenne qofaa etan wottanaadan oottiya miishshatuppe naagettays. Hegee ta huuphiyaa keehippe qohays giyoogaa gidennan, wodiyaa wurssennaban ta wodiyaa aattays” yaagidi, bana maaddidabaa qonccissiis.
Neeni kuuyidobay demissido loꞌꞌobaa wotta dentta qoppiyoogee, neeni keehippe ufayttanaadan oottanaunne loꞌꞌo xeelaa oyqqada deꞌanaadan maaddanau danddayees. Leemisuwau, heezzu naati deꞌiyo, gubaaꞌe cimaa Maryushi: “Taani Geeshsha Maxaafaa xannaꞌiyoogaa doommiyo wode, sinttanaabau loꞌꞌo xeelay deꞌiyoogaa gidaas. Hanno gakkanaashin, wodiyaappe wodiyan tana metoy gakkees; hegeetuppe daroti Yihoowa xallay eriyoobata. SHin taani sinttanaabaa ufayssan naaganaadan maaddido gishshau, Yihoowa galatays” yaagiis.
Maryusha hanotaappe beꞌiyoogaadan, issi urau siyettiya unꞌꞌo ubbaa loꞌꞌo xeelay xayssana danddayenna. SHin loꞌꞌo xeelay neeyyo loꞌꞌobi siyettanaadaaninne deꞌuwan nena gakkiya metuwaa loꞌꞌo ogiyan xoonanau maaddana danddayees. Geeshsha Maxaafay: “Hiyyeesatu woykko metootanchatu de7oi ubba gallassikka baaxe. SHin ufaittiya asati ubbatonkka bantta de7uwaa aloosona” yaagees. (Leemiso 15:15) Hanno gakkanaashin Xoossay neeyyo bessido siiquwankka wotta dentta qoppa. Hegaadan oottiyoogee neeni Xoossaa kaseegaappe aaruwan siiqanaadaaninne i immiyo ufayssay neeyyo daranaadan oottana danddayees.—Maatiyoosa 22:37.
Deꞌuwan Yihoowanne i koyiyoobaa kaseyiyoogee so asaa ufayssaa gujjees. Kiristtaane eeshshata qonccissiyoogee so asaa giddon ooshshay deꞌennaadan, qassi eti ufayttanaadaaninne issoy issuwaara matattanaadan oottees. Yaatiyo gishshau, ne soo asay ubbay ufayttiyaagaanne issippetettan deꞌiyaagaa gidana.—Mazamure 133:1.
So asay ayyaanaabaa issippe oottiyoogee tumu ufayssaa gujjees. Maryushi: “Taani so asaara issippe aattiyo wodiyaa xoqqu oottada xeellays. Ta keettayiyaa tana keehippe maaddausu. Taani haggaaziyo wode gidin woykko Awuraajjaa shiiquwaa sohuwaa pittiyo wode gidin, qassi hara gubaaꞌetun dere haasayaa shiishshanau biyo wode, danddayettiyo wode ubban taappe shaahettuku. Hegee tana minttettees” yaagiis.
Kiristtaaneti bantta soo asau koshshiyaabaa kunttanaadan Geeshsha Maxaafay azazees. (1 Ximootiyoosa 5:8) SHin ne oosoy daro wodiyaanne wolqqaa wurssiyaaba gidikko, Xoossaa oosuwan neeni ufayttennaadan oottana danddayees. He allaalliyaa xeelliyaagan Yihoowakko woossa. (Mazamure 55:22) Issoti issoti Xoossaa Kawotettaa kaseyanau hara oosuwaa oyqqana koshshiyoogaa akeekidosona. Daro wodiyaanne wolqqaa wurssiya oosuwan demmiyo miishshay, keehippe koshshiya ayyaanaabaa oosuwaa digganaadan, Kiristtaane gidida ooninne paqqadana koshshenna.—Leemiso 22:3.
Neeni haꞌꞌi oottiyo woykko sinttappe demmana oosoy goꞌꞌiyoonne qohiyo ginata xaafiyoogee maaddana danddayees. Daro damoozaa demissiyaanne ufayssiya ooso demmiyoogee goꞌꞌiyaaba gidiyoogee qoncce. Gidoppe attin, neeni oottaydda deꞌiyo oosoy ne soo asay ayyaanaaban minnanaadan maaddanau nena danddayissii? Hanotata bessiyaagaadan qoppada, neeyyo Yihoowaara deꞌiya dabbotaa kaseyanau maaddiya kuushshaa kuuya.
Haꞌꞌi oottaydda deꞌiyo oosoy neeni ayyaanaaban dicciyoogaa diggiyaaba gidikko, ne hanotaa giigissana koshshees. Daro Kiristtaaneti ayyaanaabau wodiyaa demmanau gita laamiyaa oottidosona. Poolandde biittan deꞌiya issi ishay: “Darotoo oosuwaara gayttidabau manddarada biyo gishshau, he oosuwaa yeddiyoogaappe attin haraba aynne oottana danddayabeykke. Ayyaanaaban woykko ta soo asau bessiyaagaadan koshshiyaabaa oottanau gidiya wodiyaa demmabeykke” yaagiis. I haꞌꞌi kaseegaadan daro wodiyaanne wolqqaa wurssenna oosuwaa oottees.
Harata Maaddiyoogan Ufaytta
Yesuusi: “Ekkiyaagaappe immiyaagee anjjettidaagaa [“ufayttiyaagaa,” NW]” yaagiis. (Oosuwaa 20:35) Kiristtaaneti hegaadan immiyo daro injjee deꞌees. Issi urau pashkki giyoogee woykko a sarotiyoogee woykko issi uri ayyaanaaban minnidi oottidobau wozanappe galatiyoogee issi issitoo intte naaꞌꞌaykka ufayttanaadan oottiyaaba gidana danddayees.
Kiitettida PHauloosi ba mala Kiristtaaneta: “Yayyiyaageeta [“unꞌꞌettidaageeta,” NW] minttettite. Wolqqi bainnaageeta maaddite” yaagidi minttettiis. (1 Tasalonqqe 5:14) Unꞌꞌettidaageeti banttana gakkiya metuwaa xooni kiyanau abbee baynnabadan qoppana danddayoosona. Hegaa mala asata maaddanau danddayay? Ne ishanttuppe issoy Yihoowa oosuwan ufayttennaagaa neeni akeekiyaaba gidikko, a minttettanau baaxeta. Hegaadan oottiyoogee nenakka minttettees. Issi issi metuwaa asaa naati giigissana danddayokkona. Gidoppe attin, neeni wozanappe qarettiyoogaa bessanaunne ubbatoo maaddiya Yihoowan ne ishay ammanettanaadan minttettanau danddayaasa. Hegaadan ammanettiyaageeti mulekka azzanokkona.—Mazamure 27:10; Isiyaasa 59:1.
Haggaazuwaa kiyanau ufayttennaba milatiya uray nenaara issippe haggaazanaadan shoobbiyoogee maaddiya hara oge. Yesuusi 70u erissiyo ashkkarata kiittido wode, “naa77aa naa77aa” issippe kiittiis. I hegaadan oottidoogee issoy issuwaa minttettanaadan maaddidoogaa maayikkii? Ha wodiyan issi uri zaarettidi ufayttanaadan maaddanau he leemisuwaa kaallana danddayay?
Ha wodiyan unꞌꞌettanaadan oottiya darobay deꞌees. Gidikkonne, PHauloosi: “Godaara intte de7iyo de7uwan ubba wode ufaittite; taani hagaa gujjadakka gais; ufaittite” yaagidi minttettiis. (Piliphphisiyuusa 4:4) Neeni Xoossaa siiqiyo, au azazettiyoonne i immido oosuwaa minnada oottiyo gishshau, ne deꞌuwau halchoy deꞌees. Hegee neeni ufayttanaadan oottees. Hegaa bollankka, ne bolli gakkiya unꞌꞌuwaanne metuwaa neeni xoona kiyanaadan Yihooway maaddees.—Roome 2:6, 7.
Yihooway qaalaa gelido ooratta alamee keehippe matattidoogaa minttidi ammanoos. He wode keehi daro anjjuwaanne ufayttanaadan oottiyaabaa demmana! (Mazamure 37:34) Hegaa gishshau, Yihooway nuna ha wodiyankka ay keena anjjidaakko akeekidi, ufayttiyaageeta gidana danddayoos. Yaatiyo gishshau, ‘Yihoowayyo ufayssan goynnana’ danddayoos.—Mazamure 100:2.
[Sinttaa 30n deꞌiya misiliyaa]
WODIYAA AATTIYOOBAA
SO ASAU KOSHSHIYAABAA KUNTTIYOOGAA
OOSUWAA
KIRISTTAANE SHIIQOTA
BUZO XINAATIYAA
HAGGAAZUWAA
[Sinttaa 30n deꞌiya misiliyaa]
Ufayttiyaagaa gidada deꞌanau ne wodiyaa goꞌettiyo ogiyaa giigissiyoogaa koshshana danddayees
[Sinttaa 32n deꞌiya misiliyaa]
Harati zaarettidi ufayttanaadan maaddana danddayay?