Wozanappe Ufayssan Immiyoogaa
IMMIYOOGAA xeelliyaagan kiitettida PHauloosi: “Xoossai ufaissan immiya uraa siiqiyo gishshau, qarettiiddi woi dosennan immiyoogaa gidennan, immiya urai huuphen huuphen ba wozanan qoppidobaa immo” yaagidi xaafiis. (2 Qoronttoosa 9:7) Tumu goynuwaa kaafanaadan Yihooway oonanne wolqqanttenna. I ba ashkkarati bantta dosan ufayttiiddi immiyoogan, baassi aqidoogaa bessanaadan koyees. Taarike wode ubban, a asay wozanappe hegaadan oottiis. Heezzu leemisota beꞌa.
Yihooway Israaꞌeeleta Gibxxeppe kessi simmidi, gayttiyo dunkkaaniyaa eti giigissanaadan azaziis. Hegau goꞌettiyo miishshay koshshiyo gishshau, Israaꞌeele asay hegaa immanaadan oyshettiis. Oychin, “eta wozanai eta imma imma giidoogeeti ubbai” worqqaa, biraa, alleequwaanne harabaa immidosona. Asay kehatettan darobaa immido gishshau, haraa gujjidi eheennaadan yootana koshshiis.—Kessaabaa 35:5, 21; 36:6, 7.
Daro xeetu layttappe guyyiyan beeta maqidasiyaa keexxana koshshido wodekka, Xoossaa asay tumu goynuwaa kaafiyo injjiyaa demmiis. Kawuwaa Daawiti ba huuphe he oosuwau darobaa immiis; qassi haratikka immanaadan minttettiis. Etikka wozanappe immidosona. Worqqaanne biraa imota xallay ha wodiyaa waagan 100 biiloone doolaariyaappe dariyaagaa gidiyoogee hegaa bessees! Asay ba dosan Yihoowayyo immido gishshau ufayttiis.—1 Odiya 29:3-9; 2 Odiya 5:1.
Beni wode Yesuus Kiristtoosa kaalliyaageetikka hegaadan ufayssan immidosona. PHenxxaqosxxe gallassi 33 M.Ln, 3,000 gidiyaageeti xammaqettidosona; hegeetuppe dariya baggay Yerusalaamen deꞌiyaageeta gidokkona. Darin miishshi baynnaageeti bantta ooratta ammanuwaabaa loytti eranau kataman takkanaadan, ishantti banttau deꞌiya miishshaa guutta wodiyau issippe shiishshana koshshiis. Maadoy koshshiyoogeeta maaddanau, ishantti bantta aquwaa bayzzidi, kiitettidaageetuyyo he miishshaa immidosona. Yihooway hegaa mala ammanuwaanne siiquwaa beꞌiyoogan ay keena ufayttideeshsha!—Oosuwaa 2:41-47.
Ha wodiyan, Kiristtaaneti bantta wodiyaa, bantta wolqqaanne bantta miishshaa kehatettaaninne ufayssan immiyoogan tumu goynuwaa aggennan kaafoosona. Hagan deꞌiya saaxinee, neeni hegaadan oottana danddayiyo issi issi ogeta qonccissees.
[Sinttaa 28n deꞌiya misiliyaa]
Issoti Issoti Miishshaa Immiyo Ogiyaa
SAꞌA YUUSHO OOSUWAU MIISHSHAA IMMIYOOGAA
Daroti “Alame Yuusho Oosuwau” giya xuufee deꞌiyo saaxiniyan yegganau amarida miishshaa dagayoosona.
Yihoowa Markkatu oosuwaa bantta biittan kaalettiya biiruwau, gubaaꞌeti shiiqida miishshaa aginan aginan yeddoosona. Hegaappekka haray, dosan immiyo miishshaa Yeyihowa Misikiroch, P. O. Box 5522, Addis Ababa, Ethiopia giya adarashan woykko intte deꞌiyo biittan deꞌiya Yihoowa Markkatu macara biiruwau yeddana danddayeeta. (Hagaappe kaallidi deꞌiya ogetun intte dosan immiyo imotaakka intte deꞌiyo biittan deꞌiya Yihoowa Markkatu macara biiruwau yeddana danddayeeta.) CHeekiyan xaafettiya miishshaa qanxxiyoy oossakko bessiyoosan “Yeyihowa Misikiroch” gaana koshshees. Worqqaanne hegaa mala hara alꞌꞌobatakka immana danddayettees. He immidobay muleera imota gidiyoogaa qonccissiya dabddaabbiyaara issippe yeddana koshshees.
ZAARIDI EKKANAU IMMIYO MIISHSHAA GIIGISSUWAA
Issi uri ba miishshaa Yihoowa Markkatu haymaanoote dirijjitee alame yuusho oosuwaa oottanau goꞌettanaadan hadaran immidi, bau koshshiyo wode oychidi, zaari ekkanau danddayees. Gujo qonccissuwaa koyikko qommoora deꞌiya adarashan xaafanau woykko silkke quxuriyan 011-6603611 dawalidi Yihoowa Markkatu macara biiruwaa oychana danddayettees.
HALCHUWAN IMMIYO IMOTAA
Alame yuusho Kawotettaa oosuwaa kaafanau miishshaa immiyoogaappe hara ogetikka deꞌoosona. Hegeetikka hagaappe kaallidi deꞌiyaageeta:
Inshuranssiyaa: Issi uri Yihoowa Markkatu haymaanoote dirijjitee ba gishshaa deꞌuwaa inshuransse higgiyan woykko xurataa miishshaa goꞌettanaadan oottana danddayees.
Bankkiyan Deꞌiya Miishshaa: Deꞌiyo biittaa bankkiyaa higgee paqqadiyoogaadan, bankkiyan deꞌiya miishshay, miishshay deꞌiyoogaa qonccissiya woraqatay woykko xurataa miishshay hadaran woykko hayqqiyo wode Yihoowa Markkatuyyo imettanaadan qonccissana danddayettees.
Akisiyoonetanne Bonddeta: Akisiyoonetanne bonddeta Yihoowa Markkatu haymaanoote dirijjitiyau immana danddayettees; woykko hayqqiyo wode, Yihoowa Markkatu haymaanoote dirijjitiyau imettanaadan oottana danddayettees.
Gadiyaanne Keettaa: Bayzzanaunne laammanau danddayettiya aquwaa immanau woykko keettaa gidikko, deꞌido keenan goꞌettidi hegaappe simmin laatissana danddayettees. Issi uray ba sunttan deꞌiya gadiyaa woykko keettaa immanau sunttaa laamissanaappe kase ba biittan deꞌiya macara biiruwau erissana koshshees.
Immidobaappe Aballiyaa Ekkiyoogaa: Ha giigissoy issi uri aqoy abaa gidiyoogaa erissiya sanadiyaa woykko ba miishshaa Yihoowa Markkata kalꞌꞌatiya dirijjitiyau immiyo giigissuwaa malaatees. Hegaa immida woykko a kalꞌꞌatida uri deꞌuwan deꞌido wodiyan, layttan layttan amarida miishshaa aballiyaa ekkees.
Laataanne Hadara Miishshaa: Higgiyaara moggiya ogiyan aquwaa woykko miishshaa Yihoowa Markkatu haymaanoote dirijjitiyaa laatissanau woykko hadaran immettida aquwan Yihoowa Markkatu haymaanoote dirijjitee goꞌettanaadan oottana danddayettees.
“Halchuwan immiyo imotaa” yaagiyaagee hagaa mala imotaa immiya uri halchana koshshiyoogaa bessees. Yihoowa Markkatu alame yuusho oosuwaa halchuwan kaafana koyiyaageetussi hegaa loytti qonccissanau Kawotettaabaa Sabbakiyo Alame Yuusho Oosuwaa Kaafanau Halchuwan Immiyoogaa giya brooshuree Inggilizettuwaaninne Isppeenettuwan giigiis. Ha brooshuree giigidoy, asay imotaa immanau woykko hayqqiyo wode laatissanau waatana danddayiyaakko dumma dumma ogiyaa qonccissanaassa. Daroti ha brooshuriyaa nabbabi simmidi, higgiyaa woykko qaraxaa xeelliyaagan zoriyaa oychidi, alame yuushuwan oottiyo haymaanoote oosuwaunne asau koshshiyaabau maaduwaa immana danddayidosona; qassi qaraxaara gayttidaagan goꞌettidosona. Ha brooshuriyaa demmanau, halchuwan immiyo imotaa bollaara xeelliya biiruwaa oychana danddayettees.
Gujo qonccissuwaa demmanau hagaappe kaallidi deꞌiya adarashan woykko silkke quxuriyan macara biiruwaa oychana danddayeeta. Woykko deꞌiyo biittan deꞌiya macara biiruwaa oychana danddayettees.
Yeyihowa Misikiroch
P. O. Box 5522
Addis Ababa
Ethiopia
Silkkee: 011-6603611