Bolla Gididi Heemmiyaagaa Yara Gididi Mati Sunttettidaagaa

Oruwaa gallassi maallado, Masqqala 5, 2012n, Yihoowa Markkata Bolla Gididi Heemmiyaagaa yara gididi issi ishay mati sunttettidoogee Amarkkaaninne Kanaadan deꞌiya Beeteele so asau odettiis. Mark Sanderseni Masqqala 1, 2012ppe doommidi he aawatettaa ekkidi oottees.

Ishaa Sandersena Amarkkan Kaliforniyaa giyoosan deꞌiya San Diyego kataman Kiristtaane aawaynne aayyiyaa dichidosona; yaatin, i Usuppune 9, 1975n xammaqettiis. I Masqqala 1, 1983n Kanaada biittan Saskachiwaane giyo heeran aqinye gididi oottiyoogaa doommiis. I Gubaaꞌiyan Oottiyaageeti Loohiyo Timirtte Keettan (ha wodiyan Machibeenna Ishati Loohiyo Timirtte Keettaa geetettiyaagan) Amarkkan laappuntta kayan tamaaridi, Tisaase 1990n anjjettiis. Ishaa Sanderseni Hosppune 1991n, Kanaadan, Niwufawundlandde haruuruwan dumma aqinye gididi oottanaadan maddabettiis. I woradaa xomoosiyaagaa sohuwan maddabettidi haggaazi simmidi, Kanaada Beeteele keettaa asaa yara gidanaadan Usuppune 1997n shoobettiis. Hidaare 2000n, i Amarkka macara biiruwaa biidi, yan koyro Hosppitaaliyaara Gayttidabaa Erissiya Kifiliyan, guyyeppe qassi Haggaazo Kifiliyan oottiis.

Ishaa Sanderseni Masqqala 2008n Macara Biiruwaa Konttiyaa Yaratuyyo Giigida Timirtte Keettan tamaariis; hegaappe simmin, Pilippinsse biittaa Macara Biiruwaa Konttiyaa yara gididi sunttettiis. Masqqala 2010n, i simmidi Amarkka baanaadan shoobettidi, yan Bolla Gididi Heemmiyaagaa Haggaazo Konttiyaa maaddiyaagaa gididi oottiis.