“Xoossai Issippe Gattidoogaa” Bonchchite

1, 2. Ibraawe 13:4y ay oottanaadan nuna denttettana koshshii?

INTTE Yihoowa bonchchiyoogan ufaytteetii? Ufayttiyoogee erettidaagaa! Intte bonchchiyoogee awu bessiyaaba; qassi I inttena bonchchanawu qaalaa geliis. (1 Sam. 2:30; Lee. 3:9; Ajj. 4:11) Hegaa bollikka, kawotettan sunttettidaageetu mala asata intte bonchchanaadankka I koyees. (Roo. 12:10; 13:7) SHin nuuni bonchchuwaa bessana koshshiyo issi dumma ginay deꞌees. Hegee aqo deꞌuwaa.

² Kiitettida PHawuloosi, “Ekkiyoogaanne geliyoogaa asai ubbai bonchchanau bessees; qassi azinainne machchiyaa issoi issuwau ammanettanau bessees” yaagiis. (Ibr. 13:4) PHawuloosi beꞌidobaappe denddidaagan aqo deꞌuwaabaa yootibeenna. He xiqisee Kiristtaaneti bantta aqo deꞌuwaa alꞌꞌobadan, xoqqu oottidi xeellanaadan azazees, ubbakka mintti yootees. Neeni aqo deꞌuwaa, ubba qassi aqo oyqqidaba gidikko, ne aqo deꞌuwaa hegaadan xeellay?

3. Yesuusi aqo deꞌuwaa xeelliyaagan keehi koshshiya ayba zore zoridee? (Doomettan deꞌiya misiliyaa xeella.)

³ Aqo deꞌuwaa bonchchiyoogan, inttessi loꞌꞌo leemiso gidiyaageeti deꞌoosona. Yesuusi aqo deꞌuwaa bonchchiis. Machchiyo yeddiyoogaa xeelliyaagan Parisaaweti Yesuusa oychchido wode, I Xoossay koyro aqo deꞌuwaabaa yootidobaa hagaadan giis: “Hegaa gishshau, issi asi ba aawaanne ba aayyiyo aggi bayidi, ba machcheera issippe de7ees.” Yesuusi gujjidi, “Xoossai issippe gattidoogaa asi shaakkoppo” yaagiis.—Marqqoosa 10:2-12 nabbaba; Doo. 2:24.

4. Yihooway aqo deꞌuwawu essido maaray aybee?

⁴ Hegaa gishshawu, aqo deꞌoy Xoossay doomissidobanne ubbatoo minnidi deꞌana bessiyaaba gidiyoogaa Yesuusi yootiis. Xoossay koyro aqo deꞌuwaa doomissido wode, I Addaameenne Hewaana paraman shaahettana danddayiyoogaa yootibeenna. Issi asi issi ura xallaa ekkanaadan woy gelanaadan Edenen he aqo deꞌuwan maaray eqqiis; qassi eti “naa77ai” duuxxenna issippetettan deꞌoosona.

AQO DEꞌUWAN GUUTTA WODIYAWU LAAMETTIYAABAA

5. Hayqoy aqo deꞌuwaa waati qohii?

⁵ SHin Addaame nagaray darobay laamettanaadan oottidoogaa intte ereeta. Hegeetuppe issoy aqo deꞌoy qohettanaadan oottiya hayquwaa. Kiitettida PHawuloosi Kiristtaaneti Muuse Higgiyaa garssan deꞌennaagaa qonccissiyo wode yootidobaappe nuuni hegaa akeekana danddayoos. I aqo laggeta shaakkiyay hayqo gidiyoogaanne paxa deꞌiya aqo laggee hegaappe simmin aqo oyqqana danddayiyoogaa qonccissiis.—Roo. 7:1-3.

6. Muuse Higgee aqo deꞌuwaa xeelliyaagan Xoossaa qofaa waatidi qonccissidee?

⁶ Xoossay Israaꞌeelatussi immido Higgee aqo deꞌuwaabaa loytti qonccissees. Xoossay Israaleelatussi Higgiyaa immanaappe kasekka deꞌiya dawuttiyo meezee Higgiyan paqqadettiis. Gidoppe attin, dawuttiyoogee qohennaadan Higgee teqqees. Leemisuwawu, Israaꞌeela asi ashkkariyo ekkidi guyyeppe hara machchiyo ekkikko, I koyro machcheeyyo qumaa, maayuwaanne aqo deꞌuwan koshshiyaabaa diggana bessenna. I O naaganaadaaninne iyyo qoppanaadan Xoossay koyees. (Kes. 21:9, 10) Nuuni ha wodiyan Muuse Higgiyaa kaallokko; shin aqo deꞌuwaa Yihooway xoqqu oottidi xeelliyoogaa hegaappe akeekana danddayoos. Hegee intte aqo deꞌuwaa xoqqu ootti xeellanaadan maaddennee?

7, 8. (a) Zaarettido Wogaa 24:1y yootiyoogaadan, paraman shaahettiyoogaabaa Higgee yootiyoobay aybee? (b) Paraman shaahettiyoogaa Yihooway waati xeellii?

⁷ Paraman shaahettiyoogaabaa Higgee yootiyoobay aybee? Xoossay aqo deꞌuwaa xoqqu oottidi xeelliyoogaa aggibeenna; shin paraman shaahettanaadan paqqadiis. (Zaarettido Wogaa 24:1 nabbaba.) Israaꞌeela asi ‘issi iitabaa ba machchee bolli demmikko,’ O yeddana danddayees. “Issi iitabaa” geetettidabi aybakko Higgee yootenna. Hegee guutta mooro gidennan, yeellayiyaabaa woy wolqqaamaba gidiyoogee qoncce. (Zaa. 23:14) Yesuusa wode daro Ayhudati “issiban gaasottidi” bantta machchota yeddidoogee azanttiyaaba. (Maa. 19:3) Nuuni etaagaadan qoppana koyennaagee qoncce.

⁸ Paraman shaahettiyoogaa xeelliyaagan Xoossaa qofaa hananabaa yootiya Milkkiyaasi qonccissiis. He wode issi asi geella eeqaassi goynniya yelagiyo ekkanawu ‘ba yelagatettan ekkido machcheeyyo’ ammanettennan aggidi O yeddiyoogee meeze gididaba. Xoossaa qofaa xeelliyaagan Milkkiyaasi, “Azinai ba machchiyo yeddiyoogaa ixxais” yaagiis. (Mil. 2:14-16) Hegee asi “ba machcheera issippe de7ees; eti naa77ai issi asho gidoosona” yaagidi Xoossaa Qaalay koyro aqo deꞌuwaabaa yootiyoobaara maayees. (Doo. 2:24) Yesuusi, “Xoossai issippe gattidoogaa asi shaakkoppo” yaagiyoogan, aqo deꞌuwaa xeelliyaagan ba Aawaa qofaa yaa minttiis.—Maa. 19:6.

PARAMAN SHAAHETTANA DANDDAYIYO MEXI ISSI GAASUWAA

9. Yesuusi Marqqoosa 10:11, 12n yootidobaa nuuni waati akeekana koshshii?

⁹ ‘Issi Kiristtaanee paraman shaahettananne zaarettidi ekkana woy gelana danddayiyo gaasoy deꞌii?’ yaagidi, issi uri oychchana danddayees. Yesuusi giidobaa akeeka: “Ba machchiyo yeddidi, haranniyo ekkiya urai ooninne ba machchen shaaramuxees. Qassi maccaarakka ba azinaappe kiyada hara azinaa gelikko shaaramuxausu.” (Mar. 10:11, 12; Luq. 16:18) Hegaa gishshawu, Yesuusi aqo deꞌuwaa bonchchiyoogeenne haratikka bonchchanaadan koyiyoogee qoncce. Guuttabaa gaasoyidi ammanettida ba machcheeppe (woy ammanettida ba azinaappe) paraman shaahettiyaanne haraa ekkiya woy geliya uri shaaramuxees. Paraman shaahettiyoogaa xallay aqo deꞌuwawu wurssetta gidenna gishshawu, hegee shaaramuxiyoogaa gidiyoogee tuma. Xoossaa sinttan eti naaꞌꞌay haꞌꞌikka “issi asa.” Hegaa bollikka, issi uri mooroy baynnan ba machchiyo yeddiyoogee A shaaramuxanaadan oottiyoogaa Yesuusi yootiis. Waatidi? Azinay yeddido maccaasiyaa he wode miishshaa maaduwaa demmana mala haranttuwaa gelana koshshiyaabadan qoppana danddayawusu. Hegaadan geliyoogee wodiraa laammiyoogaa.

10. Issi Kiristtaanee paraman shaahettananne haranttuwaa ekkana woy gelana danddayiyo gaasoy aybee?

¹⁰ Aqo deꞌoy laalettana danddayiyo gaasuwaa Yesuusi hagaadan giis: “Taani intteyyo odais; ba machchiyo shaaramuxennan [Giriikettuwan, porniyaa] de7ishin yeddidi, haranno ekkiya ooninne shaaramuxees; harai yeddidooro ekkiyaageekka shaaramuxees.” (Maa. 19:9) Yesuusi deriyaa bolli tamaarissido timirttiyan hegaara issi malabaa yootiis. (Maa. 5:31, 32) Yesuusi naaꞌꞌu wodetunkka ‘shaaramuxiyoogaabaa’ yootiis. He qofay aqo laggiyaara gidennan mattumaa gayttiyoogan oottiyo dumma dumma nagaraa qonccissees; hegeetikka wodiraa laammiyoogaa, shaaramuxiyoogaa, aqo lagge gidennaageeti mattumaa gayttiyoogaa, mattuman issi mala gidida asaara mattumaa gayttiyoogaanne asay mehiyaara mattumaa gayttiyoogaa. Leemisuwawu, aqo oyqqida uri shaaramuxikko, A keettaayiyaa paraman shaahettanawu woy agganawu kuuyana danddayawusu. A shaahettikko, Xoossaa xeelan eta aqo deꞌoy laalettees.

11. Geeshsha Maxaafay yootiyo gaasoy deꞌishinkka, issi Kiristtaanee paraman shaahettennaadan kuuyana danddayiyoy aybissee?

¹¹ Yesuusi aqo laggee shaaramuxiyoogee (porniyaa) paraman shaahettanaadan oottiyoogee attenna gibeennaagaa akeeka. Leemisuwawu, azinay pokkobaa oottikkonne, machchiyaa aara deꞌanawu doorana danddayawusu. A haꞌꞌikka ba azinaa siiqana danddayawusu; qassi awu atto gaanawunne bantta aqo deꞌoy giiganaadan baaxetada A maaddanawu koyana danddayawusu. A paraman kiyada haranttuwaa gelana xayikko, O metoy gakkana. Asatettaabaaninne mattuman iyyo koshshiyaabay shin? Boorasiyaa shin? Qoppana koshshiyo naati deꞌiyoonaa? Paraman shaahettiyoogee eta tuman dichchanawu metootanaadan oottanee? (1 Qor. 7:14) Paraman shaahettida, aynne mooribeenna uri metootanaagee qoncce.

12, 13. (a) Hooseꞌa aqo deꞌuwan aybi hanidee? (b) Hooseꞌi Goomero ayssi zaaridee, qassi ha wodiyaa aqo deꞌuwawu nuuni hegaappe ay tamaarana danddayiyoo?

¹² Hananabaa yootiya Hooseꞌa gakkidabaappe aqo deꞌuwaa Xoossay waati xeelliyaakko darobaa tamaaroos. Hooseꞌi “shaaramuxa” gidana maccaasiyo (Goomero) ekkanaadaaninne ‘shaaramuxan yelettana naatu’ aawaa gidanaadan Xoossay yootiis. Goomera “shahaarada, attuma na7a [Hooseꞌawu] yelaasu.” (Hoo. 1:2, 3) Guyyeppe, A issi naꞌiyoonne issi naꞌaa yelaasu; he naaꞌꞌatakka wodiraa laammiyoogan yelennan aggukku. Goomera zaara zaarada wodiraa laammikkonne, Hooseꞌi O yeddibeenna. Wurssettan, A Hooseꞌappe shaahettada aylle gidaasu. SHin I shammidi O bawu zaariis. (Hoo. 3:1, 2) Israaꞌeelati ayyo ammanettennan ixxidi hara xoossatuyyo goynni simmin, Yihooway waatidi etawu zaaretti zaaretti atto giidaakko qonccissanawu Hooseꞌa goꞌettiis. Hagaappe nuuni ay tamaarana danddayiyoo?

¹³ Issi Kiristtaane aqo laggee wodiraa laammikko, mooribeenna Kiristtaanee kuuyana bessees. Aynne mooribeenna aqo laggee paraman shaahettananne haranttuwaa ekkana woy gelana danddayiyoogaa Yesuusi yootiis. Hara baggaara qassi, mooribeenna aqo laggee atto gaana danddayees. Hegee bala gidenna. Hooseꞌi Goomero zaariis. Goomera Hooseꞌa soo ya simmada, hara uraara mattumaa gayttana bessenna. Hooseꞌi amarida wodiyawu Goomeriira ‘mattumaa gayttibeenna.’ (Hoo. 3:3, NW) SHin, guyyeppe Hooseꞌi zaarettidi iira gayttennan waayi aggana. Hegee Xoossay Israaꞌeelata baakko zaaranawunne etaara dabbotidi deꞌanawu eeno giidoogaa bessiyaaba. (Hoo. 1:11; 3:3, 5) Hegee aqo deꞌuwaabaa nuna ha wodiyan ay tamaarissii? Mooribeenna aqo laggee shaahettennan agganawu kuuyikko, zaarettidi mattumaa gayttiyoogee atto giidoogaa bessees. (1 Qor. 7:3, 5) Yaatiyoogee paraman shaahettanaadan oottiyaabay attidoogaa bessiyaaba. Hegaappe simmin eti azinanne machcho gididi aqo deꞌuwaa Xoossaagaadan xeellanawu baaxetana koshshees.

AQO DEꞌOY GIIGENNAN IXXIKKONNE BONCHCHITE

14. Aqo deꞌuwan aybi hanana danddayiyoogaa 1 Qoronttoosa 7:10, 11y yootii?

¹⁴ Aqo deꞌuwaa Yesuusaagaadaaninne Yihoowaagaadan xeellanawu ubba Kiristtaaneti baaxetana koshshees. SHin, asay nagaranchcha gidiyo gishshawu, issoti issoti hegaadan oottennan aggana danddayoosona. (Roo. 7:18-23) Hegaa gishshawu, koyro xeetu layttan issi issi Kiristtaanetu aqo deꞌoy giigennan ixxidoogee nuna garamissana koshshenna. PHawuloosi, “Machchiyaa ba azinaappe shaahettuppu” giikkonne, issi issitoo hegee haniis.—1 Qoronttoosa 7:10, 11 nabbaba.

15, 16. (a) Aqo deꞌuwan metoy merettiyo wode, aqo laggeti ay halchchana koshshii, qassi aybissi? (b) Aqo laggee ammanennaagaa gidikko, hegee waani oosuwan peꞌii?

¹⁵ Hegaadan shaahettanaadan oottiday aybakko PHawuloosi yootibeenna. Leemisuwawu, machchiyaa paraman shaahettada haranttuwaa gelanaadan gaaso gidiya pokkobaa azinay oottibeenna. PHawuloosi ba azinaappe shaahettida machchiyaa ‘gelennan deꞌana woy ba azinaara sigettana’ koshshiyoogaa yootiis. Yaatiyo gishshawu, haꞌꞌikka eti naaꞌꞌay Xoossaa sinttan issuwaa. Gaaso gidida metoy ayba gidinkka, aqo laggee shaaramuxana xayikko, eta halchchoy sigettanaassa gidana koshshiyoogaa PHawuloosi yootiis. Eti cimata maaduwaa oychchana danddayoosona. Cimati oossinne exatennan, Geeshsha Maxaafaappe zorana danddayoosona.

¹⁶ Xoossay kessido maaran deꞌanawu koyiya ammaniya aqo laggee issuwaa xalla gidikko, daro metoy merettana danddayees. Aqo deꞌuwan metoy merettiyo wode shaahettiyoogee bessiyaabee? Qommoora beꞌidoogaadan, shaaramuxiyoogee paraman shaahettanaadan oottana danddayiyoogaa Geeshsha Maxaafay yootees, shin shaahettanawu gaaso gidiya dumma dummabaa yootenna. PHawuloosi, “Ammanenna azinai de7iyo ammaniya machchiyaa de7ikko, i azinai iira issippe de7iyoogaa a dosikko, appe shaahettuppu” yaagiis. (1 Qor. 7:12, 13) Hegee ha wodiyankka oosuwan peꞌees.

17, 18. Issi issi Kiristtaanetu aqo deꞌuwan metoy merettikkonne, eti shaahettibeennay aybissee?

¹⁷ ‘Ammanenna azinati’ issi issi hanotatun bantta machchotuura ‘issippe deꞌanawu dosennaagaa’ bessidosona. Ammanenna azinay A ba payyatettawu woy ba shemppuwaa hirggana gakkanaassi, O asatettan keehi qohana danddayees. I iyyoonne ba soo asawu koshshiyaabaa kunttennan ixxana danddayees, woy ayyaanaaban A keehi qohettanaadan oottana danddayees. Hegaa mala hanotatun, issi issi Kiristtaaneti azinay ay giikkonne, eti I ‘issippe deꞌanawu dosenna’ giidi, shaahettana koshshiyaabadan kuuyidosona. SHin hegaa mala hanotatun hara Kiristtaaneti bantta aqo laggiyaara issippe deꞌanawu kuuyidosona. Eti genccidosona; qassi bantta aqo deꞌuwaa giigissanawu baaxetidosona. Aybissi?

¹⁸ Hegaadan shaahettida naaꞌꞌay haꞌꞌikka aqo lagge. Eti shaahettidi deꞌikko, qommoora odettidaagaadan, eta metoy gakkana. Kiitettida PHawuloosi issippe deꞌana koshshiyo hara gaasuwaa yootiis. I hagaadan giis: “Ammanenna azinai ammaniya machcheera de7idi geeyiis. Qassi ammanenna machchiyaa ba ammaniya azinaara de7ada geeyaasu. Hegee bainnaakko, intte naati tuna; shin ha77i eti geeshsha.” (1 Qor. 7:14) Keehi metiya hanotan, ammanettida daro Kiristtaaneti ammanenna aqo laggiyaara deꞌidosona. Eta aqo laggee guyyeppe Yihoowa Markka gidido wode, eti hegaadan oottidoogan keehi ufayttidosona.—1 Qoronttoosa 7:16 nabbaba; 1 PHe. 3:1, 2. 

19. Aqo deꞌuwan ufayttiya daroti Kiristtaane gubaaꞌiyan deꞌiyoy aybissee?

¹⁹ Paraman shaahettiyoogaa xeelliyaagan Yesuusi zoriis; qassi kiitettida PHawuloosi shaahettiyoogaa xeelliyaagan ayyaanay denttettin zoriis. Xoossaa ashkkarati aqo deꞌuwaa bonchchanaadan eti naaꞌꞌaykka koyidosona. Ha wodiyan kumetta saꞌan, aqo deꞌuwan ufayttiya daroti Kiristtaane gubaaꞌiyan deꞌoosona. Ufayttiya daro aqo laggeta neeni intte gubaaꞌiyan demmana danddayaasa. Hegeeti bantta machchota siiqiya ammanettida azinatanne bantta azinata bonchchiya, siiqiya machchota; eti ubbay aqo deꞌoy bonchchettidaba gidiyoogaa bessoosona. Xoossaa Qaalay, “Hegaa gishshau, attumaagee ba aawaanne ba aayyiyo aggi bayidi, ba machcheera issippe de7ana; eti naa77aikka issi asho gidana” yaagiyoogee tuma gidiyoogaa bessiya miilooniyan qoodettiyaageeti deꞌiyoogee nuna ufayssees.—Efi. 5:31, 33.