Xoossay Nebaa Akeekii?

MERETAAPPE NUUNI AY TAMAARIYOO?

Asa dabbotan keehi matattiyaageetuppe issuwaa gidida issi mala menttetu dabbotabaa qoppa. Eti keehi siiqettoosona. Menttetubaa xannaꞌiya dirijjitiyaa halaafiyaa, bawukka mentte gidida Nansi Sigala, haray atto “eti qonccissennan eta qofaa akeekiya urawu issibaa yootiyoogee ay malakko” issi issi mentteti eriyoogaa yootaasu. Issi maccaasiyaa iyyoonne I mentte michcheeyyo issoy issuwawu siyettiyaabaa hagaadan qonccissaasu: “Nuuni issoy issuwaabaa ubbabaa eroos.”

Hegaadan akeekanaadan oottiyaabi aybee? Heeraynne diccido hanotay hegawu gaaso gidana danddayikkonne, issi mala menttetu jiinee keehi issi mala gidiyoogee waanna gaaso milatiyoogaa xinaatee qonccissees.

HAGAA QOPPA: Nuna medhdhidaagee nuna ubbaa ooppenne aaruwan eriyoogee qoncce. Mazamurawee Daawiti hagaadan giis: “Ta aayee uluwan tana neeni tiladasa. Taani geema sohuwan merettiyo wode, ta meqettati neeppe geemmibookkona. . . . Yelettibeenna ta bollaa ne aifee be7iis. . . . [Eti] ubbati ne mazggafan xaafettidosona.” (Mazamure 139:13, 15, 16) Nu jiiniyaa, qassi nuuni nu deꞌuwan beꞌido, nu eeshshaa molidabaa eriyaynne loyttidi akeekiyay Xoossaa xalla. Xoossay nunanne nu jiiniyaa loytti eriyoogee I nubaa ubbabaa akeekiyoogaa nuuni ammanettanaadan oottees.

XOOSSAA AKEEKAABAA GEESHSHA MAXAAFAY NUNA AY TAMAARISSII?

Daawiti hagaadan woossiis: “Abeet GODAU, neeni tana qoradasa; qoradakka eradasa. Taani aude, uttiyaakkonne aude eqqiyaakko, neeni eraasa; neeni ta qofaa ubbaa haahuwan akeekaasa. Abeet GODAU, taani ta inxxarssan issi qaala haasayanaappe kasetada, neeni ta qofaa ubbaa eraasa.” (Mazamure 139:1, 2, 4) Hegaa bollikka, Yihooway nuussi siyettiyaabaa akeekeesinne ubba qassi nu “qofan de7iya halchchuwaa ubbaakka erees.” (1 Hanidabaa Odiya 28:9; 1 Sameela 16:6, 7) Ha xiqiseti Xoossaabaa ay qonccissiyoonaa?

Nuuni Xoossaa woossiyo wode, nu qofaanne nuussi siyettiya ubbabaa qonccissidi yootana xayikkonne, nuna Medhdhidaagee nuuni ay oottiyaakko xeelliyoogaa xalla gidennan, nuuni hegaa aybissi oottiyaakkokka akeekees. Qassi, nuuni wozanappe koyiyoobaa oottana danddayennaba gidikkonne, nuuni oottanawu koyiyo loꞌꞌobaa I akeekees. Nu wozanan koyroppekka siiquwaa wottiday Xoossaa gidiyo gishshawu, nuuni siiquwan qoppiyoobaa beꞌanawunne akeekanawu I koyiyoogee, ubba qassi yeemottiyoogee qoncce.—1 Yohaannisa 4:7-10.

Geeshsha Maxaafay nuna minttettiyoobaa

• “Godaa aifee xillotukko xeellees; qassi i ubba wode eta woosaa ezggees.”—1 PHEEXIROOSA 3:12.

• Xoossay, “Taani nena erissananne neeni baanau bessiya ogiyaa nena tamaarissana; taani nena zorananne naagana” giidi qaalaa geliis.—MAZAMURE 32:8.

XOOSSAY KEEHI QARETTEES

Nu hanotaanne nuuyyo siyettiyaabaa Xoossay akeekiyoogaa eriyoogee metuwan genccanaadan nuna maaddana danddayii? Nayjeeriyaa biittan deꞌiya Ano gakkidabaa qoppa. A hagaadan gaasu: “Ta hanotay keehi iita gidiyo gishshawu, deꞌuwan deꞌiyoogee bessiyaabakkonne siraas. Taani xanttaa kansseriyaa sahettada shuhettana, qassi kemoterapiyaanne rediyoterapiyaa giyo akkamuwaa akkamettanawu koshshido wode, haydrosefales (golddigotta malabay guuggiyan keehi dariyoogaa) giyo sahuwaa sahettada hosppitaaliyan deꞌiya ta guutta naꞌiyo xeelliya amꞌꞌe. Gashee keehi goobido ta naꞌeera issi wodiyan hosppitaaliyan deꞌiyoogee tawu keehi deexxiis.”

Ana genccanaadan aybi maaddidee? A hagaadan gaasu: “‘Asa eratettaa ubbaappe aadhdhiya Xoossaa sarotettai intte wozanaanne intte qofaa . . . naagana’ yaagiya Piliphphisiyuusa 4:6, 7 mala xiqiseta taani wotta dentta qoppaas. Taani ha xiqisiyaa hassayo payduwan, taani tana eriyoogaappe aaruwan Yihooway tabaa akeekiyoogaa eriyo gishshawu aara keehi siiqettiyaabadan tawu siyettees. Qassi Kiristtaane gubaaꞌiyan deꞌiya, taani siiqiyo ishanttinne michchontti tana keehi minttettidosona.

“Ta payyatettaabay tana haꞌꞌikka baaxeyikkonne, ta hanotaynne ta naꞌee hanotay kaseegaappe loꞌꞌo. Yihooway nunaara deꞌiyo gishshawu, nuuni meto wode iitabaa qoppennan aggiyoogaa tamaarida. Yaaqooba 5:11 nuna hagaadan minttettees: ‘Danddayidi genccidaageeta nuuni anjjettidaageeta geettees. Iyyooba genccaa intte siyideta; qassi Godai ayyo wurssettan immidoogaakka be7ideta. Aissi giikko, Godai maarotainne qaretai kumidoogaa.’” Yihooway Iyyoobabaa wottiyoobi baynna hanotan akeekiis; qassi nuna gakkiya ayba metuwaakka I hegaadan akeekiyoogaa ammanettana danddayoos.