‘Tuman Deꞌa’

1. Nuuni Yihoowa Markka waani gididaakko haratussi yootiyoogan waani goꞌettiyoo?

“NEENI tumaa waata siyadii?” Ha oyshaa neeni darotoo zaaridoogee qoncce. Nuuni nu mala Kiristtaaniyaara loytti erettanawu koyidi koyro oychchiyo oyshatuppe issoy hagaa. Nu ishanttinne michchontti Yihoowa waati eridaakkonne A siiqidaakko siyiyoogaa dosoos, qassi nuuni Yihoowa Markka gidiyoogaa dosiyoy aybissakko etawu yootiyoogan ufayttoos. (Roo. 1:11) Hegaadan haasayiyoogee, nuuni Yihoowa Markka gidiyoogaa dosiyoy aybissakko ubbatoo qoppanaadan maaddees. Qassi Yihoowa anjjuwaa demissiyaanne an sabettanaadan oottiya ogiyan ubbatoo deꞌanawu murttidaageeta nuuni gidanaadan maaddana.—3 Yoh. 4.

2. Nuuni ha huuphe yohuwan ay beꞌanee?

² Nuuni tumaa dosiyo amarida gaasota ha huuphe yohuwan beꞌana. Yaatidi, nuuni ha alꞌꞌo imotaa siiqiyoogaa ubbatoo waati bessana danddayiyaakko beꞌana. Yihooway nuna tumaakko ehiido gishshawu, nuuni A keehi galatanaadan ha huuphe yohoy maaddanaagee qoncce. (Yoh. 6:44) Qassi, nuuni haratussi Geeshsha Maxaafan deꞌiya tumaa yootanawu keehi koyanaadankka maaddana.

NUUNI ‘TUMAA’ SIIQIYOY AYBISSEE?

3. Nuuni tumaa siiqiyo waanna gaasoy aybee?

³ Nuuni tumaa siiqiyo daro gaasoy deꞌees. Ubbaappe aaruwan, tumawu Pultto gidida Xoossaa Yihoowa nuuni siiqoos. I saluwaanne saꞌaa Medhdhida wolqqaama Xoossaa xalla gidennan, saluwan deꞌiya nuussi qoppiya siiqo Aawaa gidiyoogaa A Qaalaa, Geeshsha Maxaafaappe erida. (1 PHe. 5:7) Nu Xoossay “qaretainne maarotai kumido Xoossaa, danddayanchchaa, aggenna siiqoi daridoogaanne daro ammanettiyaagaa” gidiyoogaa eroos. (Kes. 34:6) Yihooway suure pirddaa dosees. (Isi. 61:8) Nuuni waayettiyoogaa I beꞌiyo wode azzanees, qassi I meto ubbaa xayssanawu keerido wodiyaa yeemuwan naagees. (Erm. 29:11) Hegee ayba ufayssiyaabee! Nuuni Yihoowa keehi siiqiyo gaasotuppe issoy hagaa.

4-5. Kiitettida PHawuloosi nu hidootaa markkabiyaa oyqqiya qaaxxenna birataara geeddarssidoy aybissee?

⁴ Nuuni tumaa siiqiyo hara gaasoy aybee? Tumay nuna keehi goꞌꞌees. Ane issi leemisuwaa beꞌa. Geeshsha Maxaafay yootiyo tumay nu hidootaara gayttidaba. Kiitettida PHawuloosi nu hidootay keehi alꞌꞌo gidiyoogaa qonccissanawu hagaadan giis: “Nuuni demmana giidi ufaissan naagi uttidoogee, nu shemppuwaayyo markkabiyaa oiqqiya qaaxxenna birata mala; he nuuni demmana giidi, ufaissan naagi uttidoogee erettida mino.” (Ibr. 6:19) He biratay markkabee qaaxxennaadan maaddiyoogaadan, Geeshsha Maxaafay yootiyo nu hidootay metoy gakkishinkka nuuni woppu gaanaadan maaddees.

⁵ Ha sohuwan, PHawuloosi tiyettida Kiristtaaneti demmana saluwaa hidootaabaa yootiiddi deꞌees. SHin ha xiqisee, gannate gidida saꞌan merinawu deꞌanawu yeemuwan naagiya Kiristtaanetussikka hanees. (Yoh. 3:16) Merinaa deꞌuwaa hidootaabaa eriyoogee keehi ufayssiyaaba.

6-7. Evona sinttanaabaa xeelliyaagan tumaa eridoogee O waati maaddidee?

⁶ Evono giyo michchee hanotaa beꞌa. A tuman diccabeykku, qassi A naatettan deꞌiyo wode hayquwaa yayyawusu. A, “Wontto giyoobi deꞌenna wodee deꞌana” giya issi qofaa nabbabidoogaa hassayawusu. A hagaadan gaasu: “Ha qofay taani sinttanaabaa qoppaydda qammi qammi xiskkennan aqanaadan oottiis. Taani, ‘Deꞌoy hagaa xalla waayi gidana. Taani deꞌiyoy aybissee?’ gaada qoppaas. Taani hayqqanawu koyabeykke!”

⁷ Guyyeppe, Evona Yihoowa Markkatuppe amaridaageetuura gayttaasu. A hagaadan gaasu: “Taani saꞌan Gannatiyan merinawu deꞌana danddayiyoogaa ammaniyoogaa doommaas.” Tumaa eridoogee nu michchiyo waati maaddidee? A gujjada hagaadan gaasu: “Taani sinttanaabaa woy hayquwaabaa qoppaydda xiskkennan aqiyoogaa aggaas.” Evona Geeshsha Maxaafaa tumaa siiqiyoogee qoncce; qassi A ba sinttanaa hidootaabaa haratussi yootiyoogan keehi ufayttawusu.—1 Xim. 4:16.

8-9. (a) Yesuusi yootido issi leemisuwan issi bitanee ba demmido alꞌꞌobaa xoqqu ootti xeelliyoogaa waati bessidee? (b) Neessi tumay ay keena alꞌꞌobee?

⁸ Geeshsha Maxaafaa tumay Xoossaa Kawotettaa mishiraachchuwaarakka gayttidaba. Yesuusi Kawotettaa tumaa moogido keehi alꞌꞌobaara geeddarssiis. Maatiyoosa 13:44n Yesuusi hagaadan giis: “Saluwaa kawotettai goshshan moogido miishsha milatees; issi bitanee he miishshaa demmidi, zaarettidi moogiis; daro ufaittiiddi biidi, baayyo de7iyaabaa ubbaa baizzidi, he goshshaa shammiis.” Bitanee he alꞌꞌobaa woy he miishshaa koyiiddi deꞌennaagaa akeeka. SHin I demmido wode, hegaa babaa oottanawu darobaa aggi bayiis. I bawu deꞌiya ubbabaa bayzziis. Aybissi? He miishshay keehi alꞌꞌoba gidiyoogaa I eriyo gishshataassa. I bawu deꞌiya ubbabaa aggi bayidoogee bessiyaaba.

⁹ Tumaa xeelliyaagan neeyyookka hegaadan siyettii? Hegaadan siyettiyoogee qoncce! Ha alamee immiyoobay nuuni ha wodiyan Yihoowawu haggaaziyoogan demmiyo ufayssaaranne Xoossaa Kawotettaa haaruwan demmana merinaa deꞌuwaara mule laggetennaagaa nuuni eroos. Yihoowaara dabbotidoogee nuuni aggi bayiyo aybippekka aadhdhiyaaba. “Ubba wode a ufaissiyaabaa” oottiyoogee nuna keehi ufayssees.—Qol. 1:10.

10-11. Mikaaꞌeeli ba deꞌuwan laamettanaadan A maaddidabay aybee?

¹⁰ Nuuppe daroti Yihoowan sabettanawu darobaa aggi bayida. Amaridaageeti ha alamiyan hayttatanaadan oottiya oosuwaa aggidosona. Harati dure gidanawu baaxetiyoogaa aggidosona. Harati qassi Yihoowabaa erido wode bantta deꞌuwaa hanotaa muleera laammidosona. Mikaaꞌeeli oottidobaykka hegaa. I tuman diccibeenna. Yelagatettan deꞌiyo wode I kaaraatiyaa loohiis. I hagaadan giis: “Taani asatettan mino gidada deꞌiyoogee tawu keehi koshshiyaaba. Issi issitoo, tana ooninne xoonana danddayennabadan tawu siyettees.” SHin Mikaaꞌeeli Geeshsha Maxaafaa xannaꞌiyoogaa doommido wode makkalaa Yihooway waati xeelliyaakko eriis. (Maz. 11:5) I bana Geeshsha Maxaafaa xannaꞌissida Yihoowa Markka gidida azinaabaanne machcheebaa hagaadan giis: “Taani kaaraatiyaa aggana koshshiyoogaa eti tawu mule yooti erokkona; eti ubbatoo tana Geeshsha Maxaafaa tumaa tamaarissidosona.”

¹¹ Mikaaꞌeeli Yihoowabaa loyttidi erido wode, A kaseegaappe aaruwan siiqiis. Yihooway baayyo goynniyaageetussi qarettiyoogaa akeekidoogee A keehi maaddiis. Guyyeppe Mikaaꞌeeli ba deꞌuwan laamettana koshshiyoogaa akeekiis. I hagaadan giis: “Kaaraatiya aggiyoogee taani kuuyido aybippenne aaruwan tawu deexxiyaaba gidiyoogaa erays. SHin hegee Yihoowa ufayssiyogaakka erays, qassi awu haggaaziyoogee taani agga bayiyo aybippenne aadhdhiyaaba gidiyoogaa ammanaas.” Mikaaꞌeeli I demmido tumay keehi alꞌꞌoba gidiyoogaa eriis, qassi I ba deꞌuwan laamettidoy hegaassa.—Yaaq. 1:25.

12-13. Geeshsha Maxaafaa tumay Maylo waati maaddidee?

¹² Geeshsha Maxaafay tumay keehi alꞌꞌo gidiyoogaa qonccissanawu, tumaa xuman pooꞌiya xomppiyaara geeddarssees. (Maz. 119:105; Efi. 5:8) Azerbaajanen deꞌiya Mayla, Xoossaa Qaalaappe eridobaa keehi nashshawusu. A haymaanootiyan issi mala gidenna keettan diccaasu. I aaway Isilaama, qassi I aayyiyaa Ayhuuda haymaanootiyaa kaallawusu. A hagaadan gaasu: “Taani Xoossay deꞌiyoogaa sirana xayikkonne, taayyo daro oyshati deꞌoosona. Taani hagaadan qoppaas: ‘Xoossay asaa medhdhidoy aybissee, qassi issi uri ba deꞌo laytta ubban tuggatiyoynne hegaappe simmin siꞌooliyan taman merinawu xuugettiyoy aybissee?’ Hegaa bollikka, asay ubbabay Xoossaa sheniyan hanees giyo gishshawu taani hagaadan qoppaas: ‘Asay waayettiyoogaa beꞌiyoogan Xoossay ufayttii?’”

¹³ Mayla ba oyshatuyyo zaaruwaa koyiyoogaa aggabeykku. Guyyeppe, A Geeshsha Maxaafaa xannaꞌada Yihoowa Markka gidaasu. A hagaadan gaasu: “Geeshsha Maxaafan deꞌiya ammanttiya tumay taani ufayttiya asa gidanaadan maaddiis. Xoossaa Qaalaappe ammanttiya qofaa demmidoogee taani woppu gaanaadan maaddiis.” Mayliigaadan, nuuni ubbay ‘xumaappe garamissiya ba pooꞌuwawu nuna xeesida’ Yihoowa sabboos.—1 PHe. 2:9.

14. Nuuni tumaa waati loytti siiqana danddayiyoo? (“Geeshsha Maxaafaa Tumaa Hara Aybiira Geeddarssana Danddayiyoo?” giya saaxiniyaakka xeella.)

¹⁴ Hageeti tumay keehi alꞌꞌo gidiyoogaa bessiya amarida leemisotu xalla. Neeni hara daro leemisota qoppana danddayiyoogee qoncce. Nuuni tumaa siiqana koshshiyo hara gaasota eranawu buzo xinaatiyan hegaabaa xannaꞌana danddayoos. Nuuni tumaa siiqikko, hegaa siiqiyoogaa bessana danddayiyo ogeta koyana danddayoos.

NUUNI TUMAA SIIQIYOOGAA WAATI BESSANA DANDDAYIYOO?

15. Nuuni tumaa siiqiyoogaa bessana danddayiyo issi ogee aybee?

¹⁵ Nuuni Geeshsha Maxaafaanne Geeshsha Maxaafaa qofay deꞌiyo xuufeta ubbatoo nabbabiyoogan tumaa siiqiyoogaa bessana danddayoos. Nuuni tuman deꞌido wodee ay keena gidikkokka, ubbatoo tamaarana bessiya darobay deꞌees. Koyro kiyida Wochchiyo Keelay hagaadan giis: “Tumay deꞌuwaa bazzuwan keehi diccida worddo sharafay cuulli uttido guutta ciishsha mala. Neeni he ciishshaa demmikko, naagana koshshees. . . . Hegaa nebaa oottanawu koyikko, ekkanawu hokkana koshshees. Tumaa ciishshaa issuwaa xalla demmada gidees gooppa. . . . SHiishshiyoogaa aggoppa; qassi haraakka gujjada koya.” Xannaꞌanawu baaxetana koshshees, shin yaatiyoogee maaddiyaaba.

16. Neeni xannaꞌanawu ayba hiillaa goꞌettay? (Leemiso 2:4-6)

¹⁶ Nuuppe daroti nabbabanawunne xannaꞌanawu dosokko. SHin tumaa loytti akeekanawu aggennan ‘koyanaadan’ Yihooway nuna minttettees. (Leemiso 2:4-6 nabbaba) Nuuni yaatiyaaba gidikko ubbatoo goꞌettoos. Koori Geeshsha Maxaafaa nabbabiyoogaara gayttidaagan issi xiqisiyaa xallaa I wudidi xeelliyoogaa yootiis. I hagaadan giis: “Taani tohossa qofata ubbaa nabbabays, geeddarssanawu imettida xiqiseta xeellays, qassi gujjada pilggays. . . . Hegaadan xannaꞌidoogee taani darobaa eranaadan maaddiis!” Nuuni xannaꞌanawu goꞌettiyoy ha hiillaa woy hara hiillaa gidin, nu wodiyaanne wolqqaa goꞌettidi xannaꞌiyoogan tumaa nashshiyoogaa bessoos.—Maz. 1:1-3.

17. Tuman deꞌiyoogaa giyoogee woygiyoogee? (Yaaqooba 1:25)

¹⁷ Tumaa xannaꞌiyoogaa xallay gidennaagaa nuuni eroos. Nuuni loytti goꞌettanawu tuman deꞌana bessees, hegaa giyoogee nuuni tamaaridobaa nu deꞌuwan oosuwan peeshshana koshshees giyoogaa. Nuuni yaatiyo wode xallan, tumay nuuni keehi ufayttanaadan maaddana. (Yaaqooba 1:25 nabbaba.) Nuuni tuman deꞌiyoogaa waati shaakki erana danddayiyoo? Nuuni oosuwan peeshshiiddi deꞌiyoobatanne giigissanawu koyiyoobata shaakki eranawu xannaꞌiyoogee loꞌꞌo gidiyoogaa issi ishay yootiis. Kiitettida PHawuloosi hagaadan giis: “Nuuni hanno gakkanaassi de7ido maaraadan, ane sinttau boos.”—Pili. 3:16.

18. Nuuni ‘tuman deꞌanawu’ nuussi danddayettida ubbabaa oottana koshshiyoy aybissee?

¹⁸ ‘Tuman deꞌanawu’ nuuni nuussi danddayettida ubbabaa oottiyoogee ay keena maaddiyaakko takki gaada qoppa! Hegee nu deꞌoy giiga gidanaadan oottiyoogaa xalla gidennan, Yihoowaynne nu mala Kiristtaaneti ufayttanaadankka oottees. (Lee. 27:11; 3 Yoh. 4) Hagee nuuni tumaa siiqanawunne tuman deꞌanawu keehi loꞌꞌo gaaso.