Nabbabiyaageetu Oyshaa . . .

Biittay xayanee?

▪ Issoti issoti biittay Xiqimita 21, 2011n xayana giidi qoppidosona. SHin biittay xayibeenna. Yaatiyo gishshau, Amarkkaa biittan eraadooniyan prograamiyaa shiishshiya Hareld Kamppini kasetidi yootidobay polettibeenna. I Uddufune 21 2011n Pirddaa Gallassay yaanaagaa, giishin alame yuushuwan wolqqaama biittaa qaattay denddanaagaanne ichashu aginappe guyyiyan Xiqimita 21n biittay xayanaagaa kasetidi yootiis.

Gidikkokka, biittay mule xayenna. Biittaa Medhidaagee biittay xayanaadan paqqadenna. A Qaalay: “Neeni ha sa7aa baasada essadasa; inne minnidi de7ees” yaagees.—Maz. 119:90.

SHin Geeshsha Maxaafaa nabbabiya issoti issoti ha biittay taman xayana giidi palamettana danddayoosona. Eti 2 PHeexiroosa 3:7, 10n deꞌiya qofaa hegau naqaashadan yootoosona. He xiqisee hagaadan gees: “SHin ha77i de7iya saloinne sa7ai, Xoossau goinnenna asati pirddettiyo gallassainne xayiyo gallassai gakkanaassi takkidi, he qaalan tamaa naagoosona. . . . SHin Godaa gallassai kaisodan yaana. He gallassi saloti wolqqaama gunttan Xayana; saluwaa meretati wolqqaama mishuwan seerana; sa7ainne a bollan de7iya ubbabai xayana.” Kiitettida PHeexiroosi yootidobay biittay xayanaagaa bessii?

CHii, bessenna. Aybissi? Ha xiqisetu qofaa loytti akeekanau, PHeexiroosi ba dabddaabbiyan yootidobaa Geeshsha Maxaafan deꞌiya hara qofaara gatti xeellana koshshees. Ha xiqisiyan deꞌiya issi issi qaalati leemiso gidana xayikko, yuniverssiyan keehi guutta gidida biittaa bolli deꞌiya iita asatu gaasuwan, saloy woykko yuniverssee, giishin daro biilooniyan qoodettiya xoolinttetinne harabati taman xuugettidi xayana giyoogaa. Neeni issi shafiyaa dosabeenna gishshau abbaa doonan deꞌiya shafiyaa ubbaa xayssuutii? Hegee bessiyaaba gidenna! Yaatiyo gishshau, i medhidobaappe keehi guutta gidida saꞌaa makkalancha asay mooridoogaa gaasuwan, Yihooway ba medhido meretaa ubbaa xayssenna.

Hegaa bollikka, ha qofay Yesuus Kiristtoosi yootidobaara moggenna. I, “Ashkketi anjjettidaageeta; aissi giikko, eti sa7aa laattana” yaagiis. (Maa. 5:5; Maz. 37:29) Issi siiqiya aaway ba soo asau injje keettaa keexxidi, he keettaa taman xuuggi? (Maz. 115:16) Hegaadan oottees giidi qoppiyoogee bessennaba! Yihooway Medhidaagaa xalla gidennan siiqiya Aawa.—Maz. 103:13; 1 Yoh. 4:8.

PHeexiroosi ‘saꞌaa’ giya qaalaa leemiso hanotan asaa naata malaatanau, ha sohuwan qassi iita asaa naata malaatanau goꞌettiis. PHeexiroosi Nohe wode Bashsha Haattaagaara issi malabay hananaagaa yootidoogaa akeeka. (2 PHe. 3:5, 6) He wode iita asaa xallay xayiis; biittay, qassi xillo asa gidida Noheenne a soo asay bashshaappe attidosona. Hegaadankka, PHeexiroosi ‘saluwaa’ giidoogee leemiso hanotaana. Ha sohuwan ‘salo’ geetettidaagee Xoossau goynnenna asaa haariya asa haaruwaa bessees. Yaatiyo gishshau, eti seerin saluwan deꞌiya Xoossaa haaroy woy Kawotettay eta sohuwan eqqana iita kawotettatu ubbaagaadan, bantta iitatettaappe simmenna iita asay xayana.—Dane. 2:44.

Yaatin biittay xayanee? CHii xayenna. Xayanay leemiso biittaa woykko iita asaa. Biittaynne Xoossaayyo goynniya asaa naati merinau deꞌana.—Lee. 2:21, 22.