Bantta Dosan Eeno Giidosona

AASSIYAAGEETI keehi koshshiyo biittan mishettidi haggaaziya Yihoowa Markkatu giddon azina gelibeenna daro michoti deꞌoosona. Etappe amaridaageeti hara biittan daro layttawu haggaazidosona. Eti daro layttappe kase kare biitti baanaadan maaddidabay aybee? Hara biittan haggaaziyoogan eti ay tamaaridonaa? Guyyeppe eta deꞌoy waanidee? Loꞌꞌo meezee deꞌiyo he michonttuppe amaridaageeta oychida. Neeni keehi ufayssiya haggaazuwaa haggaazanawu wozanappe koyiya gelabeenna micho gidikko, eti yootidobay nena maaddanaagaa ammanettoos. Xoossaa asay ubbaykka eta leemisuwaa beꞌiyoogan goꞌettana danddayees.

SIRIYAA AGGIYOOGAA

Aqo oyqqennan aqinye gidada hara biittan ufayssan haggaazanawu taappe koyettiyaabaa kunttidanaashsha, gaada qoppa eray? Haꞌꞌi iyyo layttay 75 gidido Anita bawu eri deꞌiyoogaa keehi siraasu. A Inggilize biittan diccaasu; qassi yan aqinye gidiyo wode iyyo layttay 18. A hagaadan gaasu: “Taani asaa Yihoowabaa tamaarissiyoogaa dosays, shin hara biittan haggaazana danddayays gaada mule qoppabeykke. Taani hara biittaa qaalaa mule xannaꞌa erikke, qassi awugaanne danddayikke gaada qoppaas. Hegaa gishshawu, Giiliyaade Timirtte Keettan tamaaranaadan tana shoobbin keehi dagammaas. Ta mala pattenna uri hegaa mala shoobe shoobettidoogee tana keehi maalaaliis. SHin, ‘Yihooway danddayawusu giidi qoppikko, ta malana’ gaada qoppaas. Hegee hanoosappe 50⁠ppe dariya layttay aadhiis. He wodeppe doommada taani Jaappaanen misoonaawe gidada haggaazaas.” Anita gujjada hagaadan gaasu: “Issi issitoo ufayssan yelaga naata, ‘Hara biittan haggaaziyoogan taagaadan keehi ufayttite!’ yaagays. Etappe daroti hegaadan oottidoogee tana ufayssees.”

XALIYOOGAA

Kare biittan haggaazida daro michontti koyro hara biitti baanawu hirggidosona. Yaatin eti waanidi xalidonaa?

Haꞌꞌi layttay iyyo 65 heera gidido Moriina, “Taani diccada, harata maaddiya ufayssiya deꞌo deꞌanawu amottaas” yaagaasu. A bawu 20 laytta gidiyo wode, Kanaadan Kubeeke giyo, aqinyeti keehi koshshiyoosaa baasu. A gujjada hagaadan gaasu: “Guyyeppe Giiliyaaden tamaarana mala shoobettaas, shin laggetuppe shaahettada erenna biitti baanawu yayyaas. Qassi sahettiya ta aawaa xeelliya ta aayyiyo aggada biyoogeekka tana qofissiis. Hageeta denttada daro qammi yeekkaydda Yihoowa woossaas. Tana qofissidabaa ta aawawunne aayeessi yootin, shoobiyaa eeno ga ekkanaadan eti tana zoridosona. Qassi gubaaꞌee ta aawaanne aayyiyo siiquwan kaafidoogaa beꞌaas. Yihooway siiquwan maaddiyoogaa beꞌidoogee i tanakka maaddanaagaa taani ammanettanaadan oottiis. He wode taani baanawu giigettaas!” Moriina 1979⁠ppe doommada, 30⁠ppe dariya layttawu misoonaawe gidada Arggo Afirkkan haggaazaasu. Haꞌꞌi Moriina ba aayyiyo xeellaydda Kanaadan dumma aqinye gidada haggaazawusu. A kare biittan haggaazido wodiyaa hassayada, “Yihooway tawu koshshiyo wode ubban koshshiyaabaa kunttiis” yaagawusu.

Haꞌꞌi layttay 65 gidido Wendi giyo michiyaa Awusttiraaliyan aqinye gidada haggaaziyoogaa doommiyo wode yelaga naꞌa. A hagaadan gaasu: “Taani keehi dungguuxa gidiyo gishshawu erenna ura haasayissanawu metootaas. SHin aqinyetettay taani ubba asaa haasayissanaadan loohissido gishshawu, yayyiyoogaa aggaas. Yayyennaagee waanna yoho gidennaagaa guyyeppe akeekaas. Aqinye gididoogee taani Yihoowan zemppanaadan tamaarissido gishshawu, hara biitti baada haggaazanawu qoppiyoogaa doommaas. Qassi Jaappaane biittan 30⁠ppe dariya layttawu haggaazida, aqo oyqqabeenna issi michiyaa heezzu aginawu Jaappaane baada haggaazanaadan tana shoobbaasu. Iira haggaazidoogee taani hara biitti baanawu keehi koyanaadan oottiis.” Wenda 1986n, Awusttiraaliyaappe arshsho baggan 1,770 kilo meetire gidiyaagaa haakkiya Vanatu giyo haruuruwaa baasu.

Wenda haꞌꞌikka Vanatun deꞌawusu; a haꞌꞌi xuufiyaa birshshiyo biiruwan oottawusu. A hagaadan gawusu: “Haaho heeran citatinne gubaaꞌeti eqqiyoogaa beꞌiyoogee tana keehi ufayssees. Ha haruurotun Yihoowa oosuwan guuttabankka maaddidoogee tawu keehi gita maata.”

Haꞌꞌi layttay 65 gidido Kumiko giyo micheeyyo i laggiyaa eti Neppale baanaadan yootaasu; he wode eti naaꞌꞌaykka aqinye gididi Jaappaanen haggaazoosona. Kumika hagaadan gaasu: “A tana zaara zaarada oychin taani eeno gabeykke. Ooratta qaalaa tamaaranaageenne ooratta heeraa meezetanaagee tana qofissiis. Hara biitti baanawu koshshiya miishsha demmanaageekka metiyaaba. Taani qofaa qachanawu baaxetishin, motoriyaa daafan qohettada hosppitaaliyaa gelaas. Yan taani hagaadan qoppaas: ‘Hagaappe simmin tana aybi gakkanaakko ooni erii? Keehi sahettin hara biittan aqinye gidada haggaaziyo qaaday taappe halana danddayees. Issi layttawukkonne hara biittan aqinye gidada haggaazana danddayikkinaa?’ Taani kuuyanaadan Yihooway maaddana mala mintta woossaas.” Kumika hosppitaaliyaappe kiya simmada Neppale biittaa beꞌanawu baasu, qassi guyyeppe anne i aqinye laggiyaa yan deꞌanawu biidosona.

Kumika Neppalen haggaazido tamma gidiya layttaa hassayada hagaadan gaasu: “Zoꞌo Abbay shaahettidoogaadan tana qofissida metoti ta sinttan shaahettibayidosona. Aassiyaageeti keehi koshshiyoosan haggaaziyoogaa doommido gishshawu ufayttays. Taani issi keettaa asawu Geeshsha Maxaafaa qofaa yootiyo wode, darotoo ichashu woy usuppun shooroti siyanawu yoosona. Haray atto guutta naatikka Geeshsha Maxaafaa qofay deꞌiyo trakttiyaa etawu immanaadan tana bonchuwan oychoosona. Asay siyiyo ha sohuwan sabbakiyoogee keehi ufayssiyaaba.”

METUWAN GENCCIYOOGAA

Nuuni oychido mino michontta metoy gakkidoogee garamissiyaaba gidenna. Yaatin eti waatidonaa?

Dayaano giyo Kanaada biittaa michiyaa, “Nu soo asaappe haakkada biidoogee tana koyro keehi wayssiis” yaagaasu. A 20 layttawu Kot Divuwaren misoonaawe gidada haggaazaasu; haꞌꞌi iyyo layttay 62. A hagaadan gaasu: “Taani maddabettido biittaa asaa siiqanaadan Yihooway maaddana mala woossaas. Giiliyaaden tana tamaarissida Ishaa Jak Redfordi nuuni maddabettidosan deꞌiya hanotay, ubba qassi keehi hiyyeesa asaa beꞌiyoogee nuna koyro keehi qofissana, ubba daganttana danddayiyoogaa yootiis. SHin i, ‘Hiyyeesatettaa xeelloppite. Asaa, eta somꞌꞌuwaanne eta ayfiyaa xeellite. Eti Geeshsha Maxaafaa tumaa siyidi haniyoobaa akeekite’ yaagiis. Taani hegaadan oottaas, qassi hegee gita anjjuwaa demissiis! Minttettiya Kawotettaa mishiraachuwaa taani yootiyo wode asay keehi ufayttiyoogaa beꞌays!” Dayaana hara biittan haggaaziyoogaa meezetanaadan maaddida harabay aybee? A hagaadan gaasu: “Taani Geeshsha Maxaafaa xannaꞌissiyoogeetuura keehi matattays; qassi eti Yihoowawu ammanettidi oottiyoogaa beꞌiyo wode keehi ufayttays. Taani maddabettidosay ta soo gidiis. Yesuusi qaalaa gelidoogaadan, ayyaanaaban aayotanne aawata, ishanttanne michontta demmaas.—Mar. 10:29, 30.

Isiyan nu oosoy digettido issi biittan, haꞌꞌi iyyo layttay 46 gidido Ana haggaazawusu. A hagaadan gaasu: “Taani hara biittan dumma dummasan haggaaziyo wode, diccido hanotaaninne eeshshan taappe keehi dummatiya michonttuura deꞌaas. Hegee issi issitoo qofaa balan akeekanaadaaninne lanccanaadan oottiis. Hegaadan haniyo wode, tanaara deꞌiyaageetuura keehi matattanawunne eta wogaa akeekanawu malaas. Hegaa bollikka, eta siiqanawunne etawu qoppanawu baaxetaas. Yaatidoogee ayfiyaa demissido gishshawunne ta maddabettidosan genccanaadan maaddida siiqo laggeta darota demmanaadan oottido gishshawu keehi ufayttays.

Haꞌꞌi iyyo layttay 53 gidido, Jarmane biittaa michiyaa Uta 1993n Madagaskkaaren misoonaawe gida haggaazanawu maddabettaasu. A hagaadan gaasu: “Taani he biittaa qaalaa eranawu, qassi carkkuwaa hanotaa, shekkeeriyaa, ameebaanne hara ulo sahuwaa meezetanawu koyro baaxetaas. SHin daro maaduwaa demmaas. Ya biittaa michoti, eta naatinne taani Geeshsha Maxaafaa xannaꞌissiyoogeeti qaalaa loytta eranaadan tana danddayan maaddidosona. Taani sahettiyo wode, ta misoonaawe laggiyaa siiquwan maaddaasu. SHin Yihooway tana ubbaappe aaruwan maaddiis. Tana hirggissiyaabaa ubbatoo woosan ayyo yootays. Yaatada ta woosaa zaaruwaa issi issitoo daro gallassawu, woy daro aginawu danddayan naagays. Yihooway ubba metuwaa giigissiis.” Uta hanno gakkanawu 23 layttaa Madagaskkaaren haggaazaasu.

ETA DEꞌUWAN ANJJOY KUMIIS

Aassiyaageeti keehi koshshiyoosaa biida haratuugaadan, kare biittan deꞌiya, azina gelibeenna michontti hara biittan haggaaziyoogan bantta deꞌuwan anjjuwaa demmidoogaa yootoosona. Eti demmido anjjuwaappe amaridaagee aybee?

Haꞌꞌi iyyo layttay 73 gidido, Haydii giyo Jarmane biittaa michiyaa 1968⁠ppe doommada Kot Divuwaren misoonaawe gidada haggaazaydda deꞌawusu. A hagaadan gaasu: “Tana ufayssiya aybippenne aadhiyaabay ayyaanaaban ta naati ‘tumaa ogiyan hemettiyoogaa.’ Taani Geeshsha Maxaafaa xannaꞌissidoogeetuppe amaridaageeti haꞌꞌi aqinye woy gubaaꞌe cima. Etappe daroti tana taayee woy immaammee goosona. He cimatuppe issoy, a machiyaanne eta naati tana bantta soo asadan xeelloosona. Yaatiyo gishshawu, Yihooway tawu naꞌaa, naꞌaa machonne naꞌaa naata heezzata immiis.—3 Yoh. 4.

Haꞌꞌi iyyo layttay 72 gidido, Kanaada biittaa michiyaa Karena Arggo Afirkkan 20⁠ppe dariya layttaa haggaazaasu. A hagaadan gaasu: “Misoonaawe deꞌoy taani kaseegaappe aaruwan ta goꞌꞌaa aggabayanaadan, siiqanaadaaninne danddayanaadan tamaarissiis. Qassi daro biittaappe yiidaageetuura issippe oottidoogee taani aassa xeellanaadan maaddiis. Qassi issi issibaa oottiyo dumma dumma ogee deꞌiyoogaa eraas. Hegaa bollikka kumetta saꞌan siiqo laggeti deꞌiyoogee gita anjjo! Nu deꞌoynne nuuni oottiyoosay laamettikkonne, nu haꞌꞌikka lagge.”

Haꞌꞌi 79 laytta asa gidida, Inggilize biittaa michiyaa Marggareeta misoonaawe gidada Laꞌoosen haggaazaasu. A hagaadan gaasu: “Kare biittan haggaaziyoogee Yihooway ubba qommo asaa, ubba zariyaappe ba dirijjitiyawu waati shiishshiyaakko ta ayfiyan beꞌanaadan maaddiis. Hegaa beꞌiyoogee ta ammanuwaa keehi minttiis. Hegee Yihooway ba dirijjitiyaa kaalettiyoogaanne a halchoy polettiyoogaa taani muleera ammanettanaadan oottees.”

Hara biittan haggaaziya, azina gelibeenna michontti tumukka Kiristtaanetu oosuwan gitabaa oottidosona. Eta wozanappe galatiyoogee bessiyaaba. (Daan. 11:40) Hegaa bolli, eta qooday gujjiiddi deꞌees. (Maz. 68:11) Ha huuphe yohuwawu eta oychido mishetti oottiya michonttu leemisuwaa kaallanawu, koshshiyaabaa giigissana danddayay? Yaatikko, neeni Yihooway ‘keha gidiyoogaa xeella beꞌanaagee’ erettidaba.—Maz. 34:8.