Oyshaa Saaxiniyaa

◼ Aassiyaageeti banttanaara erettenna, hara biittan deꞌiya urawu markkattanawu woy a xannaꞌissanawu Intternneetiyaa keehi goꞌettana koshshii?

Issi issi aassiyaageeti Intternneetiyaa goꞌettidi nu oosoy digettido biittan woy aassiyaageeti darenna biittan Geeshshaa Maxaafaa xannaꞌiya ura koyoosona. Hegee issi issitoo loꞌꞌo ayfiyaa demissiis. Gidikkokka, Intternneetiyan erenna asaara gattiyoogee issi issi aassiyaageeta qohiis. (Isiine 2007 Nu Kawotetta Haggaazuwan (Amaarattuwaa), sinttaa 3 xeella.) Nu halchoy tumaa siyanawu koyiyaageetussi mishiraachuwaa yootanaassa gidikkokka, hegee issi ishay woy issi michiyaa kaddidaageeta gujjin, iita asatuura laggetanaadan oottana danddayees. (1 Qor. 1:19-25; Qol. 2:8) Qassi sabbakiyo oosoy digettido biittan, Intternneetiyaara gayttidabaa sunttati qorana danddayoosona. Hegee he biittan deꞌiya ishanttanne michontta qohiyaaba. Hegaa gishshawu, aassiyaageeti Intternneetiyan hara biitta asaa koyidi mishiraachuwaa yootanawu malana bessenna.

Macara biiroy paqqadennan kare biittappe yiida, neeni erenna urawu haggaazuwaa kiyennan markkattidaba gidikko, i ba biitti simmiyo wode a maaddanawu baaxetana koshshenna. Hegaadan oottiyoogaappe jw.org weyb sayttiyaa goꞌettanaadan woy ba biittan deꞌiya macara biiruwaa oychanaadan yootana danddayaasa. Qassi a biittan deꞌiya Kawotettaa Addaraashaa baanaadan minttettanawu danddayoos. Issi issi biittatun Kawotettaa Addaraashay baynnaagee qoncce. He uri ba heeran deꞌiya Yihoowa Markkati a oychanaadan koyiyaaba gidikko, Hayyanintta Kaallidi Maaddite (S-43) yaagiyo qitsiyaa kunttidi gubaaꞌiyaa xaafiyawu immikko, i jw.org weyb sayttiyaa goꞌettidi a heeran deꞌiya gubaaꞌiyawu kiittana danddayees. Tumaa siyanawu koyiya uri deꞌiyo biittaa xomoosiya macara biiroy he biittan deꞌiya hanotaa loytti eriyo gishshawu, hegaa mala ura ayyaanaaban maaddana danddayiyay he biiruwaa.—Tamme 2014 Nu Kawotetta Haggaazuwaa, sinttaa 7, qassi Hidaare 2011 Nu Kawotetta Haggaazuwaa, sinttaa 2 xeella.

Nuuni zaarettidi oychiyo uri hara biitti biikko woy nuuni haara biittan deꞌiya uraara Intternneetiyan erettidi a xannaꞌissiiddi deꞌiyaaba gidikko, qommoora deꞌiya kaaletuwaa kaallana bessees. Gido shin, he uray i deꞌiyo biittan deꞌiya aassiyaageetuura gayttanaashin ayyaanaaban diccanaadan maaddana danddayoos. SHin, i nu oosoy digettido biittan deꞌiyaaba gidikko, a Geeshsha Maxaafaa dabddaabbiyan, silkkiyan, woy Intternneetiyan xannaꞌissiyo wode keehi naagettana bessees.—Maa. 10:16.