“Maqidooniyaa” Baana Danddayay?
1. PHauloosinne a laggeti Maqidooniyaa baanaadan oottiday aybee?
1 Kiitettida PHauloosi 49 M.L. heeran, ba naaꞌꞌantto misoonaawe hemetau Sooriyaa Anxxookiyaappe biis. I Efisoonanne Qeeri Isiyan deꞌiya hara katamata baanau qoppiis. SHin, ayyaanaa kaaletuwan i hegaa aggidi, ‘Maqidooniyaa pinnanaadan’ shoobettiis. Inne a laggeti he shoobiyaa ufaytti ekkidi, he heeran koyro gubaaꞌiyaa essiyo maataa demmidosona. (Oos. 16:9, 10; 17:1, 2, 4) Ha wodiyan, alame yuushuwan issi issi heeran cakkiya oosanchati keehippe koshshoosona. (Maa. 9:37, 38) Neeni hegan maaddana danddayay?
2. Mishiraachuwaa yootiyaageeti keehi koshshiyo heeri baanau issoti issoti qoppennay aybissee?
2 Neeyyookka PHauloosaagaadan misoonaawetuugaa mala koshshay deꞌana danddayees; shin hara biitti baanau wozanappe qoppennan aggana danddayaasa. Leemisuwau, neeni layttan sugido gishshau, neeni gelabeennaaro gidiyo gishshau woy neeyyo guutta naati deꞌiyo gishshau, Giiliyaade timirtte keettan loohana danddayabaakka. Woykko hara qaalaa tamaarana danddayennabadan qoppiyo gishshau, hara biitti baanau qoppennan aggana danddayaasa. Woy qassi ikkonoomiyaa metuwan haꞌꞌi neeni deꞌiyo biitti baada betedan deꞌiyo gishshau, harasaa baanau mammottana danddayaasa. Gidikkokka, woosan qoppa simmada, hegaa mala hanotati mishiraachuwaa yootiyaageeti keehi koshshiyo heeri beennaadan nena diggana danddayennaagaa akeekana danddayaasa.
3. Mishiraachuwaa yootiyaageeti keehi koshshiyo heeran sabbakiyoogan murutana mala misoonaawe gidanau loohiyoogee koshshiya gida gidennay aybissee?
3 Dumma Gidida Loohissuwaa Koshshii? PHauloosinne a laggeti murutanaadan oottiday aybee? Eti Yihoowaaninne a geeshsha ayyaanan ammanettidosona. (2 Qor. 3:1-5) Yaatiyo gishshau, dumma loohisso demmanau ne hanotay paqqadennaba gidikkonne, mishiraachuwaa yootiyaageeti keehi koshshiyo heeran sabbakiyoogan murutana danddayaasa. Tiꞌokiraase Haggaazo Timirtte Keettaaninne Haggaazo SHiiquwan neeni ubbatoo loohiyoogaa hassaya; hegee awun haggaaziyaaba gidikkonne nena goꞌꞌiyaaba.
4. Cimidaageeti sabbakanau hara biitti baana danddayennabadan qoppana koshshennay aybissee?
4 Cimidaageeta: Loꞌꞌo payyatettay deꞌiyo, ayyaanaaban kaymida cima asati, aassiyaageeti keehi koshshiyo biittan daroppe maaddana danddayoosona. Neeni oosuwaappe xurataa kiyadii? Xurataa miishshaa guuttaa demmiyaageetikka payyatettaa naaganau kessiyo miishshaa gujjin, koshshiyaabau kessiyo miishshay bantta biittaagaappe keehi guutta gidido, dicciiddi deꞌiya biittatun loꞌꞌo deꞌo deꞌana danddayoosona.
5. Hara biitti biida, xurataa kiyida ishaa temokruwaa yoota.
5 Gubaaꞌe cimanne aqinye gidida, xurataa kiyida issi ishay Inggilizettuwaa haasayiya biittappe, Arshshokko baqqida Tohossa bagga Isiyan deꞌiya, uddufun aassiyaageeti deꞌiyo citaa maaddanau biis. He citay he heeran deꞌiya, kare biittappe yiida, Inggilizettuwaa haasayiya 30,000 asatussi sabbakees. Naaꞌꞌu laytta giddon 50 asay shiiquwan beettiyoogaa doommiis. Ishay hagaadan giidi xaafiis: “Ha sohuwaa yiidoogee taani hanno gakkanau demma erenna, keehi gita anjjuwaa demmanaadan oottiis. Hegeetuppe qii guuttaakkonne yootanau gidiya wodee tau baawa!”
6. Aassiyaageeti keehi koshshiyo biitti biida gelabeenna michee temokruwaa yoota.
6 Gelibeenna Michota: Aaassiyaageeti keehi koshshiyo biittan mishiraachuwaa aassanau Yihooway michotun goꞌettidi gitabaa oottiis. (Maz. 68:11) Gelabeenna issi yelaga michiyaa hara biittan ba haggaazuwaa aassanau halchaasu; shin i aawaynne aayyiyaa i payyatettau keehi hirggidosona. Yaatiyo gishshau, polotikaaninne Ikkonoomiyan yaaqi yaaqenna biittaa dooraasu; yaatada he biittaa macara biiruwau xaafin, eti iyyo loꞌꞌo qofaa yootidosona. A he biittan deꞌido usuppun layttan daro anjjuwaa demmaasu. Hagaadan gaasu: “Ta biittan gidiyaakko tau deꞌana Geeshsha Maxaafaa xinaateti guutta. SHin aassiyaageeti keehi koshshiyo biittan haggaaziyoogee taayyo daro xinaateti deꞌanaadaaninne taani tamaarissiyo eraa gujjanaadan maaddiis.”
7. Mishiraachuwaa aassiyaageeti keehi koshshiyo biitti biida so asaa temokruwaa yoota.
7 So Asay: Neessi naati deꞌiyaaba gidikko, hegee neeni mishiraachuwaa aassanau hara biitti beennaadan diggana bessii? Layttay hosppunanne tamma gidido naaꞌꞌu naati deꞌiyo, issi keettaa asay hegaa mali beꞌanau kuuyiis. Aayyiyaa bantta temokruwaa hagaadan gaada xaafaasu: “Nu naati dumma aqinyetunne misoonaawetu lagge gidido gishshau, eta hagan dichidoogau Yihoowa galatoos. Nuuni aassiyaageeti keehi koshshiyo biittan haggaazido gishshau, nu deꞌoy anjjuwan kumiis.”
8. Hara qaala tamaarennan hara biitti biidi haggaazana danddayettii? Qonccissa.
8 Qaalaara Gayttida Hirggaa: Hara biitta qaalaa tamaariyoogaabaa qoppiyoogee neeni hara biitti beennaadan diggii? Kawotettaabaa aassiyaageeti keehi koshshiyo biittan ne qaalaa haasayiya asay deꞌana danddayees. Issi azinaynne machiyaa mishiraachuwaa aassiyaageeti keehi koshshiyo heeri biidosona. Eti naaꞌꞌutoo biidi soo simmoogaappe guyyiyan, aginaa giddon darin koshshennabau miishsha kessiyoogaa aggidi dagayidosona. Eti baanau giigettido wode, shammana danddayiyo keetta demmanaadan yan deꞌiya ishati maaddidosona.
9, 10. Bantta biittappe hara biitti biidaageeti ay qoppana danddayiyoonaa, aybissi?
9 Hara Biittappe Yiidaageeta: Neeni geella tumaa eranaappe kase hara biitti baada yan deꞌay? Ne biittan cakkiya oosanchati keehi koshshana danddayoosona. Maaddanau simmada baanau qoppana danddayay? Hara biitta asaagaappe dumma hanotan oosonne keetta demmiyoogee neeyyo metennan aggana danddayees. Neeni he biittaa qaalaa haasayana danddayaasa. Hegaa bollikka, he biittaa asay Kawotettaa kiitaa kare biitta asadan xeelliyo urappe siyiyoogaappe neeppe siyanau dosana danddayees.
10 Issi bitanee betedan Albbaaniyaappe Xaaliyaa biitti biidi, loꞌꞌo ooso oyqqiis; yaatidi Albbaaniyan deꞌiya ba soo asau miishshaa yeddees. Tumaa ekki simmidi, Xaaliyaappe yaa biya dumma aqinyeta Albbaaniyaa qaalaa tamaarissiyoogaa doommiis. Ishay hagaadan giidi xaafiis: “Eti taani aggada yiido moottaa boosona. He biittaa qaalaa erokkona; shin ufayttidi boosona. Ta qaalaynne wogay Albbaaniyaa biittaagaa. Taani Xaaliyaa biittan ay oottiyaanaa?” Ishay mishiraachuwaa aassiyoogan maaddanau Albbaaniyaa biitti simmidi baanau qofaa qachiis. Hagaadan giis: “Xaaliyaa biittaappe oosuwaanne miishshaa aggada biidoogan zilꞌꞌettiyaanaa? Guuttaakkonne zilꞌꞌettikke! Albbaaniyan tumu ooso demmaas. Taani qoppiyoogaadan, tumuppe koshshiyaanne wurenna ufayssaa demissiya oosoy nuussi deꞌiya ubbaban Yihoowayyo oottiyoogaa!”
11, 12. Mishiraachuwaa aassiyaageeti keehi koshshiyo heeri baanau qoppiyaageeti ay oottana koshshii?
11 Oottiyo Ogiyaa: PHauloosinne a laggeti Maqidooniyaa baanaappe kase arggo baggi baanau qoppidosona; shin “Geeshsha Ayyaanai eta diggido gishshau,” huuphessa baggi biidosona. (Oos. 16:6) Eti Biitaaniyaa matido wode, yaa beennaadan Yesuusi diggiis. (Oos. 16:7) Sabbakiyo oosuwaa Yihooway Yesuusa baggaara kaalettiiddi deꞌees. (Maa. 28:20) Yaatiyo gishshau, neeni hara biitti baanau qoppaydda deꞌikko, Yihooway kaalettanaadan woosan a oycha.—Luq. 14:28-30; Yaaq. 1:5
12 Intte gubaaꞌiyaa cimatuppenne kaymida hara Kiristtaanetuppe maaddiya qofaa oycha. (Lee. 11:14; 15:22) Neeni baanau qoppido haggaazo moottan amarida gallassaa takkada xomoosana danddayay? Neeni hara biitti baanau wozanappe qoppiyaaba gidikko, gujjada eranau macara biiruwau xaafana danddayaasa. Gidikkokka, ne dabddaabbiyaa he macara biiruwau kiittanaappe kase, ne gubaaꞌiyaa cimati bantta qofaa gujjidi kiittana mala etau imma.—Yihoowa SHeniyaa Oottanau Giigettidaageeta giya maxaafaa sinttaa 111-112 xeella.
13. Macara biiroy nena maaddana danddayiyoy ayba ogiyaanee, shin neeni oottana bessiyaabi aybee?
13 Neeni kuuyanaadan maaddiya qofaa macaraa biiroy kiittees; shin oosuwau maaddiya dabddaabbiyaa, deꞌiyo sohuwaa, woykko deꞌiyoosaa demmanau maaddiya, higgiyan koshshiya hara qitseta giigissenna. Hageeti neeni baanaappe kase qorada erana koshshiyo allaalleta. Hara biitti biyaageeti banttassi koshshiyaabaanne higgiyan koshshiyaabaa bantta huuphen kunttana bessees.—Gal. 6:5.
14. Hara biitti baana danddayennaageeti bantta heeran bantta haggaazuwaa waatidi aassana danddayiyoonaa?
14 Neeni Baana Danddayennaba Gidikko: Neeni hara biitti baanau danddayennaba gidikko, hidootaa qanxxoppa. Geella “oosoi kumido aaho penggee” haray neeyyo dooyettana danddayees. (1 Qor. 16:8, 9) Aassiyaageeti keehi koshshiyo, ne sooppe kaamiyan baana danddayiyo heeraa intte woradaa bollaara geeddiyaagee erana danddayees. Geella matan deꞌiya gubaaꞌiyan woy citan maaddana danddayaasa. Woykko haꞌꞌi neeni deꞌiyo gubaaꞌiyan ne haggaazuwaa aassana danddayaasa. Ne hanotay ay mala gidikkonne, keehi koshshiyaabay neeni kumetta shemppuwaappe goynniyoogaa.—Qol. 3:23.
15. Hara biitta biidi oottanau koyiyaageeta xeelliyaagan nuuni ay oottana koshshii?
15 Hara biittan oottanau halchiya, ayyaanaaban kaymida Kiristtaane eray? Yaatikko a woy o maaddanne minttetta! PHauloosi Sooriyaa Anxxookiyaappe biyo wode, he katamay Roome kawotettan heezzantto gita katama (Roomeppenne Iskkinddiriyaappe kaallidi). Hegaa keena aaho moottan, Anxxookiyaa gubaaꞌiyau PHauloosa maadoy koshshennan aggenna; qassi i biyoogan eti keehi azzanana. Gidikkokka, PHauloosi beennaadan ishantti minttettidobaa Geeshsha Maxaafay yootenna. Bantta biittaa xallau qoppiyoogaappe “goshshai sa7aa” gidiyoogaa akeekidosona.—Maa. 13:38.
16. ‘Maqidooniyaa pinnanau’ qoppanaadan oottiya ayba gaasoy deꞌii?
16 PHauloosinne a laggeti Maqidooniyaa baanaadan shoobettido shoobiyaa ekkido gishshau, gita anjjuwaa demmidosona. Eti Maqidooniyaa katama gidida Piliphisiyuusan deꞌiyo wode, Lidiyo giyo maccaasiyo demmidosona; “PHauloosi yootiyoogaakka a siyana mala Xoossai i wozanaa dooyiis.” (Oos. 16:14) Lidiyaanne i soo asay ubbay xammaqettiyo wode PHauloosinne a laggeti ufayttido ufayssaa qoppa! Daro biittan, Kawotettaa kiitaa hanno gakkanau siyibeenna, suure wozanay deꞌiyo Lidee mala daro asay deꞌees. Neeni ‘Maqidooniyaa pinniyaaba’ gidikko, eta demmiyoogaaninne maaddiyoogan keehippe ufayttana danddayaasa.