Bantta Dosan Eeno Giidosona Pilippinssen

TAMMA gidiya layttappe kase, Gregoriyoynne a machiyaa Maarilu Manila giyo kataman aqinye gididi haggaaziiddi kumetta wodiyaa hara oosuwaa oottoosona; he wode etau layttay 40 gidibeenna. Hegee keehi deexiyaaba gidikkonne, eti loytti haggaazidosona. Hegaappe simmin, Maarilu ba oottiyo bankke keettan alaafe gidaasu. A, “Nuuni oottiyo loꞌꞌo oosoy keehi ishalidi deꞌanaadan oottiis” yaagaasu. Eti ubba miishshaa loytti demmiyo gishshau, Manila katamaappe arshsho baggan 19 kilo meetire gidiyaagaa haakkidi deꞌiya keehi loꞌꞌo sohuwan keettaa keexxanau halchidosona. Keettaa keexxi simmin aginan aginan qanxxidi tammu layttan miishshaa zaaranau issi dirijjitiyau qaalaa gelidosona.

“TAANI YIHOOWABAA WOTTA EKKIDABADAN QOPPAAS”

Maarilu, “Ta ooratta oosoy daro wodiyaanne wolqqaa wurssiyo gishshau, ayyaanaabaa oosuwaa oottanau kaseegaadan mishettikke. Taani Yihoowabaa wotta ekkidabadan qoppaas” yaagaasu. A hegaa qonccissaydda, “Taani Yihoowau haggaazanau bazzido wodiyaa ayyo immana danddayabeykke” yaagaasu. Gregoriyoynne Maarilu he hanotan ufayttibeenna gishshau, issi gallassi uttidi eti deꞌiyo deꞌuwaabaa haasayidosona. Gregoriyoy hagaadan giis: “Nuuni issi issibaa laammanau koyida; shin ay oottanaakko eribookko. Nuuni naꞌa yelibeenna gishshau, Yihoowau loyttidi haggaazanau nu deꞌuwaa waatidi goꞌettana danddayiyaakko tobbida. Kaaletuwaa demmanau Yihoowakko woossida.”

He wode, Kawotettaabaa aassiyaageeti keehi koshshiyo sohuwaa biidi haggaaziyoogaa xeelliyaagan eti daro haasayaa siyidosona. Gregoriyoy, “Ha haasayata nuuni Yihoowakko woossido woosaa zaarodan qoppida” yaagiis. Eti xalidi suurebaa kuuyanau banttau ammanuwaa gujjanaadan Yihoowakko woossidosona. Issi wolqqaama xube gididabay eti keexissiyo keettaa. Eti heezzu layttaa miishshaa qanxxi uttidosona. Eti waataneeshsha? Maarilu, “Nuuni qaalaa gelidobaa polana xayikko, qanxxido miishsha ubbaa kasaaroos; qassi hegee keehi daro. SHin, nuuni hegaa Yihoowa sheniyaa kaseyiyoogaappenne nuuni koyiyoobaa kaseyiyoogaappe issuwaa dooriyoobadan qoppida” yaagaasu. Eti kiitettida PHauloosi ‘yeggi bayiyoogaa’ xeelliyaagan yootidobaa hassayidi, keettaa keexissiyoogaanne bantta oosuwaa aggiigidosona, bantta aquwaappe daruwaa bayzzidosona; yaatidi, Palawan giyo haruuruwan Manilappe tohossa baggan 480 gidiya kilo meetiriyaa haakkidi deꞌiya heeri biidosona.—Pili. 3:8, 9.

MAADDIYAABAA ‘TAMAARIDOSONA’

Gregoriyoynne Maarilu yaa baanaappe kase ishalo gidenna deꞌuwaa deꞌanau giigettidosona; shin eti bantta ooratta deꞌoy kaseegaappe ay keena dummatanaakko yaa gakkidi akeekidosona. Maarilu, “Hegee keehi daganttiyaaba. Yan korinttee baa, qassi deꞌuwaa injjeyiyaabikka baawa” yaagaasu. A gita kataman demmiyoobaa yan demmenna gishshau azzanaasu. Gidikkokka, eti yaa ayssi biidaakko ubbatoo hassayoosona; qassi sohuwaara meezetidosona. Maarilu hagaadan gaasu: “Qamman wagaggidi pooꞌiya xoolintteta gujjin, loꞌꞌiya meretaa hagan beꞌiyoogee tana ufayssees. Ubbaappe aaruwan, nuuni asau sabbakiyo wode eti ufayttiyoogaa beꞌiyoogee ufayssiyaaba. Hagan haggaaziyoogan, nuuyyo deꞌiyaaban waanidi ufayttidi deꞌanaakko maaddiyaabaa ‘tamaarida.’”—Pili. 4:12.

Gregoriyoy, “Nuuni hagau yiido wode, oyddu Yihoowa Markkatu xallay deꞌoosona. Taani saaminttan saaminttan dere haasayaa shiishshiyoogaanne Kawotettaa mazamuriyaa yexxiyoode ta gitaariyaa kaaꞌiyoogaa doommido wode, eti keehi ufayttidosona” yaagiis. Eti issi layttaa giddon he guutta citay diccidi 24 aassiyaageeti deꞌiyo gubaaꞌe gidiyoogaa beꞌidosona. Gregoriyoy, “He gubaaꞌee nuna siiqiyoogee nuna keehi ufayssees” yaagiis. Eti yan usuppun layttappe dariya wodiyau haggaazidoogaa qoppidi hagaadan giidosona: “Ooratta asay daroy gubaaꞌiyaa yara gidiyoogaa beꞌiyoogaa keena ufayssiyaabi baawa. Nu deꞌuwan awudeegaappenne aaruwan haꞌꞌi ufayttoos.”

“YIHOOWAY LOꞌꞌO GIDIYOOGAA ‘XEELLA BEꞌAAS’!”

Pilippinsse biittan 3,000 gidiya ishanttinne michontti Kawotettaabaa aassiyaageeti keehi koshshiyo sohuwaa biidi haggaazoosona. Etappe 500 gidiyaageeti azinaa gelibeenna michota. Kereni leemisuwaa ane qoppa.

Layttay 25 heera gidido Kerena Kagayan giyoosan, Bagau giyo kataman diccaasu. A naatettan deꞌiyo wodekka, ubbatoo kaseegaappe loyttada haggaazanau qoppausu. A, “Taani wodee wuridoogaanne ubba asay Kawotettaa mishiraachuwaa siyana bessiyoogaa eriyo gishshau, sabbakiyaageeti keehi koshshiyo sohuwaa baada haggaazanau koyaas” yaagaasu. Eta soo asaappe amaridaageeti a sabbakanau haahosaa biyoogaa aggada xoqqa timirttiyaa tamaaranaadan zorikkonne, Kerena kaaletuwaa demmanau Yihoowakko woossaasu. Haahosaa biidi haggaaziyaageetuurakka tobbaasu. Layttay 18 gidiyo wode, a ba diccido katamaappe 64 gidiya kilo meetiriyaa haakkidi deꞌiya gaxariyaa baasu.

Kerena maaddanau biido guutta gubaaꞌiyaa moottay Pasifikke Abbaa Xanxxan deꞌiya deretiya heeraa. Kerena, “Bagauppe he ooratta gubaaꞌiyaa baanau deriyaa kiyiiddi, deriyaappe wodhiiddi, qassi 30tooppe dariyaagaa shaafaa pinnidi heezzu gallassaa hemettida” yaagaasu. A gujjadakka, “Taani Geeshsha Maxaafaa xannaꞌissiyo issotu issotu soo baanau usuppun saate hemettays, qassi yan aqada wonttetta gallassi ta soo simmanau usuppun saatiyaa hemettays” yaagaasu. Hegaa keeni daafuriyoogee bessiyaabee? Kerena moocu gaydda, “Issi issitoo ta gedee arggaacees; shin, 18 asaa Geeshsha Maxaafaa xannaꞌissaas. Yihooway loꞌꞌo gidiyoogaa ‘xeella beꞌaas’!” yaagaasu.—Maz. 34:8.

“YIHOOWAN AMMANETTIYOOGAA TAMAARAAS!”

Layttay 42 heera gidido, Amarkkan deꞌiya Suki giyo azina gelabeenna michiyaa Pilippinsse biittan deꞌanau baanaadan denttettiday aybee? A 2011n issi azinaynne a machiyaa oyshettido woradaa shiiquwaa shiiqaasu. Eti Mekisiiko biitti biidi mishiraachuwaa sabbakiyoogan maaddanau bantta aquwaappe darobaa waati bayzzidaakko yootidosona. Suki, “He oyshay taani kase qoppabeenna halchuwaabaa qoppanaadan oottiis” yaagaasu. I sheeshshay Hindde biittaa asa gidido Suki Pilippinssen deꞌiya Punjabi giyo qaalaa haasayiya asau keehippe maadoy koshshiyoogaa siyido wode, yaa baada eta maaddanau qofaa qachaasu. O metiyaabay gakkidee?

Suki hagaadan gaasu: “Awugaa bayzzada awugaa agganaakko qofaa qachiyoogee taani qoppidoogaappe deexxiyaaba. Qassi, 13 layttau ta keettan ishaluwan deꞌa simmada, guutta wodiyau ishalo deꞌuwaa deꞌiyoogaa aggada nu soo asaara deꞌanau baas. Hegee metiyaaba gidikkonne, taani ishalo gidenna deꞌuwaa deꞌanau giigettanaadan maaddiis.” Pilippinsse ba simmin bana gakkida metuwaa a hagaadan gaasu: “Tana keehi waayissiday isuwaanne kasttole malabau yayyiyoogaanne so asaa laamotaa. Taani awudeegaappenne aaruwan Yihoowan ammanettiyoogaa tamaaraas!” Hegee anjjo demisssidee? Suki pashkki gaada hagaadan gaasu: “Yihooway nuna ‘Taani saluwaa maskkootiyaa dooyada anjjuwaa intteyyo palahissada gussana xayikko, tana hegan paaccite’ yaagees. Taani haasayissiyo uri, ‘Haroode awude yuutii? Taani nena oychana daro oyshay deꞌees’ giyo wode, hegee tuma gidiyoogaa akeekays. Tumaa eranau koyiyaageeta maaddiyoogee tana keehi ufayssees!” (Mil. 3:10) Suki gujjada, “Keehi deexxidabay hagau yaada deꞌanau qofaa qachiyoogaa. Taani ya simmin, Yihooway tau koshshiya ubbabaa waati kunttiyaakko beꞌiyoogee maalaalissiyaaba” yaagaasu.

‘YAYYIYOOGAA AGGAAS’

Haꞌꞌi layttay 40 gidana matido Saymi Giddo Arshsho biittan daro miishshaa demissiya oosuwaa oottanau Pilippinsse biittaappe biis. Saymi yan deꞌishin woradaa xomoosiya ishay yootidobaynne Bolla Gididi Heemmiyaagaa yara gidida ishay shiishshido haasayay a minttettiis; hegee i ba deꞌuwan Yihoowa kaseyanaadan denttettiis. Saymi, “SHin oosuwaa agganau qoppiyoogee taani unꞌꞌettanaadan oottiis” yaagiis. Gidikkonne, i ba oosuwaa aggidi, guyye Pilippinsse biitti biis. Ha wodiyan, Sayminne a machiyaa Hayda he biittan tohossa bagga aaho moottan deꞌiya asau Kawotettaa mishiraachuwaa yootanau, sabbakiyaageeti keehi koshshiyo Davau del Siyur giyo sohuwan haggaazoosona. Saymi, “Taani kasebaa qoppiyo wode, oosuwaa agganau yayyiyoogaa aggada a kaseyanaadan maaddido gishshau, Yihoowa keehi galatays. Issi uri bau deꞌiyaabaappe keehi loꞌꞌuwaa Yihoowau immiyoogaappe aaruwan a ufayssiyaabi baawa!” yaagiis.

“HEGEE NUNA KEEHI UFAYSSEES!”

Aqinye gididi haggaaziya layttay 32 heera gidido, Ramiloynne a machiyaa Juliyeeta bantta sooppe 30 kilo meetire gidiyaagaa haakkidi deꞌiya gubaaꞌiyau maadoy koshshiyoogaa siyido wode, maaddanau eeno giidosona. Yaatiyo gishshau, Ramiloynne Juliyeeta sabbakanaunne gubaaꞌe shiiquwan uttanau boniyan balgguwan aggennan saaminttan saaminttan motoriyan darotoo yaa boosona. Geli kessa ogiyaara biyoogeenne kaqettida zarphiyaa pinniyoogee waayissiyaaba gidikkonne, eti bantta haggaazuwaa aassido gishshau ufayttoosona. Ramiloy, “Taaninne ta machiyaa 11 asaa Geeshsha Maxaafaa xannaꞌissoos! Sabbakiyaageeti keehi koshshiyo sohuwan haggaaziyoogee issi issibaa aggibayanaadan oottikkonne, hegee nuna keehi ufayssees!” yaagiis.—1 Qor. 15:58.

Ne biittan woy kare biittan Kawotettaabaa aassiyaageeti keehi koshshiyo sohuwaa biidi haggaaziyoogaa xeelliyaagan gujjada erana koyay? Yaanikko, woradaa xomoosiya ishau yoota; qassi Naase 2011 Nu Kawotetta Haggaazuwan deꞌiya, “‘Maqidooniyaa’ Baana Danddayay?” giya huuphe yohuwaa xeella.