Hagaa Eray?

Beni Yerusalaame Beeta Maqidasiyan Miishshaa Laammiyaageeti Deꞌiyoy Aybissee?

▪ Yesuusi hayqqanaappe guuttaa kasetidi, beeta maqidasiyan oosettiya iita pirdda pacaabaa yootiis. Geeshsha Maxaafay hagaadan gees: “Yesuusi . . . hegan baizziyaageetanne shammiyaageeta ubbaa kare yedettiis; qassi miishshaa laammiyaageetu xaraphpheezaanne haraphphiyaa baizziyaageetu oidiyaa aatti yeggidi, eta, ‘Xoossaa maxaafan, “Ta keettai Xoossaa woossiyo keetta geetettana” yaagettidi xaafetti uttiis; shin intte a panggati qosettiyo gonggolo kesseeta.’”—Maa. 21:12, 13.

Koyro xeetu layttan deꞌida Ayhudatinne Ayhudatettau laamettidaageeti daro biittatuppenne katamatuppe Yerusalaame beeta maqidasiyaa biiddi, bantta heeran deꞌiya santtimeta ekkidi boosona. SHin, eti layttan layttan qanxxiyo beeta maqidasiyaa giiraa qanxxanau, yarshshiyo mehiyaa shammanaunne hara imotaa yarshsho oottidi immanau ya biittaa miishshaa goꞌettana koshshees. Hegaa gishshau, miishshaa laammiyaageeti woriyaa ekkidi, dumma dumma biittaa miishshaa koyettiya miishshau laammoosona. Ayhudatu baalati matiyo wode, miishshaa laammiyaageeti beeta maqidasiyaa gibbiyan, Ayhuda gidenna asaa dabaaban wogga xarapheezaa wottoosona.

Yesuusi miishshaa laammiyaageeta beeta maqidasiyaa “panggati qosettiyo gonggolo kesseeta” giido gishshau, eti keehi daro woriyaa ekkidi miishshaa laammennan aggokkona.