Xoossaa Kawotettaa​—Hegee Nena Waati Maaddanee?

Xoossaa Kawotettay Yihoowa Markkati keehi xoqqu oottidi xeelliyooba gidiyoogaa hagaappe kasetiya huuphe yohotun akeekennan aggakka. Qassi Xoossaa Kawotettay sinttappe ehaana giidi qommoora odido amaridaban neeni maalaalettennan waaya aggana. SHin hegaa mala hidootay polettana danddayiyaabeeshsha gaada sirennan aggakka.

Neeni siyiyoobaa ubbaa ammaniyoogaappe akeekan qoppiyoogee loꞌꞌoba. (Leemiso 14:15) Neeni akeekan qoppiyoogee issi issiban beni wode Beeriyana deꞌida asatuugaa mala gidana danddayees. Eti Kawotettaa mishiraachuwaa koyro siyido wode ammanikkokka, tuma gideerenneeshsha giidi amottido gishsha xalaalawu ammanibookkona. Hegaappe dumma ogiyan, “tumakkonne” akeekanawu Geeshsha Maxaafaa loyttidi pilggidosona. (Oosuwaa 17:11) Beeriyaa asati siyido mishiraachuwaa Geeshsha Maxaafay yootiyoobaara gatti xeellidosona. Eti mishiraachoy Xoossaa Qaalay tamaarissiyooba gidiyoogaa guyyeppe ammanidosona.

Yihoowa Markkati neeni etaagaadan oottana mala minttidi shoobboosona. Nuuni Geeshsha Maxaafaa miishsha qanxxissennan xannaꞌissiyoogan, Xoossaa Kawotettaa xeelliyaagan Yihoowa Markkati ammaniyoobaa Geeshsha Maxaafay tamaarissiyoobaara neeni geeddarssanaadan maaddoos.

Neeni Geeshsha Maxaafaa xannaꞌiyoogee Xoossaa Kawotettaabaa tamaaranaadankka, deꞌuwan keehi qofissiya kaallidi deꞌiya oyshatu zaaruwaa eranaadankka maaddana danddayees.

• Nuuni awuppe yiidoo?

• Deꞌuwawu halchidobi aybee?

• Xoossay tuggay deꞌanaadan paqqadidoy aybissee?

• Hayqqiyo wode nuuni waaniyoo?

• Saꞌay xayanee?

• So asaa deꞌoy ufayssiyaagaa gidanaadan maaddiya waannabay aybee?

Geeshsha Maxaafaa xannaꞌiyoogee neeni ubbabaappe aaruwan ‘Xoossaakko shiiqanaadan’ maaddees. (Yaaqooba 4:8) Qassi neeni Xoossaakko keehi shiiqiyo wode, neeni haꞌꞌissawu xalla gidennan, merinawu anjjuwaa demmanaadan Xoossaa Kawotettay waatidi maaddanaakko akeekaasa. Yesuusi, “Asai nena issi Xoossaa gididaagaa erana malanne, qassi neeni kiittido Yesuus Kiristtoosa erana mala, hagee merinaa de7o” yaagidi ba Aawaa woossiis.—Yohaannisa 17:3.