Yihoowa Maxaafaa Keehi Xoqqu Oottada Xeellay?

1-3. Ewodinne Sinxxiiki giddon geella metoy waani merettidee, qassi hegaa mala metuwaappe waani naagettana danddayiyoo? (Doomettan deꞌiya misiliyaa xeella.)

NUUNI Geeshsha Maxaafay Xoossaa Maxaafa gidiyoogaa eriyo gishshawu, a keehi xoqqu oottidi xeelloos. Nuuni nagarancha gidiyo gishshawu, issi issitoo nuussi ubbawu Geeshsha Maxaafaappe zoree imettees. Nuuni he zoriyaa ekkanee? Ewodonne Sinxxiiko giyo koyro xeetu layttan deꞌida Kiristtaaneta qoppa. Ayyaanan tiyettida he maccaasatu giddon wolqqaama metoy merettiis. He metoy aybee? Geeshsha Maxaafay metoy aybakko yootenna. Leemisuwawu, hanana danddayiya kaallidi deꞌiyaabaa ane qoppa.

² Ewoda amarida ishanttanne michontta ba son qumaa shoobbin, eti ubbay ufayttidosona gaada qoppa. Sinxxiika shoobettabeykku, shin hegan ubba asay ufayttidoogaa siyaasu. Sinxxiika hagaadan gaana danddayawusu: ‘Ewoda tana shoobbabeennaagee ammananawu metiyaaba! Nuuni mata lagge gaada taani qoppaas.’ Sinxxiika bana Ewoda kaddidabadan qoppada, o siriyoogaa doommaasu. Yaatiyo gishshawu, Sinxxiika Ewodo shoobbennan, a shoobbido ishanttanne michontta ba son shoobbaasu. Ewodinne Sinxxiiki giddon deꞌiya metoy kumetta gubaaꞌiyaa sarotettaa moorana danddayees. Geeshsha Maxaafay he yohuwaa wurssettaa yootana xayikkonne, he michontti kiitettida PHawuloosi siiquwan zoridobaa oosuwan peeshshennan waayi aggana.—Pili. 4:2, 3.

³ Hegaa malabay ha wodiyan Yihoowa asaa gubaaꞌetun issi issitoo metoy merettanaadan oottees. SHin, nuuni Xoossaa Qaalan, Geeshsha Maxaafan deꞌiya zoriyaa oosuwan peeshshikko, hegaa mala metuwaa giigissana woy he metuwaappe naagettana danddayoos. Qassi nuuni Yihoowa Maxaafaa keehi xoqqu oottidi xeellikko, a kaaletuwaadan deꞌoos.—Maz. 27:11.

XOOSSAA MAXAAFAANNE ASAA QOFAA

4, 5. Nu huuphiyaa naagiyoogaa xeelliyaagan Xoossaa Qaalay nuna woygi zorii?

⁴ Nuna asi karidobadan woy naaqqidobadan qoppiyo wode, yiillotennan aggiyoogee metiyaaba. Nu zariyaa, nu meraa woy nuuni dummatiyo harabaa gaasuwan nuna asi naaqqikko, hegee keehi qohana danddayees. Qohidaagee nu mala Kiristtaane gidikko, keehi azzananaadan oottees! Nuna maaddana danddayiya ayba zoree Xoossaa Qaalan deꞌii?

⁵ Asi merettoosappe doommidi, Yihooway asay issoy issuwaara deꞌido deꞌuwaa beꞌiis. I nuuni qoppiyoobaanne oottiyoobaa akeekees. Keehi hanqettissiyaabaa gujjin, nuuni qoppiyoobay guyyeppe zilꞌꞌettana danddayiyoobaa haasayanaadaaninne oottanaadan denttettana danddayees. Geeshsha Maxaafay nuuni elle hanqqettennaadan zoriyoogaa oosuwan peeshshiyoogee keehi loꞌꞌo! (Leemiso 16:32; Eranchchaa 7:9 nabbaba.) Nuuni ubbay eesuwan hanqqettennaageetanne atto giyaageeta gidanawu baaxetana koshshiyoogee qoncce. Yihoowaykka Yesuusikka nuuni atto gaanaadan mintti yootoosona. (Maa. 6:14, 15) Neeni kaseegaappe aaruwan atto gaana woy ne huuphiyaa naagana koshshanddeeshsha?

6. Nuuni yiillotennaadan naagettana koshshiyoy aybissee?

⁶ Bantta huuphiyaa naagenna asati darotoo yiillotoosona. Hegaappe denddidaagan, harati etakko shiiqanawu waayi koyana. Yiillotiya uri gubaaꞌiyan deꞌiya issoti issoti baagaadan yiillotanaadan oottana danddayees. I yiillotiyoogaa woy ixxiyoogaa genttanawu malana danddayikkonne, i ba wozanan qoppiiddi takkido iita qofay “yaa7an qonccana.” (Lee. 26:24-26) Yiilloy, ixoynne lancciyaa uluwan oyqqiyoogee Xoossaa dirijjitiyan bessenna eeshsha gidiyoogaa hegaa mala asati akeekanaadan cimati maaddana danddayoosona. Yihoowa Maxaafay hegaa xeelliyaagan yootiyoobay keehi qoncce. (Wog. 19:17, 18; Roo. 3:11-18) Neeni hegaa maayay?

YIHOOWAY NUNA WAATI KAALETTIYAAKKO HASSAYA

7, 8. (a) Yihooway ba dirijjitiyawu saꞌaa baggaa waati kaalettii? (b) Xoossaa Qaalan deꞌiya kaaletotuppe amaridaageeti awugeetee, qassi hegeeta nuuni kaallana koshshiyoy aybissee?

⁷ “Woosa keettaayyo huuphe” gidida Kiristtoosi kaalettiyo ‘ammanettida wozannaama ashkkaraa’ baggaara, Yihooway ba dirijjitiyawu saꞌaa baggan deꞌiyaageeta kaaletteesinne mizees. (Maa. 24:45-47; Efi. 5:23) Koyro xeetu layttan bolla gididi heemmiyaagaadan, ha ashkkaray ayyaanay kaalettin xaafetida Xoossaa qaalaa woy kiitaa ammaneesinne keehi xoqqu oottidi xeellees. (1 Tasalonqqe 2:13 nabbaba.) Geeshsha Maxaafay yootiyo nuna maaddiya issi issi kaaletoti aybee?

⁸ Nuuni ubbatoo shiiquwaa shiiqanaadan Geeshsha Maxaafan azazoy imettiis. (Ibr. 10:24, 25) Geeshsha Maxaafay nuuni timirttiyan issuwaa gidanaadan zorees. (1 Qor. 1:10) Xoossaa Qaalay nuuni nu deꞌuwan Kawotettaa kaseyanaadan yootees. (Maa. 6:33) Geeshsha Maxaafay nuuni sooppe soo biidi, dabaabaaninne haggaazuwaa kiyennan sabbakiyo oosuwaabaanne maataabaakka yootees. (Maa. 28:19, 20; Oos. 5:42; 17:17; 20:20) Kiristtaane cimati Xoossaa dirijjitiyaa geeshshatettaa naaganaadan Xoossaa Maxaafan azazoy imettiis. (1 Qor. 5:1-5, 13; 1 Xim. 5:19-21) Qassi Yihooway ba dirijjitiyan deꞌiya ubbay asatettaaninne ayyaanaaban geeshsha gidanaadan azazees.—2 Qor. 7:1.

9. Xoossaa Qaalaa akeekanaadan nuna maaddana mala Yesuusi oona sunttidee?

⁹ Issooti issooti Geeshsha Maxaafaa banttawu hara asi qonccissana koshshennabadan qoppana danddayoosona. SHin, Yesuusi ‘ammanettida ashkkaraa’ xallay ayyaanaabaa qumaa giigissiyaagaa gidanaadan sunttiis. Yesuus Kiristtoosi bana kaalliyaageeti Xoossaa Maxaafaa akeekanaadaaninne a kaaletuwaa kaallanaadan maaddanawu, 1919⁠ppe doommidi he ashkkaraa goꞌettiiddi deꞌees. Geeshsha Maxaafan deꞌiya kaaletuwaa kaalliyoogan, nuuni gubaaꞌiyan geeshshatettay, sarotettaynne issippetettay deꞌanaadan oottoos. ‘Taani Yesuusawu ammanettiyaanaa, qassi ammanettida ashkkaraa kaaletuwaa kaalliyaanaa?’ yaagada nena oycha.

YIHOOWA SARAGALLAY EESUWAN BEES!

10. Yihoowa dirijjitiyawu saluwaa baggay Hizqqeela maxaafan waani qonccidee?

¹⁰ Xaafettida Yihoowa Qaalay a dirijjitiyawu saluwaa baggaa nuuni eranaadan maaddees. Leemisuwawu, hananabaa yootiya Hizqqeeli Xoossaa dirijjitiyawu saluwaa baggawu leemiso gidida saluwaa saragallaa ajjuutan beꞌiis. (Hiz. 1:4-28) Yihooway he saragallaa toggi uttiis; qassi saragallay a ayyaanay kaalettiyoosaa awanne bees. Qassi a dirijjitiyawu saluwaa baggay saꞌaa baggaa kaalettees. Saragallay eesuwan biiddi deꞌiyoogee qoncce! Aadhida tammu layttan dirijjitiyan laamettida darobaa qoppa; qassi hegaa laammanaadan oottiday Yihoowa gidiyoogaa hassaya. Kiristtoosinne geeshsha kiitanchati ha iita alamiyaa xayssanawu matido wode, Yihoowa haaroy suure gidiyoogee qonccanaadaaninne a sunttay geeyanaadan a saragallay eesuwan biiddi deꞌees!

11, 12. Yihoowa dirijjitee oottiiddi deꞌiyo issi issibay aybee?

¹¹ Ha wurssetta gallassan Xoossaa dirijjitiyawu saꞌaa baggay oottiiddi takkidobaa qoppa. Keexxiyoogaa. Amarkkan, Niwu Yorken, Warwik giyoosan Yihoowa Markkatu ooratta waanna biiruwaa xeetan qoodettiya oosanchati minnidi keexxidosona. Bantta dosan oottiya shaꞌan qoodettiya harati kumetta saꞌan Kawotettaa Addaraashatanne macara biirota keexxiiddi deꞌoosona. Kumetta saꞌan keexxiyo oosuwaara gayttidabaa kaalliya kifilee ha bantta dosan oottiyaageetuyyo kaaletuwaa immees. He oosuwaa bantta dosan minnidi oottiya darota keehi galatoos! He oosuwaa miishshan maaddanawu banttawu danddayettidabaa oottiya, kumetta saꞌan Kawotettaabaa yootiya bantta huuphiyaa kawushshiyaanne ammanettidaageeta Yihooway anjjiyoogaa hassaya.—Luq. 21:1-4.

¹² Timirttiyaa. Xoossaabaa tamaaranaadan maaddiya dumma dumma timirtte keettata qoppa. (Isi. 2:2, 3) Nuuyyo Aqinyetettaa Haggaazuwaa Timirtte Keettay, Kawotettaa Mishiraachuwaa Yootiyaageeti Tamaariyo Timirtte Keettay, Giiliyaade Timirtte Keettay, Beeteele Geliyaageeti Tamaariyo Timirtte Keettay, Yuuyidi Xomoosiyaageetinne Eta Maccaasati Tamaariyo Timirtte Keettay, Gubaaꞌiyaa Cimati Tamaariyo Timirtte Keettay, Kawotettaa Haggaazuwaa Timirtte Keettaynne Macara Biiruwaa Konttiyaa Yaratinne Eta Machoti Tamaariyo Timirtte Keettay deꞌees. Yihooway ba asaa tamaarissiyoogaa keehi dosees! Xeetan qoodettiya qaalan xuufeti deꞌiyo jw.org giyo nu web sayttiyankka Geeshsha Maxaafaa timirttee asawu odettees. Oduwaa gujjin, naatuyyoonne so asawu giigidabay he sayttiyan deꞌees. Neeni haggaazuwaaninne ne so asaa goynuwan jw.org giyo sayttiyaa goꞌettay?

YIHOOWAWU AMMANETTA, QASSI A DIRIJJITEE ZORIYOOBAA SIYA

13. Yihoowa asawu ayba aawatettay deꞌii?

¹³ Yihoowa dirijjitiyaa yara gidiyoogee gita maata! Xoossay nuuppe koyiyoobaanne a maaraa eriyo gishshawu, nuuni suurebaa oottananne a haaruwawu exatana koshshees. Qassi daro asay iitabaa oottiyoogaa dosikkokka, nuuni Yihoowagaadan ‘iitaa ixxana’ bessees. (Maz. 97:10) Xoossaa yayyenna asatuugaadan “iitaa lo77o lo77uwaa iita” gaanawu koyokko. (Isi. 5:20) Nuuni Xoossaa ufayssanawu koyiyo gishshawu, asatettan, kandduwaaninne ayyaanaaban geeshsha gididi deꞌanawu baaxetoos. (1 Qor. 6:9-11) Nuuni Yihoowa siiqoosinne an ammanettoos; a alꞌꞌo Maxaafan qonccida maaraadan deꞌiyoogan ayyo ammanettiyaageeta gidiyoogaa bessoos. Qassi nuuni son, gubaaꞌiyan, ooso sohuwan, timirtte keettan, woy awaaninne he maaraadan deꞌanawu keehi baaxetoos. (Lee. 15:3) Nuuni Xoossawu ammanettiyoogaa bessana danddayiyo hara ogeta ane beꞌoos.

14. Kiristtaane aawatinne aayeti Xoossawu ammanettiyoogaa waati bessana danddayiyoonaa?

¹⁴ Naata dichiyoogaa. Kiristtaane aawatinne aayeti bantta naata Yihoowa Qaalaadan loohissiyoogan awu ammanettiyoogaa bessoosona. Xoossawu yayyiya aawatinne aayeti naata dichiyoogaara gayttidaagan heeraa wogaa kaallokkona. Saꞌaa ayyaanay Kiristtaanetu keettan deꞌana bessenna. (Efi. 2:2) Xammaqettida Kiristtaane aaway, ‘Nu biittan naata tamaarissiyay maccaasaa’ giidi qoppenna. Geeshsha Maxaafay hegaa xeelliyaagan, ‘Aawatoo, intte intte naata Godaa seeraaninne zoriyan [kaaletuwan] dichite’ yaagidi geeshshidi yootees. (Efi. 6:4) Sameeli dicciyo wode Yihooway aara deꞌiyo gishshawu, Xoossawu yayyiya aawatinne aayeti bantta naati Sameela mala gidanaadan koyoosona.—1 Sam. 3:19.

15. Nuuni gitabaa kuuyiyo wode Yihoowawu ammanettiyoogaa waatidi bessiyoo?

¹⁵ Kuuyiyoogaa. Nuuni nu deꞌuwan gitabaa kuuyanaappe kase, Yihoowawu ammanettana mala, a qofay aybakko eranawu koyoos. Hegawu Geeshsha Maxaafaynne a dirijjitee nuna maaddana danddayees. Hegee keehi koshshiyoogaa leemisuwan qonccissanawu, daro aawatanne aayeta qofissiyaabaa qoppa. Asa biitti biida issoti issoti bantta biido biittan oottidi miishshaa shiishshanawu giidi yelido guutta naata bantta dabboti dichanaadan etakko bantta dere yeddiyoogee meeze gididaba. Hegee issi uri bawu kuuyiyooba gidikkonne, nuuni kuuyiyooban Xoossay nuna oychiyoogaa hassayana bessees. (Roome 14:12 nabbaba.) Nu soo asaaranne nu deꞌuwaara gayttidabawu Geeshsha Maxaafaa zoriyaa koyennan gitabaa kuuyiyoogee loꞌꞌoo? Loꞌꞌo gidenna! Nuuni nu hemettaa suurissana danddayenna gishshawu, saluwan deꞌiya nu Aawaa maadoy nuussi koshshees.—Erm. 10:23.

16. Issi maccaasiyaa naꞌa yeliyo wode kuuyana koshshidobay aybee, qassi a suurebaa kuuyanaadan aybi maaddidee?

¹⁶ Asa biittan deꞌaydda naꞌa yelida issi maccaasiyaa naꞌaa a aawaa aawaynne aayyiyaa dichana mala ba biitti yeddanawu qoppa uttaasu. Maccaasiyaa naꞌaa yeliyo wode, issi Yihoowa Markkiyaa o xannaꞌissiyoogaa doommaasu. A xinaatiyan minnada ba naꞌay Yihoowawu goynnanaadan dichiyoogee Xoossay iyyo immido maata gidiyoogaa akeekaasu. (Maz. 127:3; Lee. 22:6) Geeshsha Maxaafay nuuni oottanaadan yootiyoogaadan, maccaasiyaa ba wozanan deꞌiyaabaa Yihoowawu yootaasu. (Maz. 62:7, 8) A bana Geeshsha Maxaafaa xannaꞌissiyaariyoonne gubaaꞌiyan deꞌiya haratussikka bana qofissidabaa yootaasu. I dabbotinne i laggeti naꞌaa a aawaa aawaakkonne aayeekko yeddanaadan mintti yootikkonne, a hegaadan oottiyoogee likke gidennaagaa kuuyaasu. Gubaaꞌee onne i naꞌaa maaddido gishshawu, i azinay maalaalettidi Geeshsha Maxaafaa xannaꞌiyoogaanne ba macheeranne ba naꞌaara shiiquwaa shiiqiyoogaa doommiis. Ha aayyiyaa wozanappe woossido woosaa Yihooway zaariis gaada qoppadee? Ee, a hegaadan qoppaasu.

17. Geeshsha Maxaafaa xannaꞌiyaageeta xeelliyaagan nuuyyo immettida kaaletoy aybee?

¹⁷ Kaaletuwaa kaalliyoogaa. Nuuni Xoossaayyo ammanettiyoogaa bessiyo issi ogee a dirijjitee immiyo kaaletuwaa kaalliyoogaa. Leemisuwawu, nuuni Geeshsha Maxaafaa xannaꞌissiyoogeeta xeelliyaagan odettidabaa qoppa. Issi uraa Tumuppe Geeshsha Maxaafay Tamaarissiyoy Aybee? giyo maxaafaa xannaꞌissiyoogaa doommidi takkennan, xannaꞌissi simmidi ubbatoo amarida daqiiqawu dirijjitiyaabaa tamaarissanaadan nuuyyo odettiis. Nuuni Kawotettaa Addaraashan Oosettiyaabay Aybee? giyo biiduwaanne Ha Wodiyan Yihoowa SHeniyaa Poliyaageeti Oonee? giyo brooshuriyaa goꞌettiyoogan hegaadan oottana danddayoos. Nuuni Geeshsha Maxaafay Tamaarissiyoy giyo maxaafaa xannaꞌissidi wurssiyo wode, xannaꞌissiyo uri he wode xammaqettikkokka, ‘Xoossaa Siiquwan Deꞌa’ giyo maxaafaa xannaꞌissanaadan odettiis. Mati erissiyo ashkkara gididaageeti ‘ammanuwan minnanaadan’ dirijjitee ha kaaletuwaa immiis. (Qol. 2:7) Yihoowa dirijjitee immiyo hegaa mala kaaletuwaa neeni kaallay?

18, 19. Nuuni Yihoowa galatanaadan oottiya amaridabay aybee?

¹⁸ Nuuni Yihoowa galatanaadan oottiya darobay deꞌees! Nuuyyo deꞌuwaa immiday a gidiyo gishshawu, i maaddennan paxa deꞌokko woy qaaxxokko. (Oos. 17:27, 28) I keehi alꞌꞌo imota gidida ba maxaafaa, Geeshsha Maxaafaa nuussi immiis. Tasalonqqe Kiristtaaneti Xoossaa qaalaa ekkidoogaadan, nuuni he qaalaa Xoossaa kiitadan nashshidi ekkoos.—1 Tas. 2:13.

¹⁹ Xoossaa Qaalay nuna maaddiyo gishshawu, Yihoowakko shiiqida; qassi ikka nuukko shiiqiis. (Yaaq. 4:8) Saluwan deꞌiya nu Aaway nuuyyo ba dirijjitiyaa yara gidiyo maalaalissiya maataa immiis. He ufayssiyaabaa nuuni keehi nashshoos! Mazamuraawee, “GODAA galatite! Aissi giikko, i keha, aggenna a siiqoi merinaagaa” yaagidi yexxiyoogan ufayssiya hanotan hegaadan nashshiis. (Maz. 136:1) “Aggenna a siiqoi merinaagaa” giya azmaachee Mazamure 136n, 26 sohuwan deꞌees. Nuuni Yihoowayyo ammanettikko, qassi i ba dirijjitiyaa baggaara nuuyyo immiyo kaaletuwaa kaallikko, i nuuyyo merinaa deꞌuwaa immana; qassi i merinawu nuuyyo ammanettana!