Tumay Hegaa Keeni Koshshiyabee?

Neeni tumaanne wordduwa shaakka eranawu metootadii? Ha wodiyan asay tumaa kaalliyogaappe daro baggi ba koshshaanne ba ammaniyobaa kaalliyaba milatees. Leemisuwawu, ha hanotaa qonccissanawu “tumay attidaba” giyogee mata wodeppe simmin meeze gididaba.a Hegee daroti tuma giyobi baawa giidi ammaniyo, ha wodiyan ubbasan deꞌiya hanotaa loytti qonccissiyaba.

Hegaa mala qofay oorattaba gidenna. Biittaa haariya, Rooma asa gidida Phenxxeniya Philaaxoosi 2,000 gidiya layttaappe kase siriiddi, ‘Tumay aybee?’ giidi Yesuusa oychchiis. (Yohaannisa 18:35) Philaaxoosi zaaruwa demmanawu koyibeennaba gidikkonne, A oyshay keehi koshshiyaba. Neeni Geeshsha Maxaafaappe hegawu aliya zaaruwa demmana danddayaasa; qassi tumay attidaba giyo ha wodiyan suure ogiya demmanaadan hegee nena maaddana danddayees.

Gido shin, tuma giyobi deꞌii?

Ee. Geeshsha Maxaafay “tumaa” giya qaalaa, naqaashi deꞌiyobaanne kandduwara gayttidaagan likke gididabaa qonccissanawu goꞌettees. Qassi Xoossaa Yihoowab ‘tumaa Xoossaa’ giyogan, I tumawu Pultto gidiyogaa yootees. (Mazamure 31:5) Geeshsha Maxaafan Xoossay yootido tumay deꞌees; qassi I tumaa pooꞌuwara geeddarssees, hegee saꞌa ubban asawu kirqqi giido ha wodiyan nuna kaalettana danddayees.—Mazamure 43:3; Yohaannisa 17:17.

Tumaa waata demmana danddayay?

Xoossay nuuni Geeshsha Maxaafan deꞌiya tumaa aynne qoppennan coo ammananaadan koyenna. Ubba I nuuni nuuyyo siyettiyabaappe denddidi gidennan, yuushshi qoppidi tumaa pilgganaadan koyees. (Roome 12:1) I nuuni A eranaadaaninne nu “kumetta qofan” A siiqanaadan koyees; qassi nuuni Geeshsha Maxaafaappe tamaariyo tumay likke gidiyogaa yigganaadan minttettees.—Maatiyosa 22:37, 38; Oosuwaa 17:11.

Worddoy waani doommidee?

Wordduwa doommiday Geeshsha Maxaafay ‘wordduwa aawaa’ giyo, Xoossaa morkkiya Seexaanaa Dabloosa gidiyogaa Xoossaa Qaalay yootees. (Yohaannisa 8:44) I koyro asatuyyo Xoossaabaa wordduwa yootiis. (Doomettaabaa 3:1-6, 13, 17-19; 5:5) He wodeppe doommidi, Seexaanay wordduwa aassiiddinne Xoossaabaa tumaa genttiiddi takkiis.—Ajjuutaa 12:9.

Ha wodiyan worddoy meeze gididoy aybissee?

Geeshsha Maxaafay ‘wurssetta gallassaa’ giyo nu wodiyan, Seexaanay awudeegaappenne aaruwan saꞌa ubbaa balettiiddi deꞌees. Asay harata balettanawunne ba goꞌꞌaa gishshawu worddotiyogee meeze gididaba. (2 Ximootiyoosa 3:1, 13) Ha wodiyan daro haymaanootetunkka worddotiyogee meeze gididaba. Geeshsha Maxaafay nu wodiyabaa kasetidi yootidoogaadan, asay banttawu “siyanau ufaissiyaabaa yootiya tamaarissiyaageeta gujji gujji” shiishshoosona; qassi “tumu yohuwaa siyiyoogaa aggidi” bantta hayttaa wora zaaranawu koyoosona.—2 Ximootiyoosa 4:3, 4.

Tumay keehi koshshiyoy aybissee?

Tumay asay issoy issuwa ammanettanaadan oottees. Asay issoy issuwa ammanettana xayikko dabbbotay moorettees, qassi deretettay minnenna. Xoossay nuuni tuman awu goynnanaadan koyiyogaa Geeshsha Maxaafay yootees. Hagaadan gees: “[Xoossawu] goinniyaageeti ayyaanaaninne tumatettan goinnanau bessees.” (Yohaannisa 4:24) Geeshsha Maxaafay yootiyo tumay neeni haymaanooteti tamaarissiyo wordduwa shaakka eranawunne appe laꞌa kiyanawu waati maaddana danddayiyakko eranawu, “Asay Xoossaa Siiqennaadan Oottiya Wordduwaa” giyagan deꞌiya huuphe yohota nabbaba.

Xoossay taani tumaa eranaadan koyiyoy aybissee?

Xoossay neeni atotettaa demmanaadan koyees; qassi yaatanawu neeni abaa tumaa erana koshshees. (1 Ximootiyoosa 2:4) Neeni likkebaanne likke gidennabaa xeelliyagan Xoossay kessido maaraa eriyabanne hegaa oosuwan peeshshiyaba gidikko, ayyo mata dabbo gidaasa. (Mazamure 15:1, 2) Asay tumaa eranaadan Xoossay Yesuusa ha saꞌaa kiittiis. Nuuni Yesuusi tamaarissiyobaa azazettanaadan Xoossay koyees.—Maatiyosa 17:5; Yohaannisa 18:37.

Xoossay worddotiyageeta xayssanee?

Ee. Asay worddotidi harata cimmiyogaa Xoossay ixxees. Worddotiyogaa aggennaageeta biittappe xayssanawu I qaalaa geliis. (Mazamure 5:6) Xoossay hegaa oottiyo wode, tumu “haasayi merinau de7ana” giidi gelido ba qaalaa polana.—Leemiso 12:19.