Xoossay Sinttappe Ay Oottanee?

Metiyaabay nena gakkiyo wode, ne mata laggee nena maaddanawu issibaa oottanaadan neeni naaganaagee qoncce. Issoti issoti hegaa qoppidi, metoy eta gakkiyo wode Xoossay eta maaddibeennabadan qoppiyo gishshawu, ‘Xoossay siiqiya dabbo gidenna’ goosona. SHin, Xoossay nuna maaddiyaabaa oottiis; hegaa bollikka ha wodiyan nuna gakkiya metuwaanne tuggaa xayssanawu issi issibaa oottana. Xoossay sinttappe ay oottanee?

IITATETTA UBBAA XAYSSANA

Xoossay iitatetta ubbawu pulttuwaa xayssiyoogan iitatettaa xayssana. Geeshsha Maxaafay ‘ha mule saꞌay xalahe halaqan haarettiyoogaa’ yootiyoogan he pulttoy oonakko qonccissees. (1 Yohaannisa 5:19) Yesuusi Seexaanaa Dabloosa ‘ha saꞌaa haariyaagaa’ yaagiis. (Yohaannisa 12:31) Seexaanay ha alamiyaa haariyoogee ha saꞌan deꞌiya meto ubbawu waanna gaaso. Yaatin Xoossay waatanee?

Hayquwaa kaalettiya wolqqay deꞌiyo “xalahe halaqaa” Xoossaa Yihooway ba Naꞌaa Yesuus Kiristtoosa baggaara matan xayssana. (Ibraawe 2:14; 1 Yohaannisa 3:8) Ubba Geeshsha Maxaafay Dabloosi xayanawu “baayyo guutta wodee attidoogaa” eriyoogaa yootees. (Ajjuutaa 12:12) Xoossay iitatettaanne iitabaa oottiyaageeta mulxxu oottidi xayssana.—Mazamure 37:9; Leemiso 2:22.

SAꞌAA GANNATE OOTTANA

Nuna Medhdhidaagee iitatetta ubbaa saꞌaappe xayssi simmidi, I asay saꞌan merinawu deꞌanaadan halchchidobaa polana. Nuuni demmanawu yeemuwan naagiyoobay aybee?

Merinaa sarotettaanne woppaa. “Ashkketi biittaa laattana; eti sarotettaaninne duretettaani ufaittidi daana.”—Mazamure 37:11.

Payyatettawu maaddiya daro kattaa. “Biittan daro kattai mokko; dereti kattan kamettona.”—Mazamure 72:16.

Injjetiya keettaanne ufayssiya oosuwaa. “Asati keettata keexxidi, etan de7ana; woiniyaa turatakka tokkidi, eta aifiyaa maana. . . . Taani dooridoogeeti bantta adussa wodiyau bantta kushiyaa oosuwan ufaittana.”—Isiyaasa 65:21, 22.

Hagaa malabaa beꞌanawu koyay? Matan, asay ubbay galla galla hegaadan deꞌana.

HARGGIYAANNE HAYQUWAA XAYSSANA

Ha wodiyan, ubba asay sahetteesinne hayqqees; shin sinttappe hegaadan hanenna. “Xoossaa Na7aa ammaniya ubbai merinaa de7uwaa ekkanaappe attin, xayenna mala,” Xoossay matan asay Yesuusa wozuwaa yarshshuwaappe goꞌettanaadan oottana. (Yohaannisa 3:16) Hegee ay demissii?

Harggee xayana. “Xiyoonen de7iya ooninne, ‘Taani harggais’ yaagenna; yan de7iya asaa nagarai atto geetettana.”—Yohaannisa 3:16.

Hayqoy asaa qohiyoogee attana. “Haiquwaa i merinau mittana; Ubbaa Haariya Godai aife ubbaappe afuttaa quccana.”—Isiyaasa 33:24.

Asay Merinawu deꞌana. “Xoossai nu Godaa Kiristtoos Yesuusa baggara immiyo imoi merinaa de7uwaa.”—Roome 6:23.

Hayqqidaageeti denddana. “Asai ubbai, worddoikka xilloikka haiquwaappe denddana.” (Oosuwaa 24:15) Eti Xoossay giigissido wozuwaa imotaappe goꞌettana.

He ubbabaa Xoossay waati oottanee?

WOTTIYOOBI BAYNNA KAWOTETTAY HAARANA

Xoossay asawunne saꞌawu halchchidobaa saluwaa kawotettaa baggaara polana; qassi I Yesuus Kiristtoosa he Kawotettawu kawo oottidi sunttiis. (Mazamure 110:1, 2) Yesuusi bana kaalliyaageeti, “Saluwan de7iya nu Aawau, . . . Ne kawotettai yo” giidi woossanaadan tamaarissido haaroy woy kawotettay hagaa.—Maatiyoosa 6:9, 10.

Xoossaa Kawotettay kumetta saꞌaa haarana; qassi waaye ubbaanne meto ubbaa saꞌaappe xayssana. Ha Kawotettay asaa ayssana danddayiya ay kawotettappekka aadhdhiyaagaa! Yesuusi saꞌan haggaaziyo wode “kawotettaa wonggeliyaa mishiraachchuwaa” mintti yootidoynne I erissiyo ashkkarati hegaadan oottanaadan minttettidoy hegaassa.—Maatiyoosa 4:23; 24:14.

Xoossaa Yihooway asaa keehi siiqiyo gishshawu, he maalaalissiya ubbabaa oottanawu qaalaa geliis. Hegee neeni Xoossaa eranawunne akko shiiqanawu koyanaadan oottennee? Yaatanawu dooriyoogee nena waati maaddii? Kaalliya huuphe yohoy hegaa qonccissees.