Xoossaa Kawotettaa Yesuusi Xoqqu Ootti Xeellees

Hagaappe kasetiya huuphe yohuwan beꞌidoogaadan, Yesuusi “Xoossaa kawotettaa mishiraachchuwaa” yootiyoogaa ba deꞌuwan kaseyiis. (Luqaasa 8:1) Yesuusi Israaꞌeela biittan ubbasan Xoossaa Kawotettaabaa asaa tamaarissanawu xeetan qoodettiya kilo meetiriyaa hemettiis. A haggaazuwaa xeelliyaagan oyddu Wonggeliyan xaafettidabay 100ppe dariya sohuwan Xoossaa Kawotettaabaa qonccissees. He qonccissiyoobaappe dariya baggay Yesuusi yootidobaa; gidoppe attin, i Xoossaa Kawotettaabaa yootidobaa giddon hegee keehi guutta gidennan aggenna!—Yohaannisa 21:25.

Yesuusi saꞌan deꞌiyo wode he Kawotettaa keehi xoqqu oottidi xeellidoy aybissee? Yesuusi bana he Kawotettan haaranaadan Xoossay dooridoogaa erees. (Isiyaasa 9:6; Luqaasa 22:28-30) SHin Yesuusi wogetanawu woy bonchettanawu koyibeenna. (Maatiyoosa 11:29; Marqqoosa 10:17, 18) I Xoossaa Kawotettaabaa awaajjidoy ba goꞌꞌaassa gidenna. Koyruwan, Yesuusi beni Xoossaa Kawotettana keehi ufayttanaadan oottidabay he Kawotettay i siiqiyo saluwan deꞌiya a Aawaassinne a kaalliya ammanettidaageetussi oottanabaa; i haꞌꞌikka keehi ufayttanaadan oottiyaabay hegaa.

KAWOTETTAY YESUUSA AAWAASSI AY OOTTANEE?

Yesuusi saluwan deꞌiya ba Aawaa keehi siiqees. (Leemiso 8:30; Yohaannisa 14:31) I ufayssiya ba Aawaa eeshshata, hegeetikka A siiquwaa, A qaretaanne A suure pirddaa nashshees. (Zaarettido Wogaa 32:4; Isiyaasa 49:15; 1 Yohaannisa 4:8) Hegaa gishshawu, Xoossay asaa naata metoy gakkiyo wode etawu aynne qoppenna woy i nuuni metootanaadan koyees giyoogaa mala, ba Aawaabaa asay wordduwaa yootiyoogaa Yesuusi ixxiyoogee qoncce. Yesuusi “kawotettaa wonggeliyaa mishiraachchuwaa” yootanawu keehi mishettido issi gaasoy hegaa; i he Kawotettay ba Aawaa sunttaa geeshshanaagaa he wode erees. (Maatiyoosa 4:23; 6:9, 10) Kawotettay waatidi geeshshanee?

Yihooway asaa naati goꞌettana mala, ba Kawotettaa baggaara darobaa laammana. I ammanettida asaa naatu “aifiyaappe afutta ubbaa quccana.” Yihooway “haiqoinne kayyoi woi waasoinne sahoi” xayanaadan oottidi, yeekkanaadan oottiyaabaa muleera xayssana. (Ajjuutaa 21:3, 4) Xoossay ba Kawotettaa baggaara asaa naatu meto ubbaa muleera xayssana.b

Yesuusi asaassi Xoossaa Kawotettaabaa mishettidi yootidoogee garamissiyaaba gidenna! Yesuusi ba Aaway keehi wolqqaamanne qarettiyaagaa gidiyoogaa he Kawotettay qonccissanaagaa erees. (Yaaqooba 5:11) Yesuusi i siiqiyo harata, hegeetikka ammanettida asaa naata he Kawotettay hegaadan oottiyoogan goꞌꞌanaagaakka erees.

KAWOTETTAY AMMANETTIDA ASAASSI AY OOTTANEE?

Yesuusi saꞌaa yaanaappe daro wodiyaappe kase, saluwan ba Aawaara deꞌiis. Zawi baynna xoolinttetinne gaalakiseti kumido maalaalissiya saluwaa, loꞌꞌiya saꞌaanne an deꞌiya doꞌaa gujjin, Yihooway ubbabaa ba Naꞌaa baggaara medhiis. (Qolasiyaasa 1:15, 16) Gidikkonne, ha ubbabaappe aaruwan Yesuusa asaa naati “ufaissoosona.”—Leemiso 8:31.

Yesuusa haggaazoy i asaa siiqiyoogaa bessees. I haggaazuwaa doommiyo wode, hiyyeesatussi “lo77o mishiraachchuwaa yootanau” saꞌaa yiidoogaa geeshshidi yootiis. (Luqaasa 4:18) SHin Yesuusi asaa maaddanaagaa yootidi aggiigibeenna. I asaa siiqiyoogaa bessiyaabaa darotoo oottiis. Leemisuwau, Yesuusi cora asay i yootiyoobaa siyanawu akko yiido wode, “he asau qarettiis; yaatidi etaara de7iya hargganchchata pattiis.” (Maatiyoosa 14:14) Keehi sahettida issi bitanee Yesuusi koyikko a pattana danddayiyoogaa ammaniyoogaa bessido wode, Yesuusi awu qarettiis. I he bitaniyawu qarettidi, “Taani koyais; paxa!” yaagidi a pattiis. (Luqaasa 5:12, 13) Mayraama ba ishay Alꞌꞌaazari hayqqin azzanidoogaa beꞌidi, Yesuusi “ba wozanan daro mishettiis,” “tookki shemppiis”; qassi “afuxxiis.” (Yohaannisa 11:32-36) Hegaappe simmin i maalaalissiyaabaa oottiis—Alꞌꞌaazari hayqqoosappe oyddu gallassa gidikkokka, Yesuusi a hayquwaappe denttiis!—Yohaannisa 11:38-44.

Yesuusi he wode i maaddidobay guutta wode xallaassa gidiyoogaa erees. Yesuusi i pattidoogeeti ubbay sinttappe hargganaagaa, qassi i hayquwaappe denttidoogeeti ubbay sinttappe hayqqanaagaa erees. Gidikkokka, Xoossaa Kawotettay hegaa mala meto ubbaa muleera xayssanaagaakka Yesuusi erees. Yesuusi maalaalissiyaabaa xallaa oottibeennay hegaassa; ubba i “kawotettaa wonggeliyaa mishiraachchuwaa” mishettidi sabbakiis. (Maatiyoosa 9:35) I oottido maalaalissiyaabay Xoossaa Kawotettay mata wode kumetta saꞌan oottanabaappe amaridabaa kasetidi bessiyaaba. He wodiyaa xeelliyaagan Geeshsha Maxaafay yootiyoobaa ane beꞌa.

• 

  Sahoy xayana.

  “He wode, qooqetu aifee dooyettana; tulletu haittaikka siyana. Wobbeti genessadan guppana; duudetikka ufaissan yexxana.” Hegaa bollikka, “Xiyoonen de7iya ooninne, ‘Taani harggais’ yaagenna.”—Isiyaasa 33:24; 35:5, 6.

• 

  Hayqoy xayana.

  “Xilloti biittaa laattananne yan merinau de7ana.”—Mazamure 37:29.

  “Haiquwaa i merinau mittana; Ubbaa Haariya GODAI aife ubbaappe afuttaa quccana.”—Isiyaasa 25:8.

• Hayqqidaageeti denddana.

  “Duufuwan de7iyaageeti a cenggurssaa . . . siyidi eti duufuwaappe gaxi kiyana.”—Yohaannisa 5:28, 29.

  “Haiquwaappe denddana.”—Oosuwaa 24:15.

• 

  Ubbaayyo keettaynne oosoy deꞌana.

  “He wodetun asati keettata keexxidi, etan de7ana; woiniyaa turatakka tokkidi, eta aifiyaa maana. Eti keexxin, harai de7enna; harai maanau tokkiyoobaa tokkokkona. . . . Taani dooridoogeeti bantta adussa wodiyau bantta kushiyaa oosuwan ufaittana.” —Isiyaasa 65:21, 22.

• 

  Olay xayana.

  “I sa7aa gaxaa gakkanaassi de7iya olaa teqqees.”—Mazamure 46:9.

  “Kawotettai kawotettaa bolli bisuwaa denttenna. Hegaappe guyyiyan eti mulekka olaa timirttiyaa tamaarokkona.”—Isiyaasa 2:4.

• 

  Kattay qaxuwatenna.

  “Biittai kattaa mokkiis; Xoossai, nu Xoossai nuna anjjiis.”—Mazamure 67:6.

  “Biittan daro kattai mokko; dereti kattan kamettona.”—Mazamure 72:16.

• Hiyyeesatettay xayana.

  “Hiyyeesi ubbatoo dogetti attenna.” —Mazamure 9:18.

  “A xeesiya hiyyeesata, naaqettidaageetanne maaddiyaabi bainnaageeta i ashshees. Hiyyeesatussinne manqqotussi i qarettees; hiyyeesatu shemppuwaa ashshees.”—Mazamure 72:12, 13.

Xoossay ba Kawotettaa baggaara oottanawu gelido ha qaalaa neeni beꞌiyo wode, Yesuusi he Kawotettaa xoqqu oottidi xeelliyoy aybissakko akeekadii? Ha wodiyan nuuni beꞌiyo azzanttiya meto ubbaa Xoossaa Kawotettay xayssanaagaa i eriyo gishshawu, saꞌan deꞌiyo wode, siyiya asa ubbawu he Kawotettaabaa mishettidi yootiis.

Geeshsha Maxaafay Kawotettaabaa yootiyoobay nena ufayssii? Ufayssikko, he Kawotettaabaa waatada loytta erana danddayay? Qassi he Kawotettay ehiyo anjjuwan goꞌettanawu ay oottana danddayay? Kaalliya huuphe yohuwan he oyshatu zaaruwaa beꞌana.