Geeshsha Maxaafaa Pilggana Koshshiyoy Aybissee?

GEESHSHA MAXAAFAA​—TUMU TAARIKIYAA

Ermmaasa: Taani haymaanootebaa darin dosikke. Taani nenaara haasayanabay waayi darana.

Biraana: Neeni hegaa yootidoogee loꞌꞌo. Ta sunttay Biraana. Ne sunttay shin?

Ermmaasa: Ermmaasa.

Biraana: Haymaanootiyaa mintti kaalliya keettan diccadii?

Ermmaasa: Ee; shin kolloojjiyaa gela simmada haymaanootiyaa kaalliyoogaa aggaagaas.

Biraana: Gido shin, neeni kolloojjiyan ay tamaaradii?

Ermmaasa: Deretettaabaanne taarikiyaa. Asaa naati saꞌan waani corattidaakko yootiya taarikiyaa dosays.

Biraana: Ee, taarikee ufayssiyaaba. Geella ne eriyaakkonne, Geeshsha Maxaafay daro taarikiyaa yootees. Neeni pilgganawu Geeshsha Maxaafaa goꞌetta eray?

Ermmaasa: Akkay. Geeshsha Maxaafay loꞌꞌo maxaafa gidiyoogaa erays; shin taarike maxaafa gaada qoppa erikke.

Biraana: Neeni yuushsha qoppiya asa. Neeni guutta daqiiqaa takkana danddayikko, Geeshsha Maxaafan deꞌiya tumu taariketuppe amaridaagaa taani bessana.

Ermmaasa: Ero. SHin tawu Geeshsha Maxaafi baa.

Biraana: Aynne baa. Taani oyqqido gishshawu, nena taagaappe bessana. Taani nena bessana koyro taarikee 1 Hanidabaa Odiya shemppo 29, paydo 26ninne 27n deꞌiyaagaa. Xiqisee hagaadan gees: “Isseya na7ai Daawiti Israa7eela ubbaa bolli kawotiis. Daawiti Israa7eela bolli oitamu laitta kawotiis; Kebroonan i laappun laitta kawotiis; Yerusalaamen hasttamanne heezzu laitta kawotiis.”

Ermmaasa: Yaatin hagee tumu taarikiyaara aybin gayttii?

Biraana: Issi wode, Geeshsha Maxaafaa siriya asati Kawuwaa Daawita giyo asi deꞌi erenna giidosona.

Ermmaasa: Tumaa gay? Eti hegaadan giidoy aybissee?

Biraana: Geeshsha Maxaafaanappe attin harasan daro naqaashi baynna gishshataassa. SHin, biittaa bookkidi beni wodebaa xannaꞌiyaageeti 1993n, “Daawita Keettaa” giyo birshshettay deꞌiyo qofay xaafettido keehi takkida shuchaa demmidosona.

Ermmaasa: Garamiyaaba.

Biraana: Abay Geeshsha Maxaafan odettido, Yesuusi saꞌan deꞌiyo wode biittaa haariya, PHenxxeniyaa PHilaaxoosikka deꞌidoogaa he asati siroosona. Luqaasa shemppo 3, paydo 1y, he wode biittaa haariya daro asatuppe issoy a gidiyoogaa yootees.

Ermmaasa: Ahaa. He xiqisee, “PHenxxeniyaa PHilaaxoosi Yihudaa haariyo wode, Heeroodisi Galiila haarees” yaagees.

Biraana: Ero loꞌꞌo. Daro layttawu, issi issi eranchati PHenxxeniyaa PHilaaxoosi deꞌida asa gidiyoogaa siridosona. SHin a sunttay woocettidi xaafettido issi shuchay 50 gidiya layttappe kase Giddo Arshshon beettiis.

Ermmaasa: Ahaa. Taani hegaa kase mule siya erikke.

Biraana: Nenaara gayttada hegaa tobbido gishshawu ufayttaas.

Ermmaasa: Taani tumaa gays; Geeshsha Maxaafay loꞌꞌo maxaafa gidiyoogaa ammanays; shin nu wodiyawu goꞌꞌiya maxaafa gaada qoppikke. An deꞌiya taarikee tuma gidana danddayees; shin ha wodiyawu goꞌꞌiyaaba gaada qoppikke.

GEESHSHA MAXAAFAA—BENI XAAFETTIDAAGAA HAꞌꞌIKKA GOꞌꞌIYAAGAA

Biraana: Daro asay neegaadan qoppees. SHin ta qofay hegaappe dumma. Aybissi giikko, asawu koshshiya waannabay hanno gakkanawu laamettibeenna. Leemisuwawu, nuussi qumay, maayoynne keettay ubba wode koshshees. Nuuni issoy haraara haasayana koyoos; qassi nu soo asaykka ufayttanaadan koyoos. Nuuni hegaa xoqqu oottidi xeelliyoogee tuma gidennee?

Ermmaasa: Ee, tuma.

Biraana: Geeshsha Maxaafay he ubbabaara gayttidaagan nuna maaddana danddayees. Geeshsha Maxaafay beni xaafettidaba gidikkokka, ha wodiyankka goꞌꞌees gaada taani ammaniyoy hegaassa.

Ermmaasa: Neeni woygana koyadii?

Biraana: Ee taani, ‘Geeshsha Maxaafan deꞌiya zoree daro xeetu layttaappe kase xaafettido wode goꞌꞌidoogaadan, ha wodiyankka goꞌꞌees’ gaana koyaas.

Ermmaasa: Ero. SHin aybin aybin goꞌꞌii?

Biraana: Miishshaa bessiya ogiyan xeelliyoogaa, ufayssiya so asaa deꞌuwaa woy loꞌꞌo lagge gidiyoogaanne hegaa mala harabaa xeelliyaagan Geeshsha Maxaafay yootiyo zoree nuna keehi maaddees. Geeshsha Maxaafay nu ogiyawu xomppe mala. Leemisuwawu, ha wodiyan loꞌꞌo azina woy loꞌꞌo aawa gidanawu keehi baaxetana koshshennee?

Ermmaasa: Ee, baaxetana koshshees. Taani machoosappe biron issi laytta heera; shin issi issitoo nuuni maayettanawunne issi malabaa qoppanawu metootoos.

Biraana: Ahaa, shin Geeshsha Maxaafay yootiyo zoree hegawu maaddees. Hegaara gayttidaagan, ane Efisoona shemppo 5 beꞌoos. Ane paydo 22, 23nne 28 nabbaboos. He xiqiseta neeni nabbabuutee?

Ermmaasa: Ero. Hagaadan gees: “Maccaasatoo, Godaayyo haarettiyoogaadan, intte azinatuyyo haarettite. Aissi giikko, Kiristtoosi qassi woosa keettaayyo huuphe gidiyoogaadan, azinaikka ba maccaaseeyyo huuphe; qassi Kiristtoosi ba huuphen, ba bollaa gidiya woosa keettaa ashshiyaagaa.” Paydo 28y qassi, “Simmi qassi azinai ba maccaasiyo ba bollaadan siiqanau bessees; ba machchiyo siiqiyaagee bana siiqees” yaagees.

Biraana: Hayya, galatays. Azinaynne machiyaa naaꞌꞌaykka ha zoriyaadan deꞌanawu baaxetikko, so asaa deꞌoy giiga gidana danddayennee?

Ermmaasa: Ee, gidana danddayees. SHin hegee haasayiyoogaa mala gidenna.

Biraana: Tuma, asa gididi balenna uri baa. Ubba, Geeshsha Maxaafay he shemppuwan nuuni eeyya gidennaadan woy akeekancha gidanaadan zorees.a Asaara deꞌiya ay dabbotaaninne akeekancha gidananne issoy haraa qofaa siyana koshshees. Taaninne ta machiyaakka hegaadan oottanaadan Geeshsha Maxaafay maaddiis.

Ermmaasa: Hegee loꞌꞌoba.

Biraana: Yihoowa Markkatuyyo loꞌꞌo Weyb sayttee deꞌees; he sayttiyan aqo deꞌuwaanne so asaa xeelliyaagan keehi maaddiya qofay deꞌees. Neeni guutta daqiiqaa takkana danddayikko, hegan deꞌiyaabaappe amaridabaa nena bessana.

Ermmaasa: Ero. Takkana danddayays.

Biraana: Loꞌꞌo. Nu Weyb sayttiyaa adrashay www.jw.org/wal. Koyro sinttaa hagaa beꞌa.

Ermmaasa: Ha pootoy loꞌꞌees.

Biraana: Hagee nuuni kumetta alamiyan sabbakiyo oosuwaa bessiya pooto. Ee, hagaa beꞌa. Hagan “Xuufeta” giyaagee deꞌees. Hagaa giddon qassi, “Maxaafaa & Brooshuriyaa” giyaagee deꞌees. Hagan dumma dumma huuphe yohuwaa qonccissiya xuufeti deꞌoosona. Leemisuwawu, Xoossaappe Yiya Mishiraachuwaa! giyo brooshuriyaa ane beꞌoos. Ha brooshuriyaa kesuwan, “Intte Soo Asay Waanidi Ufayttana Danddayii?” yaagiya huuphe yohoy deꞌees?

Ermmaasa: Hegee loꞌꞌo huuphe yoho!

Biraana: Ha huuphe yohuwan azinaynne machiyaa issoy issuwaa waati oyqqana koshshiyaakko yootiya keehi maaddiya zoree deꞌees. Ha menttuwaa beꞌa. Ermmaasaa, ane neeni nabbabuutee?

Ermmaasa: Ero. Hagaadan gees: “Azinaynne machiyaa issoy issuwaa maaddiyaageeta gidanaadan oottidi Yihooway medhiis. (Doomettaabaa 2:18) Azinay so asau huuphe gidiyo gishshau, ba soo asau asatettan koshshiyaabaa kunttiyoogaaninne Xoossaabaa eta tamaarissiyoogan sintta xeera gidana koshshees. I ba goꞌꞌaa aggidi ba maccaasiyo siiqiyaagaa gidana bessees. Azinaynne machiyaa issoy issuwaa siiqananne bonchana koshshees.” Hagee keehi loꞌꞌo qofa.

Biraana: Loytta nabbabido gishshawu galatays. Efisoona 5:33 xiqisee hagan deꞌees. Ta oyqqido Geeshsha Maxaafaappe he xiqisiyaa nabbabuutee?

Ermmaasa: Ero, hagaadan gees: “Intte huuphiyan huuphiyan intte maccaasaa intte huuphedan siiqanau bessees; maccaasa ubbaikka bantta azinaa azinaa bonchchanau bessees.”

Biraana: Ha xiqisee, issoy haraappe ekkiyoobaappe aaruwan issoy harawu immana koshshiyoogaa minttidi yootiyoogaa akeekadii?

Ermmaasa: Ne woygana koyidaakko tawu gelibeenna.

Biraana: Azinay ba machiyaa bana bonchanaadan koyiyoogee, qassi machiyaa darotoo ba azinay o wozanappe siiqiyoogaa bessanaadan koyiyoogee wottin deꞌiyaaba gidennee?

Ermmaasa: Ee, hegee tuma.

Biraana: Azinay ubbatoo ba machiyo siiqiyoogaa qonccissiyaaba gidikko, machiyaa ba azinaa bonchanawu metootanee?

Ermmaasa: A metootennaagee qoncce.

Biraana: Nuuni beꞌido ha issi xiqisee Geeshsha Maxaafan xaafettoosappe 2,000 gidiya layttay aadhidaba gidikkokka, azinaynne machiyaa issoy issuwawu oottana bessiyaabaa, qassi oosuwan peeshshiyaaba gidikko keehi maaddiya qofaa yootees.

Ermmaasa: Taani qoppiyoogaappe aaruwan Geeshsha Maxaafan keehi maaddiya qofay deꞌiyoogaa akeekaas.

Biraana: Ermmaasaa, hegee loꞌꞌoba. Hara gallassi ha sohuwan zaaretti gayttin ha Weyb sayttiyan, “GUJJADA ERANAU” giyaagaa giddon “Ne Soo Asaa Duussay Ufayssiyaagaa Gidanaadan Oottiyoogaa” giya huuphe yohuwaa xeelliyaagan ne qofay aybakko siyanawu koyays.b

Ermmaasa: Ero. Hegee gakkanaashin ta macheera hegaa beꞌana.