Bolla Gididi Heemmiyaagaa Ooratta Yaraa

ORUWAA galla maallado, Ichchashe 24, 2018n, Amarkkaanne Kanaada Beeteele keettaa asay ha dumma erissuwaa siyidi ufayttiis: Ishaa Kenet Kuk, Jr., Yihoowa Markkata Bolla Gididi Heemmiyaagan gujettiis.

Ishaa Kuki Amarkkan, tohossa bagga Penssilveeniyawu gidduwan yelettidi yan dicciis. I naaꞌꞌantto xekka timirttiyaa wurssanaappe kase, banaara tamaariya urappe tumaa siyidi Tamme 7, 1980n xammaqettiis. I Masqqala 1, 1982n aqinye gididi ubba wode haggaazuwaa doommiis. I aqinye gididi naaꞌꞌu layttaa haggaazi simmidi, Beeteele shoobettidi, Niwu Yorken, Wolkilen, Xiqimita 12, 1984n Beeteele haggaazuwaa doommiis.

Ishaa Kuki hegaappe simmin 25 layttawu xuufiyaa attamiyo kifiliyaaninne Beeteele keettaa kifiliyan dumma dumma oosuwaa oottiis. I 1996n ba machchiyo Jemo ekkin, akka aara issippe Wolkilen, Beeteelen oottiyoogaa doommaasu. Tisaase 2009n, Ishaa Kukinne Michchiyaa Kuka Niwu Yorken, Patersenen deꞌiya Wachtawer Timirtte Kifiliyan maddabettidosona; yan Ishaa Kuki Dabddaabbiyaa Xaafiyo Kifiliyan oottanaadan maddabettiis. Ishaa Kukinne Michciyaa Kuka guutta wodiyawu zaarettidi Wolkilen ootti simmidi, Hosppune 2016n, Niwu Yorke, Brukiliine biidosona. Ichchashu aginappe guyyiyan, eti Niwu Yorken, Wariwiken deꞌiya waanna biiruwaa biidosona. Ichchashe 2017n, Ishaa Kuki Bolla Gididi Heemmiyaagaa Xuufe Kifiliyan maaddiyaagaa gididi oottanaadan sunttettiis.