Xoossaa Kawotettawu Haꞌꞌi Exata!
Wolqqaama gotee intte moottaa matiiddi deꞌees gaada qoppa. Kawotettaa sunttati he moottaa yeddidi attiyoosaa baanaadan ubba asawu yootiiddi deꞌoosona. Neeni ay oottuutee? Attiyoosaa baqatanaagee qoncce.
Hegaadankka, Yesuusi ‘gita waayiyaa’ giido keehi qohiyaabay mata wode nuna ubbaa gakkana. (Maatiyoosa 24:21) Hegaappe attanawu issisaa baqatana danddayokko. SHin nuuni attanawu issibaa oottana danddayoos. Ay oottana danddayiyoo?
Yesuusi deriyaa bolli tamaarissidoban, “Kasetidi, Xoossaa kawotettaanne a xillotettaa koyite” giidi zoriis. (Maatiyoosa 6:33) Nuuni hegaa waati oottanee?
Kasetidi Xoossaa Kawotettaa koyite. Hegaa giyoogee Xoossaa Kawotetta nuuni aybippenne aaruwan xoqqu ootti xeellana koshshees giyoogaa. (Maatiyoosa 6:25, 32, 33) Xoossaa Kawotettaa hegaadan xeellana koshshiyoy Aybissee? Asaa metuwaa asay xayssana danddayibeenna gishshataassa. He metuwaa xayssana danddayiyay Xoossaa Kawotettaa xalla.
A xillotettaa koyite. Xoossay kessido xillotettaa higgiyaadaaninne maaraadan deꞌanawu baaxeta. Aybissi? Hegeeta shenehoo giidi loꞌꞌuwaanne iitaa nuuni nuussi kuuyikko, hegee azzanttiyaabaa kaalettana. (Leemiso 16:25) Hara baggaara qassi, nuuni Xoossay kessido maaraadan deꞌikko, Xoossaa ufayssiyoogaa xalla gidennan, nuunikka goꞌettoos.—Isiyaasa 48:17, 18.
Ubbatoo kasetidi Xoossaa Kawotettaanne A xillotettaa koyite. Issoti issoti wora simmananne danddayettida keenan daro miishshaa shiishshiyoogee woppaa demissees giidi qoppana danddayiyoogaa Yesuusi yootiis. Harati deꞌuwaassi keehi unꞌꞌettiyoogee eti Xoossaa Kawotettaa koyanawu wode xayanaadan oottana danddayees.—Maatiyoosa 6:19-21, 25-32.
SHin, Xoossaa Kawotettawu exatiyaageeti ha wodiyan banttassi koshshiyaabaa qassi sinttappe merinaa anjjuwaa demmanaagaa Yesuusi yootiis.—Maatiyoosa 6:33.
Koyro xeetu layttan, Yesuusi erissiyo ashkkarati kasetidi Xoossaa Kawotettaanne A xillotettaa koyikkonne, tugga ubbaynne meto ubbay xayin beꞌibookkona. SHin eti baqati attiyoosaa demmidosona. Waatidi?
Xoossay kessido xillotettaa maaraadan eti deꞌidoogee Xoossay yootiyoobaa shenehoo giyaageeta gakkiya metuwaappe eta naagiis. Xoossaa Kawotettaa eti minttidi ammaniyoogee eta gakkiya wolqqaama metuwaa genccanaadan maaddiis. Qassi gakkiya metuwaa eti genccanaadan “ubbaappe aadhdhiya [wolqqaa]” Xoossay etawu immiis.—2 Qoronttoosa 4:7-9.
NEENI KASETADA XOOSSAA KAWOTETTAA KOYUUTEE?
Koyro xeetu layttan deꞌida Kiristtaaneti Yesuusi kasetidi Xoossaa Kawotettaa koyanaadan yootido azazuwaa azazettidosona. Eti Kawotettaa mishiraachchuwaa saꞌaa ubban sabbakidosona. (Qolasiyaasa 1:23) Ha wodiyan, hagaadan oottiyaageeti deꞌiyoonaa?
Ee! Yihoowa Markkati Xoossaa Kawotettay ha iita alamiyaa mata wode xayssanaagaa eroosona. Hegaa gishshawu, eti: “Asa ubbau markka gidana mala, kawotettaa wonggeliyaa mishiraachchoi sa7a ubban odettana; hegaappe guyyiyan, wurssettai gakkana” giidi Yesuusi azazidoogaa polanawu banttawu danddayettida ubbabaa oottoosona.—Maatiyoosa 24:14.
Neeni mishiraachchuwaa siyuutee? Neeni Maqidooniyan deꞌiya Beeriyaa kataman koyro xeetu layttan deꞌida asaa mala gidanaadan minttettoos. Eti Xoossaa Kawotettaa mishiraachchuwaa kiitettida PHawuloosappe siyido wode, I yootidobaa “kumetta laamotan ekkidosona.” Yaatidi eti siyidobay tummakkonne shaakkanawu “Xoossaa maxaafata” loytti pilggidosona, qassi akeekidobaa oottidosona.—Oosuwaa 17:11, 12.
Neenikka hegaadan oottana danddayaasa. Kasetada Xoossaa Kawotettaanne A xillotettaa koyiyoogan, ha wodiyan naagettada deꞌananne sinttappe merinaa sarotettaanne woppaa demmana danddayaasa.