Hassayay?

Mati kiyida Wochiyo Keelaa maxeeteta loyttada nabbabadii? Yaatikko, kaallidi deꞌiya oyshata zaarana danddayay?

Xoossay nuussi qarettiyoogaa bessiya Geeshsha Maxaafay yootiyo naqaashay aybee?

Beni Israaꞌeelati Gibxxen aylle gidido wode, Xoossay eta waayiyaanne eta seelaa akeekiis. (Kes. 3:7; Isi. 63:9) Nuuni Xoossaa leemisuwan merettido gishshawu qarettana danddayoos. Nuuni I nuna siiqana bessenna giidi qoppana danddayikkonne I nuussi qarettees.—wp18.3, sinttaa 8-9.

Yesuusi tamaarissido timirttee asaa lagiyoogaa agganaadan waati maaddidee?

Yesuusi saꞌan deꞌiyo wode daro Ayhudati asaa lagoosona. Kiristtoosi issi uri bana ziqqi oottana koshshiyoogaa mintti qonccissiis, qassi zariyan axiraariyoogaa Yesuusi boriis. A kaalliyaageeti issoy issuwaa ishadan xeellanaadan I zoriis.—w18.06, sinttaa 9-10.

Muusee Hidootaa Biittaa gelennaadan Xoossay diggidoogaappe nuuni ay tamaariyoo?

Muusee Yihoowawu mata dabbo. (Zaa. 34:10) Bazzuwan hemettido 40 layttaa wurssettaa heeran, asay haattay baynna gishshawu naaꞌꞌanttuwaa amassaliis. Muusee zaallawu haasayanaadan Xoossay yootiis. SHin, Muusee zaallaa shociis. Yihooway hanqqettidoy Muusee A kaaletuwaa kaallibeenna woy Muusee Xoossay maalaalissiyaabaa oottidoogawu A bonchchissibeenna gishshataassa gidennan waayi aggana. (Qoo. 20:6-12) Hagee Yihoowawu azazettiyoogeenne A bonchchissiyoogee keehippe koshshiyaaba gidiyoogaa nuna tamaarissees.—w18.07, sinttaa 13-14.

Nuuni beꞌiyooban coo pirddikko, waanidi sohuwaara balana danddayiyoo?

Asay darotoo beettiyaabaa kaalliyo heezzu ginati deꞌoosona; hegeetikka zariyaa woy qommuwaa, duretettaanne layttaa. Xoossaagaadan nuuni asa lagennaageeta gidiyoogee keehi koshshiyaaba! (Oos. 10:34, 35)—w18.08, sinttaa 8-12.

Cimida Kiristtaaneti harata ayba ogetun maaddana danddayiyoonaa?

Ooratta oosoy imettido cimida Kiristtaaniyaa Xoossay ubbatoo nashettees, qassi harata maaddanawu keehi darobaa oottana danddayees. I ammanenna aqo laggetanne ayyaanaaban shuggidaageeta maaddana, qassi Geeshsha Maxaafaa xannaꞌissananne ba haggaazuwaa aassana danddayees.—w18.09, sinttaa 8-11.

Kiristtaaneti Tamaarissanawu Goꞌettiyo Waanna Miishshati aybee?

Xomoosanawu maaddiya karddetinne shoobe woraqatati deꞌoosona. Wochiyo Keelaanne Beegottite! maxeeteta gujjin, loytti giigissido hosppun traktteti deꞌoosona. Tamaarissanawu goꞌettiyo waanna miishshatun amarida brooshureti, xannaꞌissiyo naaꞌꞌu waanna maxaafatinne Geeshsha Maxaafaa Xannaꞌana Koshshiyoy Aybissee? giyo biiduwaa gujjin, maaddiya oyddu biidotikka deꞌoosona.—w18.10, sinttaa 16.

Leemiso 23:23y yootiyoogaadan issi Kiristtaanee waati ‘tumaa shammana’ danddayii?

Nuuni tumawu miishsha qanxxokko. SHin, nuuni tumaa demmanawu wodiyaanne baaxiyaa koshshees.— w18.11, sinttaa 4.

Hooseꞌi ba machchiyo Goomero oyqqido hanotaappe nuuni ay tamaarana danddayiyoo?

Goomera zaaretta zaarettada wodiraa laammikkonne, Hooseꞌi iyyo atto giidi iira deꞌiis. Issi Kiristtaane aqo laggee shaaramuxikko, mooribeenna aqo laggee atto gaana danddayees. Moorida aqo laggee zaarettidi mattumaa gayttiyoogee Geeshsha Maxaafay yootiyoogaadan paraman shaahettennaadan oottees.—w18.12, sinttaa 13.