Tumuppe Laꞌa Gidanau Yihoowa Kaaletuwaa Kaalla
“Ailletettaappe kessiya bali bainna higgiyaa [xeella].”—YAAQ. 1:25.
QONCCISSANA DANDDAYAY?
Tumuppe laꞌa gidanaadan maaddiya higgee awugee, qassi he higgiyan goꞌettiyaageeti oonee?
Tumuppe laꞌa gidanaadan maaddiya waannabay aybee?
Deꞌo ogiyan gencciya ubbay sinttappe laꞌa kiyanay ayba ogiyaanee?
1, 2. (a) Alamiyaa laꞌatettay waaniiddi deꞌii, qassi aybissi? (b) Yihoowa ashkkarati sinttappe ay mala laꞌatettan deꞌanee?
NUUNI deꞌiyoy yaaretiyoogee, iitabaa oottiyoogeenne makkalay dari dari biyo wodiyaana. (2 Xim. 3:1-5) Hegaappe denddidaagan, kawotettati kaseegaappe aaro higgiyaa kessoosona, poliseta gujjoosona, qassi wochanau maaddiya massaariyaa tokkoosona. Issi issi biittan asay qohiyaabaappe naagettanau, ba son kooshimmiyaabaa wottees, keettaa qulppiyaa gujjees, qassi ubba korinttiyaara gayttida shubuwaa dirssaa bolli wottees. Daroti yayyiyo gishshau, omarssan sooppe kiyokkona woykko gallassi gidin omarssi bantta naati banttarkka karen kaaꞌanaadan koyokkona. Laꞌa gidennaadan oottiyaabi gujji gujji biyoogee qoncce; qassi he hanotay giigiyaaba milatenna.
2 Seexaanay Edene gannatiyan, asaa naati Yihoowappe shaahettidi banttana banttarkka ayssiyoogaa xallan tumuppe laꞌa gidana danddayiyoogaa yootiis. Hegee worddo gidiyoogee qonccidi erettiis! Xoossay yootiyoogaa aggidi asay ba koyidoogaa oottiyoogee gujji gujji biyo wode, deretettan ubban tuggay dari dari bees. Hegee nuna Yihoowa ashkkaratakka qohees. Gidikkokka, nuuni asaa naati nagaraanne bashshaa aylletettaappe kiyiyoogaa beꞌiyoonne Geeshsha Maxaafay “Xoossaa naati ailletettaappe kiyido bonchcho kessaa” giyo laꞌatettan deꞌiyo hidootay deꞌees. (Roo. 8:21) Yihooway ba ashkkarati he laꞌatettan deꞌanau giigettanaadan maaddiiddi deꞌees. Ayba ogiyan?
3. Yihooway Kiristtoosa kaalliyaageetussi ay higge immidee, qassi nuuni beꞌana oyshati awugeetee?
3 Yihooway ba asay he laꞌatettan deꞌanau giigettanaadan maaddanau, Yaaqoobi yootido, “ailletettaappe kessiya bali bainna higgiyaa” immiis. (Yaaqooba 1:25 nabbaba.) Hara Geeshsha Maxaafaa birshshettatun ha xiqisee, “nuna laꞌa kessiya higgiyaa,” (Zi Niwu Inggilish Baybil) qassi “polo gidida, laꞌatettaa higgiyaa” (Zi Niwu Amerikan Baybil) geetettiis. Darotoo asay higgiyaa laꞌa oottiyaabadan gidennan, laꞌatettaa diggiyaabadan qoppees. Yaatin, “ailletettaappe kessiya bali bainna [higgee]” aybee? He higgee nuna laꞌa kessiyoy ayba ogiyaanee?
AYLLETETTAAPPE KESSIYA HIGGIYAA
4. “Ailletettaappe kessiya bali bainna [higgee]” aybee, qassi he higgiyan goꞌettiyaageeti oonee?
4 Muuse Higgee mooro oosoy aybakko bessido gishshaunne Kiristtoosi a polido gishshau, “ailletettaappe kessiya bali bainna [higgee]” he higgiyaa gidenna. (Maa. 5:17; Gal. 3:19) Yaatin, Yaaqoobi yootido higgee awugee? I qoppidoy ‘ammanuwaa higgiyaanne’ ‘laꞌa asaa higgiyaa’ geetettida ‘Kiristtoosa higgiyaa.’ (Roo. 3:27; Yaaq. 2:12, NW; Gal. 6:2) Yaatiyo gishshau, ‘bali baynna higgiyan’ Yihooway nuuppe koyiyo ubbabay deꞌees. He higgee ayyaanan tiyettidaageetakka ‘hara dorssatakka’ goꞌꞌees.—Yoh. 10:16.
5. Laꞌatettaa higgee deexo gidennay aybissee?
5 ‘Bali baynna higgee’ daro biittaa higgiyaappe dumma. Akeekanau woy kaallanau metenna azazotinne baaso siraatati a giddon deꞌoosona. (1 Yoh. 5:3) Yesuusi, “Ta qambbarai giiga; qassi taani inttena toossidoogeekka kaushsha” yaagiis. (Maa. 11:29, 30) Hegaa bollikka, ‘bali baynna higgiyau’ baasoy siiqo gidiyo gishshau, qassi i masettida shuchan gidennan, wozanaaninne qofan xaafettido gishshau, he higgiyan daro azazuwaa xaafana koshshibeenna.—Ibraawe 8:6, 10 nabbaba.
‘BALI BAYNNA HIGGEE’ NUNA AYLLETETTAAPPE KESSIYO OGIYAA
6, 7. Yihooway kessido maaraa xeelliyaagan woygana danddayettii, qassi laꞌatettaa higgee goꞌꞌiyaaba gididoy aybissee?
6 Yihooway qoppiya ba meretatussi kessido higgee eta goꞌꞌiyaagaanne iitabaappe naagiyaagaa. Leemisuwau, meretay merettidobaynne meretaa wolqqay au haarettiyo, meretaa higgiyaabaa qoppa. Asay he higgeti bana huqqunniyaabadan qoppenna. Hegaadan qoppiyoogaappe, ubba he higgeti bantta sarotettau keehippe koshshiyoogaa eridi, eta nashshoosona. Hegaadankka, ‘bali baynnaba’ gidida Kiristtoosa higgiyan qonccida, Yihooway kandduwaabaunne ayyaanaabau kessido maaray asaa goꞌꞌees.
7 Laꞌatettaa higgee iitabaappe naagiyoogaa bollikka, nuuni qohettennan woykko haratu maataanne laꞌatettaa bonchennaagaa bessiyaabaa oottennan, amottiyo bessiyaabaa ubbaa demmanaadan maaddees. Yaatiyo gishshau, tumuppe laꞌa gidanau, giishin nuuni koyiyoobaa oottanau maaddiya waannabay, Yihoowa eeshshaaranne i kessido maaraara moggiyaaba gidida, suurebaa amottiyoogaa. Hegaa giyoogee, nuuni Yihooway dosiyoobaa dosiyoogaanne i ixxiyoobaa ixxiyoogaa tamaarana koshshees; laꞌatettaa higgee hegaadan oottanaadan nuna maaddees.—Amo. 5:15.
8, 9. Laꞌatettaa higgiyaa naagiyaageeti ay goꞌꞌaa demmiyoonaa? Leemisuwaa yoota.
8 Nuuni polo asa gidenna gishshau, bala amuwaa amottennaadan baaxetoos. Gidikkokka, nuuni ubbatoo laꞌatettaa higgiyau haarettiyo wode, i aylletettaappe kessiyoogaa haꞌꞌikka beꞌana danddayoos. Leemisuwau, Geeshsha Maxaafaa xannaꞌiyoogaa doommida Jey giyo bitaniyau tambboy amale gidiis. I ba amalee Xoossaa ufayssennaagaa eriis; yaatiyo gishshau issibaa kuuyana koshshees. I ba ashuwaa amuwau haarettaneeyye Yihoowayyo haarettanee? A asatettay tambbuwaa uyanau keehi koyishinkka, i Xoossaayyo oottanau eratetta dooro dooriis. He amaliyaa aggi simmin au aybi siyettidee? I keehippe ufayttiyoogaanne maalaaliya hanotan “laꞌa” gididoogaa yootiis.
9 Asay ‘asatettay koyiyoogaadan’ deꞌanaadan oottiya, ha alamiyaa laꞌatettay aylle kessiyoogaa, qassi ‘ayyaanaabaa qoppiyo,’ Yihooway immiyo laꞌatettay aylletettaappe kessiyoogaanne “de7uwaanne sarotettaa” ehiyoogaa, Jey ba deꞌuwan beꞌidobaappe tamaariis. (Roo. 8:5, 6) Jey aylledan bana haarida amaliyaa agganau wolqqaa awuppe demmidee? I hegaa aggidoy ba minotettaana gidennan, Xoossay immiyo wolqqaana. I Geeshsha Maxaafaa paci baynnan xannaꞌiis, geeshsha ayyaanaa immanaadan Xoossaa woossiis, qassi gubaaꞌiyan deꞌiya ishatinne michoti siiquwan maaddido maaduwan goꞌettiis. A maaddidabay, tumu laꞌatettaa koyiyo wode nuna ubbaa maaddana danddayees. Waatidi maaddiyaakko ane beꞌoos.
XOOSSAA QAALAA AKEEKAN XEELLA
10. Xoossaa higgiyaa akeekan “xeelliyoogee” woygiyoogee?
10 Yaaqooba 1:25y, “Ooninne ailletettaappe kessiya bali bainna higgiyaa xeellidi, aani aqiyaagee . . . ba oottiyo oosuwan anjjettana” yaagees. “Xeellidi” geetettidi birshshettida koyro Giriiketto qaalay, issibaa loytti xeellanau hokkiyoogaa giyoogaa. Hegee baaxetana koshshiyoogaa bessees. Ee, laꞌatettaa higgee nu qofaanne wozanaa denttettanaadan koyikko, Geeshsha Maxaafaa minni xannaꞌiyoogan, woossiyoogaaninne nuuni nabbabidobaa wotti dentti qoppiyoogan nuuppe koyettiyaabaa oottana bessees.—1 Xim. 4:15.
11, 12. (a) Nuuni tumaa ogiyan deꞌana koshshiyoogaa Yesuusi qonccissidoy ayba ogiyaanee? (b) Yelagati naagettana bessiya iitabay aybee?
11 Hegaadankka, nuuni Xoossaa Qaalaa oosuwan peeshshiyoogan, an ‘aqana’ woykko genccana bessees; yaatiyoogan tumaa ogiyan deꞌoos. Yesuusi banan ammanida amaridaageetuyyo kaallidi deꞌiyaagaadan giidobay hegaara issi mala: “Intte taani tamaarissiyoogau azazettikko, tumu tana kaalliyaageeta. Intte tumatettaakka erana; qassi tumatettai inttena ailletettaappe kessana.” (Yoh. 8:31, 32) ‘Erida uri “eridoban” goꞌettiyo gishshau woy hegee au koshshiyo’ gishshau, issi xuufee ha xiqisiyan ‘eriyoogaa’ geetettida qaalay nashshiyoogaakka geetettiyoogaa yootees. Yaatiyo gishshau, nuuni tumaa ogiyan deꞌiyo wode a loyttidi ‘eroos.’ Yaatiyo wode, nuuni saluwan deꞌiya nu Aawaa keehippe milatanaadan “Xoossaa qaalai” nu eeshshaa laammiyo gishshau, nunan “oottees” gaana danddayoos.—1 Tas. 2:13.
12 Nena hagaadan oycha: ‘Tumuppe taani tumaa eriyaanaa? Tumaa ogiyan deꞌiyaanaa? Woy qassi alamiyaa “laꞌatettaappe” amaridaagaa haꞌꞌikka amottiyaanaa?’ Kiristtaane gidida aawaynne aayyiyaa dichido issi michiyaa ba deꞌuwan gakkidabaa yootaasu. A yelagatettan deꞌiyo wode Yihoowa ammaniyaaba gidikkonne, A loyttada erabeykku. A hagaadan gaada xaafaasu: “Taani i ixxiyoobaa mule ixxa erikke. Ta oottidobay a qofissees gaada qoppa erikke. Qassi tana metoy gakkiyo wode akko woossa erikke. Taani ta akeekan zemppaas; taani he wode aybanne erenna gishshau, hegee eeyyatetta gidiyoogaa haꞌꞌi erays.” Ha michiyaa ba qofay bala gidiyoogaa guyyeppe akeekada, keehi koshshiya issi issiban laamettidoogee ufayssiyaaba. A ubba kumetta wode aqinye gidada oottiyoogaa doommaasu.
NEENI LAꞌA GIDANAADAN GEESHSHA AYYAANAY MAADDEES
13. Nuuni aylletettaappe kiyanaadan Xoossaa ayyaanay maaddiyoy ayba ogiyaanee?
13 Naaꞌꞌantto Qoronttoosa 3:17y, “Godaa Ayyaanai de7iyoosan ailletetti baawa” yaagees. Geeshsha ayyaanay nuuni aylletettaappe kiyanaadan maaddiyoy ayba ogiyaanee? Geeshsha ayyaanay laꞌatettau keehippe koshshiya, “siiquwaa, ufaissaa, sarotettaa, danddayaa, kehatettaa, lo77otettaa, ammanuwaa, ashkketettaa, ba huuphiyaa naagiyoogaa” mala eeshshati nuuyyo deꞌanaadan maaddees. (Gal. 5:22, 23) Hegaa mala eeshshati, ubba qassi siiqoy baynnan asay tumuppe laꞌa gidana danddayeenna; ha wodiyan alamiyan deꞌiya hanotay hegaa bessees. Kiitettida PHauloosi ayyaanaa ayfiyaa yooti simmidi, “Hageeta milatiyaageeta diggiya higgee baawa” yaagiis. He qofay woygiyoogee? Xoossaa ayyaanay issi ura bolli ba ayfiyaa ayfennaadan teqqiya higgee baawa. (Gal. 5:18) Woni hegaa mala higgee aybissi koshshii? Yihooway nuuyyo Kiristtoosaagaa mala eeshshay ubbatoo gujji gujji baanaadaaninne merinau he eeshshay nuussi deꞌanaadan koyees.
14. Alamiyaa ayyaanau haarettiyaageeti aylle gidiyoy ayba ogiyaanee?
14 Alamiyaa ayyaanau haarettiyaanne bantta ashuwaa amuwaa poliya asati laꞌa gididabadan qoppana danddayoosona. (2 PHeexiroosa 2:18, 19 nabbaba.) SHin eti aylletettan deꞌiyoogaa erokkona. He asatu iita amoynne iita eeshshay gattiyo qohuwaa teqqanau keehi daro higgiyaa kessana koshshees. PHauloosi, “Higgee lo77o asau merettibeenna. SHin higgiyaa menttiyaageetuyyo, azazettennaageetuyyo, . . . kiyiis” yaagiis. (1 Xim. 1:9, 10) Eti meqetti baynna goda gidida bantta ‘asatettay koyiyoobaa’ oottiyo gishshau, nagaraa aylle. (Efi. 2:1-3) He asati xaaruwan deꞌiya eessan gelida cunccalliyaa mala. Eti bantta amuwaa alanau koyiiddi piriyan geloosona.—Yaaq. 1:14, 15.
KIRISTTAANE GUBAAꞌEE LAꞌA KESSEES
15, 16. Nuuni gubaaꞌiyaa biyoogaa doommoosappe ay goꞌꞌa demmidoo, qassi gubaaꞌiyan demmido laꞌatettay aybee?
15 Neeni Kiristtaane gubaaꞌiyaa biyoogaa doommiyo wode, issi maabaran geladasa giyoogaa gidenna. Neeni gubaaꞌiyaa yiidoy Yihooway nena ehiido gishshataassa. (Yoh. 6:44) Hegau a denttettiday aybee? Neeni Xoossau yayyiya, xillo asa gidiyoogaa beꞌido gishshataassee? “Akkay!” gaana danddayaasa. Yaatin Xoossay nenan ay beꞌidee? Neeni a higgiyau azazettanaunne a kaaletuwaa kaallanau koyiyoogaa beꞌiis. Neeni gubaaꞌiyaa biyoogaa doommoosappe Yihooway nena ba Qaalaa tamaarissiyoogan neeyyo koshshiyaabaa kunttiis. I nena worddo haymaanootiyaa timirttiyaanne mala ammanuwaa aylletettaappe kessidi, Kiristtoosa malatana danddayiyo ogiyaa tamaarissiis. (Efisoona 4:22-24 nabbaba.) Hegaappe denddidaagan, neeni alamiyan eta xallay tumuppe ‘laꞌa gidida asaappe’ issuwaa gidiyo maataa demmadasa.—Yaaq. 2:12, NW.
16 Ane hagaa qoppa: Yihoowa bantta kumetta wozanaappe siiqiya asaa giddon deꞌaydda yayyay? Neeni Kawotettaa Addaraashan ishatuuranne michotuura haasayiyo wode asi tabaa wuuqqana gaada hirggay? Mule hirggakka woykko yayyakka! Neeni he sohuwan laꞌatettan woppu gaada deꞌaasa. Neeni harasan hegaadan hanuutii? Hegaadan hanakka! Hegaa bollikka, Xoossaa asaa giddon neeni haꞌꞌi laꞌatettan deꞌiyoogee sinttappe demmana laꞌatettau xeera beso.
“XOOSSAA NAATI AILLETETTAAPPE KIYIDO BONCHCHO KESSAA”
17. Asaa naati aylletettaappe kiyiyoogee ‘Xoossaa naati qoncciyoogaara’ gayttidoy ayba ogiyaanee?
17 Yihooway saꞌan baayyo oottiyaageetussi immana laꞌatettaabaa PHauloosi, “Xoossai medhdhido mereta ubbai Xoossaa naati qonccanaagaa daro laamoti uttiis” yaagiis. I gujjidikka, “Mereta ubbai ba huuphen bashshaa ailletettaappe issi gallassi kiyana; qassi he meretati Xoossaa naati ailletettaappe kiyido bonchcho kessaa shaakkana” yaagiis. (Roo. 8:19-21) “Meretai” geetettidaageeti, ayyaanan tiyettida, Xoossaa naati ‘qoncciyoogan’ goꞌettana, saꞌan deꞌanau hidootiya asaa. He qonccettay doommiyoy, Xoossaa “naati” ayyaana mereta gididi hayquwaappe denddidi, kiristtoosaara ha saꞌaappe iitatettaa xayssiyoonne “zawai bainna daro asaa” ooratta alamiyaa gelissiyo wodiyaana.—Ajj. 7:9, 14.
18. Azazettiya asaa naatu laꞌatettay gujji gujji biyoy ayba ogiyaanee, qassi eti wurssettan shaakkana laꞌatettay awugee?
18 Wozettida asaa naati he wode dumma laꞌatettan deꞌana; giishin Seexaanaanne daydanttatu qohuwaappe laꞌa gidana. (Ajj. 20:1-3) Hegee keehippe woppissiyaaba! Kiristtoosaara issippe kawonne qeese gidiya 144,000ti, he wodeppe doommidi, asaa naati Addaameppe laattido nagaraappenne polotettaa pacaappe laꞌa gidana gakkanaashin wozuwaa yarshshuwan goꞌettanaadan maaddana. (Ajj. 5:9, 10) Asaa naati paacee gakkishinkka ammanettidaageeta gididoogaappe denddidaagan, Yihooway koyro etayyo halchido polo laꞌatettaa, giishin “Xoossaa naati ailletettaappe kiyido bonchcho kessaa shaakkana.” Ane hagaa qoppa! Hegaappe simmin, Xoossay suure giyoobaa oottanau metootakka. Ne asatettay, ne wozanaynne qofay polo gidana; qassi polo hanotan Xoossaagaa mala eeshshaa qonccissana danddayaasa.
19. Ha wodiyan nuuni tumu laꞌatettaa ogiyaappe kiyennaadan ubbatoo ay oottana bessii?
19 Neeni “Xoossaa naati ailletettaappe kiyido bonchcho kessaa” shaakkanau amottay? Amottiyaaba gidikko, “ailletettaappe kessiya bali bainna” higgee ne qofaanne ne wozanaa laammanaadan paqqada. Ee, Geeshsha Maxaafaa minna xannaꞌa. Tumaa ogiyan deꞌa. Geeshsha ayyaanaa demmanau woossa. Kiristtaane gubaaꞌiyaaninne Yihooway giigissiyo ayyaana quman kumetta hanotan goꞌetta. Seexaanay Hewaano cimmidoogaadan, neeni Xoossaa ogee laꞌatettaa diggees gaada qoppanaadan oottidi cimmanaadan paqqadoppa. Dabloosi keehi cincca gidikkokka, “nuuni a qofaa” eriyo gishshau, xoonettennan aggana danddayoos. Kaalliya huuphe yohoy hegaa qonccissees.—2 Qor. 2:11.
[Sinttaa 14n deꞌiya misiliyaa qonccissuwaa]
Taani alamiyaa “laꞌatettaappe” amaridaagaa haꞌꞌikka amottiyaanaa?
[Sinttaa 14n deꞌiya misiliyaa qonccissuwaa]
Taani tumaa ogiyan deꞌiyaanaa?