Tumay Ne Deꞌuwaa Laammana Danddayees
KASETIYA huuphe yohoti qoncciyaa kessido, Xoossaa xeelliyaagan odettiya worddotuppe geella issuwaa siyennan woy tamaarennan aggakka. SHin worddo gidida he timirtteta neeni daro wodiyau ammanidaba gidikko, hegaa ammaniyoogaa agganau mammottana danddayaasa.
Hegaadan mammottanaadan oottiyaabaa akeekanau metenna. Issi issi haymaanooteti eti tamaarissiyoobaa Geeshsha Maxaafay yootiyoobaara gatti xeelliyoogaa minttettokkona. Haraati qassi eti tamaarissiyo worddoy qoncciyaa kiyennaadan, Geeshsha maxaafay yootiyoobay akeekanau metiyaagaa woykko ubba asay akeekana danddayennaba yaagoosona. Yesuusi erissiyo ashkkaratuppe daroti, xoqqa timirttiyaa tamaaribeenna coo asata gidikkokka, i tamaarissiyoobaa akeekanau metootibookkona.—Oos. 4:13.
Ne ammanuwaa pilggiyoogee neeyyo ammanoy paccidoogaa bessiyaaba gaada yayyiyoogan hegaadan oottanau guyye gaana danddayaasa. Gidoppe attin, Xoossay neeppe koyiyoobaa eranau, i asaa naatussi xaafissido, Geeshsha Maxaafaa neeni pilggiyoogan ufayttenna giidi qoppiyoogee bessiyaabee? Hegaappe dumma ogiyan, a Qaalay neeni, “Xoossai koyiyoobi, lo77obi, a ufaissiyaabinne qassi kumettabi aibakko” eranau Geeshsha Maxaafaa pilgganaadan minttettees.—Roo. 12:2.
Xoossaabaa tumaa tamaariyoogee, issi oorattabaa tamaariyoogaappe aadhiyaaba; hegee ne deꞌoy kaseegaappe loꞌꞌanaadan maaddana danddayees. (Yoh. 8:32) Doometta huuphe yohuwan denttido Dina, haꞌꞌi Xoossaa Qaalan loytta ammanausu. A hagaadan gaasu: “Geeshsha Maxaafaa xannaꞌiyoogaa doommanaappe kase, Xoossaa Qaalay keehi qoncce gidiyoogaa erikke. Yihooway tau qoppenna Xoossaa gidennan, saluwan deꞌiya, tana siiqiya Aawaa gidiyoogaa haꞌꞌi akeekaas. Taani deꞌuwaa halchuwaa eraas.”
Neeni hagaappe kase Geeshsha Maxaafaa xannaꞌidaba gidikkonne, hegee nena goꞌꞌibeennabadan qoppana danddayaasa. Hegaadaana gidikko, hidootaa qanxxoppa. Xoossaa xeelliyaagan odettiya wordduwaa ammanaydda Geeshsha Maxaafaa qofaa akeekanau maliyoogee, hara dumma misiliyaa xeellaydda, qanxxeretti wottido issi misiliyaa issippe gatta oyttanau maliyoogaa mala. He qanxxerettidoogeetuppe amaridaageeta eta sohuwan sohuwan suure wottana danddayaasa; shin neeni giigissido misilee, neeni xeellanaadan imettida misiliyaara issi mala gidenna gishshau, hidootaa qanxxaasa. SHin suure gidida misiliyaa xeellaydda qanxxerettidoogeeta issippe oyttikko, hegee suure misiliyaara issi mala gidees.
Xoossaabaa tumaa eranau koyay? Ne heeran deꞌiya Yihoowa Markkatuura gayttada woykko ha maxeetiyan sinttaa 4n deꞌiya adraashaappe neeyyo injjetiyaasaa xaafiyoogan, miishsha qanxxennan Geeshsha Maxaafaa xannaꞌanaadan shoobboos.
[Sinttaa 9n deꞌiya misiliyaa qonccissuwaa]
“Intte Xoossai koyiyoobi, lo77obi, a ufaissiyaabinne qassi kumettabi aibakko erana.”