Xoossaa Asaa Giddon Woppaa Demma

“Kunttida yaa7an taani neeyyo galataa immana.”—MAZAMURE 35:18.

1-3. (a) Issi issi Kiristtaaneti ayyaanaaban daafan gelanaadan oottiyaabay aybee? (b) Xoossaa asay naaguwaa awuppe demmana danddayii?

JO GIYO ishaynne a machiyaa allaxxanau bosan daro qommo, guutta moleenne gita molee diyo abban haattaa wadhoosona. Eti haatta garssan deꞌiyaabaa beꞌanau giddokko wadhidi biidosona. Eti ciimmatiyaasaa gakkiyo wode, Jo machiyaa, “Nuuni keehi haakkidaba milatees” yaagaasu. Jo iyyo, “Yayyoppa, ta oottiyoobaa erays” yaagiis. Hegaappe sohuwaara, ‘Mole ubbay awu biidee?’ giidi qoppidoogaa Jo hassayees. Dagammidi, hegaadan hanidoy aybissakko akeekiis. Haahuwan ciimmaa giddoora sharkke giyo molee baakko yiyaagaa beꞌiis. I sharkkiyan meetettiichi attiis. SHarkkee a mati gakkidi, hara baggi simmidi biis.

² Issi Kiristtaanee daafan gelana haniyoogaa akeekennan, Seexaanaa siraatan deꞌiyaabatun, giishin wodiyaa aattiyooban, oosuwan, aquwan a qofay laalettana danddayees. Kiristtaane cima gidida Jo, “Tana gakkidabay nuuni lagge oottana bessiyoy oonakko qoppanaadan oottiis. Qoho gattennasaaninne ufayssiyaasan, giishin gubaaꞌiyan wadha!” yaagiis. Nena gubaaꞌiyaappe haassidi, ayyaanaaban qohana danddayiya ciimmatiyasan wadhoppa. Gubaaꞌiyaappe guuttaa haakkiyoogaa akeekikko sohuwaara gubaaꞌiyau simma. Yaatana xayikko, Yihoowaara neeyyo deꞌiya dabbotay moorettees.

³ Ha wodiyan, alamee Kiristtaaneta daafan yeggiya soho. (2 Ximootiyoosa 3:1-5) Seexaanay baayyo attida wodee guutta gidiyoogaa eriyo gishshau, naagettennaageeta mittanau koyees. (1 PHeexiroosa 5:8; Ajjuutaa 12:12, 17) Gidoppe attin, nuuyyo naagettiyo sohoy deꞌees. Yihooway ba asay ayyaanaaban naagettiyo sohuwaa, giishin Kiristtaane gubaaꞌiyaa giigissiis.

4, 5. Sinttappe eta gakkanabaa xeelliyaagan daro asau aybi siyettii, aybissi?

⁴ Deretettay asatettan gidin qofan, asau woppaa demissiyoy he keesa. Daro asay danuwaappe, makkalaappe, saꞌay qaxuwatiyoogaappenne carkkuwaa hanotay moorettiyoogaappe denddidaagan asatettan woppaa demmibeennabadan qoppees. Cimatettaappenne sahuwaappe denddidaagan ubba asaa metoy gakkees. Oosoy, keettaynne gidiya miishshay deꞌiyoogeeti hegee xayana giidi, qassi sahoy caddennaageeti sahettana giidi, hirggana danddayoosona.

⁵ Hegaadankka, daroti qofan woppaa demmana danddayibookkona. Azzanttiyaabay, aqo oyqqidi naata yeliyoogan sarotettaanne ufayssaa demmanau hidootida daroti eti qoppidoogaadan hanibeennaagaa akeekidosona. Ayyaanaaban woppaa demmiyoogaa xeelliyaagan, woosa keettaa biya darotussi kirqqi giis; eti tamaariyoobay goꞌꞌiyaaba gidiyoogaa siroosona. He asati haymaanootiyaa kaalettiyaageetu iita kandduwaanne eti tamaarissiyo Geeshsha Maxaafan baasettibeenna timirttiyaa beꞌiyo wode, hegaadan siroosona. Daroti saynisiyaa xallan hidootaa wottoosona; woykko daro asay asau loꞌꞌobaa oottees, qassi hegaadan oottanaadan denttettiyay eta loꞌꞌo kandduwaa giyoogaa xallan ammanoosona. Yaatiyo gishshau, nu yuushuwan deꞌiya asay keehi woppaa xayiyoogee woykko sinttappe banttana gakkanabaa daro qoppana koyennaagee garamissenna.

6, 7. (a) Xoossaayyo oottiyaageetunne oottennaageetu xeelan dummatettay deꞌanaadan oottiday aybee? (b) Nuuni ay beꞌanee?

⁶ Kiristtaane gubaaꞌiyan deꞌiyaageetu xeelay haratuugaappe keehin dummatees! Nu shoorota gakkiya metoy nuna gakkiyaaba gidikkokka, Yihoowa asa gidiyoogaadan nu xeelay etaagaappe keehi dumma. (Isiyaasa 65:13, 14; Milkkiyaasa 3:18 nabbaba.) Aybissi? Nuuni asaa gakkiyaaba xeelliyaagan ammanttiya qofaa Geeshsha Maxaafaappe demmido gishshataassanne deꞌuwan gakkiya metuwaanne waayiyaa xoonanau giigetti utto gishshataassa. Hegaa gishshau, sinttanaabau keehippe hirggokko. Nuuni Yihoowa Markka gidiyoogee, Geeshsha Maxaafan baasettibeenna iita qofaappe, shori baynna oosuwaappenne hegaa malabay kaalettiyoobaappe naagettanaadan maaddees. Hegaa gishshau, Kiristtaane gubaaꞌiyaa yameti harati demmenna woppaa demmoosona.—Isiyaasa 48:17, 18; Piliphphisiyuusa 4:6, 7.

⁷ Yihoowa asay haratuugaappe dummatiya hanotan demmiyo woppaabaa wotti denttidi qoppanaadan issi issi leemisoti nuna maaddoosona. Ha leemisoti nuuni qoppiyoobaanne oottiyoobaa pilgganaadan, qassi nuuni naagettana mala Xoossay giigissido zoriyaa kumetta ogiyan oosuwan peeshshana danddayiyaakkonne qoppanaadan denttettana danddayoosona.—Isiyaasa 30:21.

“Ta Gedee Xubettanau Guuttaa Attiis”

8. Yihoowa ashkkarati ubbatoo ay oottana koshshidee?

⁸ Asaa naatu taarikiyaa doomettaappe doommidi, Yihoowayyo oottanaunne azazettanau koyidaageeti ayyo azazettanau koyennaageetuura laggetennaadan naagettidosona. Yihooway baayyo goynniyaageetunne Seexaanaa kaalliyaageetu giddon morkketettay deꞌanaagaa yootiis. (Doomettaabaa 3:15) Xoossaa asay Xoossay kessido baaso siraataa minttidi naagiyo gishshau, ba yuushuwan deꞌiya asaagaappe dumma ogiyan deꞌiis. (Yohaannisa 17:15, 16; 1 Yohaannisa 2:15-17) Hegaadan deꞌiyoogee ubbatoo metennaba gidenna. Yihoowayyo oottiyaageetuppe amaridaageeti, bantta goꞌꞌaa yarshshidi deꞌiyoogee aadhida eratetta gidiyoogaa issi issitoo siridosona.

9. Mazamure 73 xaafidaagaa qofissidabaa qonccissa.

⁹ Ba kuushshay eratetta kuushshakkonne qoppiyoogaa doommida, Yihoowa ashkkaratuppe issoy Mazamure 73 xaafidaagaa; i Asaafa yara gidennan aggenna. He mazamuraawee, Xoossau oottanau baaxetiyaageeta metoy gakkiyo wode, iitati darotoo injjetidoogeeta, ufayttiyaageetanne dure malatiyoy aybissakko oychiis.—Mazamure 73:1-13 nabbaba.

10. Mazamuraawee denttido oyshay nena keehippe qofissiyaaba gididoy aybissee?

¹⁰ Mazamuraawee xaafidoogaa mala oyshay nena qofissi erii? Hegaadaana gidikko, nena keehippe mooranchadan xeellanau woykko ne ammanoy shuggidabadan qoppana koshshenna. Yihooway Geeshsha Maxaafaa xaafissidoogeetuppe amaridaageeta gujjin, Yihoowa ashkkaratuppe daroti hegaadan qoppidosona. (Iyyooba 21:7-13; Mazamure 37:1; Ermmaasa 12:1; Imbbaaqooma 1:1-4, 13) Yihoowayyo oottanau koyiya ubbay: Xoossaayyo oottiyoogeenne azazettiyoogee aybippenne aadhiyaabee? yaagiya oyshaa minttidi qoppanaunne ha oyshaa zaaruwaa ammanidi ekkanau bessees. Hegee Seexaanay Edene gannatiyan denttido oyshaara gayttidaba. Hegee Xoossay ubbaappe bollaara haariyo maatan denddida oyshau waannatiyaaba. (Doomettaabaa 3:4, 5) Yaatiyo gishshau, mazamuraawee oychido oyshaa nuuni ubbay qoppana koshshees. Eta deꞌuwan metoy gakkennaba milatiya, ceeqettiya iitata nuuni qanaatana koshshii? Nuuni Yihoowayyo oottiyoogaappe ‘xubettidi,’ eta ogiyaa kaallana koshshii? Nuuni oottanaadan Seexaanay koyiyoy hegaa gidiyoogee qoncce.

11, 12. (a) Mazamuraawee siriyoogaa waatidi aggidee, qassi hegaappe nuuni ay tamaariyoo? (b) Mazamuraawiyaagaadan kuuyanaadan nena maaddiday aybee?

¹¹ Mazamuraawee siriyoogaa agganaadan aybi maaddidee? I geeshshatetta ogiyaappe xubettiichi attidoogaa ammanidaba gidikkonne, i “Xoossaa geeshsha sohuwaa gelido wode,” giishin gayttiyo dunkkaaniyan woykko beeta maqidasiyan oottiya, ayyaanaaban kaymidaageetuura gayttido wodenne Xoossaa halchuwaabaa wotti denttidi qoppido wode ba xeelaa laammiis. Iitabaa oottiyaageeta gakkiyaabi bana gakkanaadan koyennaagaa mazamuraawee he wode akeekiis. Eti deꞌuwan oottiyoobaynne dooriyoobay eta “hallixxiya sohuwan” utissidoogaa i akeekiis. SHori baynnabaa oottidi Yihoowa aggiyaageeti ubbay, ‘akeekennan dagaman’ xayanaagee attennaagaa, qassi Yihooway baayyo oottiyaageeta kaafanaagaa mazamuraawee akeekiis. (Mazamure 73:16-19, 27, 28 nabbaba.) He qofay tuma gidiyoogaa ne deꞌuwan beꞌennan aggakka. Xoossaa higgiyaa qoppennan ba huuphe xallau deꞌiyoogee darotussi ufayssiyaaba milatana danddayees; shin hegaa mala deꞌoy iitabaa kaalettiyoogee attenna.—Galaatiyaa 6:7-9.

¹² Mazamuraawiyaa gakkidabaappe harabaa ay tamaariyoo? I Xoossaa asaa giddon woppaanne aadhida eraa demmiis. I Yihoowayyo goynniyo sohuwaa biido wode, akeekan suure qoppiyoogaa doommiis. Ha wodiyankka hegaadan, aadhida eratettan zoriyaageetanne ayyaanaaban ufayssiya qumaa gubaaꞌiyaa shiiqotun demmana danddayoos. Yaatiyo gishshau, Yihooway ba ashkkarati Kiristtaane shiiquwan beettanaadan yootiyo loꞌꞌo gaasoy deꞌees. Eti aadhida eratettan simerettanau he sohuwan minttettuwaa demmoosona.—Isiyaasa 32:1, 2; Ibraawe 10:24, 25.

Ne Laggeta Eratettan Doora

13-15. (a) Diino gakkidabay aybee, hegee aybau leemiso gidii? (b) Nu mala Kiristtaanetuura laggetiyoogan naagettiyoy aybissee?

¹³ Alamiyaa asaara laggetiyoogee wolqqaama metuwaa kaalettiyoogau Yaaqooba naꞌiyaa Diina leemiso gidausu. A bantta heeran deꞌiya Kanaane biittaa macca naatuura gayttiyoogaa meeze oottidoogaa Doomettaabaa maxaafay yootees. Kanaaneti Yihoowayyo goynniyaageetuugaa mala kandduwaa maaraa kaallokkona. Hegaappe dumma hanotan, Kanaanetu deꞌoy hegaappe simmin deꞌiya wodiyan eta biittan eeqaa goynoy, shori baynna kanddoynne asho gaytotettaa eeqaa goynoy kumanaadan oottidoogaa naqaashay bessees. (Kessaabaa 23:23; Wogaabaa 18:2-25; Zaarettido Wogaa 18:9-12) Diina he asatuura laggetidoogee kaalettidobaa hassaya.

¹⁴ He biittaa asa gidida, “ba aawaa keettan de7⁠iya ubbaappe aadhdhi” bonchchettidaagaa geetettida SHekeemi o beꞌidi, “dafi efiidi mooriis.” (Doomettaabaa 34:1, 2, 19) Hegee ayba azzanttiyaabee! Diina hegaa malabi bana gakkana gaada qoppidaba neeyyo malatii? A loꞌꞌo asa gaada qoppido, heeran deꞌiya yelagatuura laggetanau koyennan aggukku. Gidoppe attin, Diina keehippe cimettaasu.

¹⁵ Ha taarikiyaappe ay tamaariyoo? Ammanennaageetuura laggetidi, iitabi gakkenna gi qoppana danddayennaagaa tamaaroos. Geeshsha Maxaafay “iita laggetettai lo77⁠o hanotettaa” mooriyoogaa yootees. (1 Qoronttoosa 15:33) Hara baggaara, ammanuwan, kandduwaa maaraaninne Yihoowa siiqiyoogan neegaa mala xeelay deꞌiyoogeetuura laggetiyoogee nena naagees. Hegaa mala loꞌꞌo laggetettay neeni aadhida eratettan simerettanaadan maaddees.—Leemisuwaa 13:20.

“Intte Meecettidetanne Geeyideta”

16. Kiitettida PHauloosi Qoronttoosa gubaaꞌiyan deꞌiya issi issi asatubaa woygidee?

¹⁶ Daroti tuna oosuwaappe banttana geeshshanaadan Kiristtaane gubaaꞌee maaddiis. Kiitettida PHauloosi Qoronttoosa gubaaꞌiyau xaafido koyro dabddaabbiyan yan deꞌiya Kiristtaaneti Xoossaa maaraadan deꞌanau laamettidoogaa yootiis. Etappe issooti issooti shaaramuxiyaageeta, eeqassi goynniyaageeta, wodiraa laammiyaageeta, attumaasa gidiiddi, attumaasaara shaaramuxiyaageeta, kaysota, mattottiyaageetanne hegaa malabaa oottiyaageeta. PHauloosi eta: “SHin . . . intte meecettidetanne geeyideta” yaagiis.—1 Qoronttoosa 6:9-11 nabbaba.

17. Geeshsha Maxaafaa baaso siraataadan deꞌiyoogee darotu deꞌuwaa laammidoy ayba ogiyaanee?

¹⁷ Ammanoy baynna asau kaalliyo loꞌꞌo baaso siraati baawa. Beni wode Qoronttoosa gubaaꞌiyan deꞌida issooti issooti ammananaappe kase bantta koshshaa kaalliyaageeta woy bantta yuushuwan deꞌiya asaa iita kandduwaa maaraa kaalliyaageeta. (Efisoona 4:14) Gidoppe attin, Xoossaa qaalaanne Xoossaa halchuwaabaa suure eraa demmiyoogee, bantta deꞌuwan Geeshsha Maxaafaa kaaletuwaa kaalliyaageetu deꞌuwaa laammana danddayees. (Qolasiyaasa 3:5-10; Ibraawe 4:12) Ha wodiyan Kiristtaane gubaaꞌiyan deꞌiya daroti Yihoowa geeshshatettaa maaraa tamaaridi, a kaallanaappe kase kandduwaaban shori baynna hanotan deꞌidoogaa neeyyo yootana danddayoosona. Gidikkonne, eti ufayssinne woppi baynna deꞌuwaa deꞌidosona. Eti ufayssaa demmidoy Xoossaa asaara laggetidi, Geeshsha Maxaafaa baaso siraataara moggidi deꞌiyoogaa doommido wode.

18. Issi yelagiyo aybi gakkidee, hegee ay qonccissii?

¹⁸ Hegaappe dumma ogiyan, woppaa demmiyo Kiristtaane gubaaꞌiyaappe hagaappe kase haakkida issooti issooti bantta kuuyidoban keehi zilꞌꞌettoosona. Taaniyoa giyo issi michiyaa “naatettan tumaa guuttaa eriyoogaa” yootaasu; shin iyyo layttay 16 gidiyo wode “alamee shiishshiyooban ufayttanau” gubaaꞌiyaappe haakkaasu. O gakkidabay koyennan shahaariyoogaanne shahaaraa kesissiyoogaa gujjees. A haꞌꞌi hagaadan gausu: “Gubaaꞌiyaappe haakkido heezzu layttan qofan unꞌꞌettanaadan oottiya, dogana danddayennabay tana gakkiis. Tau shayaappe kiyenna issibay ta uluwan deꞌiya naꞌaa woridoogaa. . . . Alamiyaa guutta wodiyaukka gidin ‘beꞌanau’ koyiya yelaga ubbau: ‘Beꞌoppite!’ gaanau koyays. Hegee koyro ufayssana danddayees; shin wurssettan qoho gattiyaaba. Alamiyaappe demmiyoobay azzanttiyaaba xalla. Taani hegaa beꞌaas. Yihoowa dirijjitiyan deꞌite! Ufayssiya deꞌo ogee hegaa xalla.”

19, 20. Kiristtaane gubaaꞌiyaappe ayba naaguwaa demmiyoo, waatidi?

¹⁹ Neeni naaguwaa demmiyo Kiristtaane gubaaꞌiyaappe haakkikko, nena gakkanabaa qoppa. Daroti tumaa siyanaappe kase deꞌido hada deꞌuwaa hassayidi, hegaabaa qoppanaukka koyokkona. (Yohaannisa 6:68, 69) Kiristtaane ishatuuranne michotuura mata lagge gidada deꞌiyoogan, Seexaanaa alamiyan kumida aayyeꞌana giissiyaabaappenne azzanuwaappe ubbatoo naagettadanne woppu gaada deꞌana danddayaasa. Etaara laggetiyoogeenne gubaaꞌe shiiqotun ubbatoo beettiyoogee Yihooway kessido geeshshatettaa maaray aadhida eratettay deꞌiyoogaa gidiyoogaa nena hassayissees; qassi he maaraadan deꞌanaadan minttettees. Mazamuraawee oottidoogaadan, ‘kunttida yaaꞌan neeni Yihoowa galatanaadan’ oottiya daro gaasoy deꞌees.—Mazamure 35:18.

²⁰ Ammanettidi deꞌiyoogee ubba Kiristtaanetussi issi issitoo metanaadan oottiya amaridabay deꞌiyoogee qoncce. Suure ogiyaa kaallanaadan eta zoriyoogee koshshana danddayees. Neeninne gubaaꞌiyan deꞌiya asay, hegaa mala wodiyan intte mala Kiristtaaneta maaddanau ay oottana danddayeetii? Ne ishata ubbatoo waatada ‘minttettanaunne maaddanau’ danddayiyaakko kaalliya huuphe yohoy qonccissees.—1 Tasalonqqe 5:11.

[Tohossa qofata]

Woygada Zaaruutii?

• Mazamure 73 xaafidaagaa gakkidabaappe ay tamaariyoo?

• Diino gakkidabaappe ay tamaariyoo?

• Kiristtaane gubaaꞌiyan neeni woppaa demmana danddayiyoy aybissee?

[Sinttaa 9n deꞌiya misiliyaa]

Qoho gattennasan, giishin gubaaꞌiyan wadha!