Yesuusa Denddoy Deꞌuwaa Demissees!

YESUUSA denddoy ha wodiyan nuna goꞌꞌenna, coo beni wode hanidaba xalla gidenna. Kiitettida PHauloosi hagaadan giidi xaafido wode, hegee keehi koshshiyaaba gidiyoogaa qonccissiis: “Kiristtoosi haiqqidaageetu dendduwaassi baira gididi, haiquwaappe denddidoogee tuma. Aissi giikko, haiqoi issi asa baggaara ha sa7aa yiidoogaadan, haiqqidaageetu denddoikka qassi issi asa baggaara yiis. Aissi giikko, asai ubbai Addaameera dabbotido gishshau haiqqidoogaadan, Kiristtoosaara dabbotido gishshau, ubbai de7uwaassi denddana.”—1 Qoronttoosa 15:20-22.

Yesuusi Niisaana 16, 33 M.Ln, Ayhudati bayra ayfida kattaa Yerusalaamen deꞌiya Xoossaa Yihoowa beetamaqidasiyaa ehiyo gallassan hayquwaappe denddiis. PHauloosi Yesuusa bayra yaagiyoogan hayquwaappe denddana harati deꞌiyoogaa akeekissiis.

PHauloosi kaallidi giidobay Yesuusa dendduwan demmiyo goꞌꞌaa qonccissees. I, “Haiqoi issi asa baggaara ha sa7aa yiidoogaadan, haiqqidaageetu denddoikka qassi issi asa baggaara yiis” yaagiis. Nuuni ubbay Addaameppe nagaraa laattido gishshau hayqqoos. Gidikkokka, Yesuusi ba polo deꞌuwaa yarshshidi, dendduwaa baggaara asaa naati nagaraanne hayquwaa aylletettaappe naxa kiyanaadan hanotaa injjeyiis. PHauloosi Roome 6:23n, “Nagarai qanxxiyo miishshai haiquwaa. SHin Xoossai nu Godaa Kiristtoos Yesuusa baggaara immiyo imoi merinaa de7uwaa” yaagidi hegaa loꞌꞌo hanotan qonccissiis.

Yesuusikka ba hayqoynne denddoy nuna goꞌꞌiyoogaa qonccissiis. I babaa hagaadan giis: “Tana ammanida ubbai merinaa de7uwaa ekkana mala, taani Asa Na7ai kaqettanau bessees. Xoossaa Na7aa ammaniya ubbai merinaa de7uwaa ekkanaappe attin, xayenna mala, Xoossai ha sa7aa keehi siiqido gishshau, ba mexi issi Na7aa immiis.”—Yohaannisa 3:14-16.

Sahoy, waayee woy kayyoy baynnan merinau deꞌanaagaa qoppa! (Ajjuutaa 21:3, 4) Hegee ayba ufayssiya hidootee! Issi eranchay, “Duufoy deꞌoy qantta gidiyoogaa, qassi denddoy hayqoy matan xayanaagaa hassayissees” yaagidi hegaa qonccissiis. Ee, Yesuusa denddoy merinaa deꞌuwaa demissees!