‘Gita Waayiyaa’ Wode Ammanettada Deꞌa

1-2. (a) Mata wode alamiyaa haariyaageeti ay yootanee? (b) Zaaruwaa demmana koshshiya oyshati awugeetee?

ALAMIYAA haariyaageeti kasetidi odettida “ubbabai saro; aibikka hanenna” giyo awaajjuwaa yooti simmoosona gaada qoppa. Eti ha alamee saro giidi ceeqettana danddayoosona. Kawotettati alamiyaa metuwaa ubbaa xayssana danddayoosona giidi nuuni qoppanaadan eti koyoosona. SHin, kaallidi hananabaa eti mule teqqokkona! Ayssi giikko, Geeshsha Maxaafay kasetidi yootidoogaadan, “bashshai eti qoppennan eta bolli yaana. Eti mulekka kessi ekkokkona.”—1 Tas. 5:3.

² Zaarana koshshiya oyshati deꞌoosona: ‘Gita waayiyaa’ wode aybi hananee? He wode ay oottanaadan Yihooway nuuppe koyii? Qassi gita waayiyaa wode ammanettidi deꞌanawu nuuni haꞌꞌi waani giigettana danddayiyoo?—Maa. 24:21.

‘GITA WAAYIYAA’ WODE AYBI HANANEE?

3. Ajjuutaa 17:5, 15-18y yootiyoogaadan, Xoossay “Gita Baabiloono” waati xayssanee?

³ Ajjuutaa 17:5, 15-18 nabbaba. ‘Gita Baabiloona’ xayana! Qommoora qonccidaagaadan, kawotettati he wode hananabaa teqqokkona. Aybissi? “Xoossai qoppidoogaa eti oottanaadan, eta wozanan Xoossai amuwaa [wottana]” gishshataassa. I qoppidobay aybee? Kiristtaane giyo haymaanootiyaa gujjin, worddo haymaanootiyaa ubbaa xayssanawu I qoppiis. ‘Tammu kacee’ deꞌiyo “zo7o do7aa” wozanan Xoossay ba qofaa wottana. Tammu kacee, “do7aa,” hegeekka Kawotettatu Issippetettaa maaddiya kawotettata ubbaa bessiyaaba. (Ajj. 17:3, 11-13; 18:8) He kawotettati worddo haymaanootiyaa xayssiyo wode, hegee gita waayiyaa doomettawu malaata gidana. Hegee qoppennan haniya, ubba qassi saꞌan deꞌiya ubbaa qohiya daganttiyaaba gidana.

4. (a) Kawotettati worddo haymaanootiyaa xayssiyoogawu yootana danddayiyo gaasoy aybee? (b) Kase he haymaanootetu yame gididaageeti geella ay oottanee?

⁴ Kawotettati Gita Baabiloono xayssanawu gaasoyana danddayiyoobaa nuuni erokko. Kawotettatuyyo sarotettay deꞌennaadan digganawunne kawotettati oottiyooban gelanawu alamiyaa haymaanooteti ubbatoo baaxetoosona giidi kawotettati yootana danddayoosona. Woy he haymaanooteti daro duretettaanne aquwaa dagayidosona giidi kawotettati yootana danddayoosona. (Ajj. 18:3, 7) Kawotettati worddo haymaanootiyaa bolli denddiyo wode, he haymaanootiyaa kaalliya ubba asaa waayi xayssana. SHin, kawotettati haymaanooteta muleera xayssanaba milatees. He haymaanooteti xayi simmin, kase he haymaanootetu yame gididaageeti, he haymaanooteeta kaalettiyaageeti etawu oottanawu gelido qaalaa polana danddayennaagaa akeekana. Hegaa gishshawu, kase he haymaanooteta kaalliyaageeti he haymaanootetu yame gidennaagaa yootennan waayi aggana.

5. Gita waayiyaa xeelliyaagan Yihooway ay yootidee, qassi aybissi?

⁵ Geeshsha Maxaafay Gita Baabilooni xayoy ay keena wodiyaa ekkanaakko yootenna; shin hegee daro wodiyaa ekkennaagaa nuuni eroos. (Ajj. 18:10, 21) Yihooway ba ‘doorido asatanne’ tumu haymaanootiyaa ashshanawu waayiyaa ‘gallassatu qoodaa guuttanaagaa’ yootiis. (Mar. 13:19, 20) SHin gita waayiyaanne Armmageedoona olaa doomettan ay oottanaadan Yihooway nuuppe koyanee?

YIHOOWAWU GOYNNIYO TUMU GOYNUWAWU EXATIYOOGAA

6. Worddo haymaanootiyaappe shaahettiyoogaa xallay gidennay aybissee?

⁶ Hagaappe kasetiya huuphe yohuwan beꞌidoogaadan, Yihoowawu goynniyaageeti worddo haymaanootiyaa yame gidanaadan Yihooway koyenna. SHin, hegaa xallay gidenna. Nuuni Yihoowawu haggaazanawu murttana bessees. Hegaadan oottana danddayiyo naaꞌꞌu ogeta ane beꞌoos.

7. (a) Nuuni Yihooway kandduwawu kessido xillotettaa maaraa ubbatoo waati mintti kaallana danddayiyoo? (b) Ibraawe 10:24, 25y nuuni issippe shiiqana bessiyoogaa yootiyoy aybissee, qassi hegee haꞌꞌi keehi koshshiyaaba gidiyoy aybissee?

⁷ Koyruwan, nuuni Yihooway kandduwawu kessido xillotettaa maaraa ubbatoo mintti kaallana bessees. Ha alamee oottiyo pokkobaa nuuni mule maayettana koshshenna. Leemisuwawu, attuma asay attuma asaaranne macca asay macca asaara aqo oyqqiyoogaanne mattumaa gayttiyoogaa gujjin, pokkoba gidida aybanne nuuni maayettana bessenna. (Maa. 19:4, 5; Roo. 1:26, 27) Naaꞌꞌanttuwan, nuuni nu mala Kiristtaanetuura ubbatoo goynnana koshshees. Nu SHiiquwaa Addaraashan gidin woy koshshiyaaba gidikko, Yihoowa Markkatu keettan gidin woy ubba qassi qosan gidin, awankka shiiqoos. Aybi merettikkonne, nuuni shiiquwaa biyoogaa aggana koshshenna. “Gallassai matattiyoogaa [nu] be7iyo gishshau” nuuni issippe shiiqana koshshees.—Ibraawe 10:24, 25 nabbaba.

8. Nuuni sabbakiyo kiitay sinttappe waani laamettana danddayii?

⁸ Gita waayiyaa wode, nuuni sabbakiyoobay laamettennan waayi aggana. Ha wodiyan, nuuni Kawotettaa mishiraachchuwaa sabbakoosinne erissiyo ashkkara oottanawu baaxetoos. SHin nuuni he wode loytti sabbakiyoobay wolqqaama shachchaa mala gidana danddayees. (Ajj. 16:21) Nuuni sabbakanabay Seexaanaa alamee mata wode muleera xayiyoogaa gidana danddayees. Guyyeppe, nuuni yootiyoobay ay gidanaakko, qassi hegaa waati yootanaakko loytti erana. Xeetu layttappe dariya wodiyawu sabbakanawunne tamaarissanawu nuuni goꞌettido hiillaara issi mala gididaba goꞌettanee? Woy amarida hara hiillata goꞌettanee? Nuuni erokko. Nuuni sabbakiyo hiillay ayba gidikkokka, Yihoowa pirddaa kiitaa xalidi yootiyo maatay nuuyyo deꞌanaba milatees!—Hiz. 2:3-5.

9. Nu yootiyo kiitay kawotettati waananaadan oottana danddayii, shin nuuni ay ammanettana danddayiyoo?

⁹ Nu yootiyo kiitay nuuni sabbakiyoogaa muleera digganawu kawotettati nuna wolqqanttanawu malanaadan oottanaagee qoncce. Ha wodiyan, Yihooway haggaazuwan maaddiyoogaa nuuni ammanettiyoogaadan, he wodekka I nuna maaddanaagaa ammanettana koshshees. Nuuni Xoossaa sheniyaa polanaadan I nuuyyo minotettaa immanaagaa ammanettana danddayoos.—Mik. 3:8.

MORKKETI XOOSSAA ASAA BOLLI DENDDANAAGAWU GIIGETTA

10. Luqaasa 21:25-28y kasetidi yootiyoogaadan, gita waayiyaa wode haniyaabati daro asay waananaadan oottanee?

¹⁰ Luqaasa 21:25-28 nabbaba. Asay ammanettido ubbabay gita waayiyaa wode xayuwaa doommiyoogaa beꞌidi eti dagammana. Asi deꞌido awudeegaappenne keehi iita wodiyan, eti hayqqana danddayiyo gishshawu unꞌꞌettananne hirggana. (Sof. 1:14, 15) He wode, Yihoowa asaassi deꞌoy keehi metennan waayi aggana. Nuuni ha alamiyaa bagga gidenna gishshawu, keehi metootana danddayoos. Nuussi koshshiya amaridabati deꞌennan aggana danddayoosona.

11. (a) Worddo haymaanootee xayi simmin, asaynne alamiyaa kawotettati Yihoowa Markkata xayssanawu qoppanay aybissee? (b) Nuuni gita waayiyaa yayyana koshshennay aybissee?

¹¹ Issi wode, eta haymaanootee xayido asati Yihoowa Markkatu haymaanootee xayibeenna gishshawu keehi yiillotana danddayoosona. Eti keehi yiillotidoogaa harati Intterneetiyaa malaban eranaadan oottana. Xayibeennay mexi issi nu haymaanootiyaa xalla gidiyo gishshawu kawotettatinne eta haariya Seexaanay nuna ixxana. Eti haymaanootiyaa ubbaa saꞌaappe xayssanawu halchchido halchchuwaa polibookkona. Hegaa gishshawu, eti nuna xayssanawu qoppana. He wode, kawotettati Maagooga Googa gidana.b Eti issuwaa gidana; qassi bantta wolqqa ubban Yihoowa asaa bolli denddana. (Hiz. 38:2, 14-16) Nuuni gita waayiyaa wode hananabaa, ubba qassi hegaabaa wurssi erenna gishshawu hirggiyoogaa doommana danddayoos. SHin, nuuni gita waayiyaa yayyana koshshennaagaa ammanettana danddayoos. Yihooway nuussi shemppo ashshiya kaaletuwaa immana. (Maz. 34:19) Nu ‘attiyo wodee matidoogaa’ eriyo gishshawu, nuuni ‘xoqqu giidi pude xeellana’ danddayoos.c

12. ‘Ammanettida wozannaama ashkkaray’ nuuni sinttappe hananabawu giigettanaadan nuna waati maaddidee?

¹² ‘Ammanettida wozannaama ashkkaray’ nuuni gita waayiyaa wode ammanettidi deꞌanawu giigettanaadan nuna maaddiis. (Maa. 24:45) Hegaa daro ogiyan oottiis; shin 2016-2018 gakkanawu giigida nu gita shiiqotu baggaara tamaarissido issi leemisuwaa ane qoppa. He gita shiiqotu wode shiiqida haasayati Yihoowa gallassay matiyo wode nuussi koshshiya eeshshata bessanaadan nuna minttettidosona. He eeshshata qanttan ane zaarettoos.

KASEEGAAPPE AARUWAN AMMANETTADA, GENCCADA, QASSI XALA GIDADA DEꞌA

13. Nuuni Yihoowayyo ammanettiyoogaa waati minttana danddayiyoo, qassi hegaa haꞌꞌi oottana bessiyoy aybissee?

¹³ Ammanettiyoogaa: “Yihoowayyo Ammanettite!” giya huuphe yohuwan 2016 killiliyaa shiiquwaa shiiqida. Nuussi Yihoowaara mino dabbotay deꞌikko, ayyo ammanettiyaageeta gidanaagaa he shiiqoy nuna tamaarissiis. Wozanappe woossiyoogaaninne Xoossaa Qaalaa minttidi xannaꞌiyoogan nuuni Yihoowakko shiiqana danddayiyoogaa nuna hassayissiis. Yaatiyoogee, wolqqaamaa metuwaakka xoonanaadan nuussi minotettaa immees. Gita waayee keehi matido gishshawu, nuuni nu Xoossaassinne A Kawotettaassi ammanettiyoogee kaseegaappe aaruwan paacettanaagaa naagana danddayoos. Asay nuna ubbatoo toochchennan waayi aggana. (2 PHe. 3:3, 4) Hegawu waanna gaasotuppe issoy, Seexaanaa alamiyaa bagga gidida awugaanne nuuni maaddennaagaa gidennan aggenna. Nuuni gita waayiyaa wode ammanettidi deꞌana mala ammanettiyaageeta gidiyoogan haꞌꞌi minnana bessees.

14. (a) Saꞌan Xoossaa asaa kaalettiya ishantta xeelliyaagan laamettanabay aybee? (b) He wode nuuni ammanettiyaageeta gidana koshshiyoy aybissee?

¹⁴ Gita waayiyaa wode, saꞌan Xoossaa asaa kaalettiya ishantta xeelliyaagan hanotay laamettana. He wode, saꞌan attida tiyettidaageeti ubbay Armmageedoona olan olettanawu saluwan issippe shiiqana. (Maa. 24:31; Ajj. 2:26, 27) Hegaa giyoogee Bolla Gididi Heemmiyaagee saꞌan nunaara deꞌenna giyoogaa. SHin, zaway baynna daro asawu kaaletuwaa immanawu koyettiyaabaa kunttiya ishantti hara dorssatu giddoppe deꞌana. He ishantta maaddiyoogaaninne Xoossaappe eti ekkido kaaletuwaa kaalliyoogan nuuni Yihoowawu ammanettiyoogaa bessana koshshees. Nuuni attanawu koyikko, eti immiyo kaaletuwaa kaallana bessees!

15. Nuuni kaseegaappe aaruwan waani genccana danddayiyoo, qassi yaatiyoogee haꞌꞌi keehi koshshiyoy aybissee?

¹⁵ Genccaa: “Hidootaa Qanxxoppa!” giya huuphe yohuwan 2017 killiliyaa shiiquwaa shiiqida. Kaseegaappe aaruwan metuwaa genccanaadan he shiiqoy nuna maaddiis. Nuuni gencciyoy nu wolqqaana gidennaagaa akeekida. Nuuni Yihoowan ammanettiyoogan kaseegaappe aaruwan genccana danddayoos. (Roo. 12:12) Yesuusi, “Wurssettaa gakkanaashin gencciya urai attana” giidoogaa nuuni mule dogokko. (Maa. 24:13) Metiyaabay deꞌishinkka, nuuni ammanettidi deꞌana bessiyoogaa ha xiqisee yootees. Nuuni ha wodiyan nu meto ubbaa genccikko, gita waayee doommanaappe kase nu ammanoy mino gidana.

16. Nuna xala oottiyay aybee, qassi nuuni ha wodiyan xalatettaa waati minttana danddayiyoo?

¹⁶ Xalatettaa: “Xala Gida”! giya huuphe yohuwan 2018 killiliyaa shiiquwaa shiiqida. Ha killiliyaa shiiquwaa haasayati nuuni xala gidiyoy nuussi wolqqay deꞌiyo gishshataassa gidennaagaa hassayanaadan nuna maaddidosona. Nuuni genccanawu Yihoowan ammanettana koshshiyoogaadan, xala gidanawu Yihoowan ammanettana bessees. Nuuni Yihoowan ammanettiyoogan waani yaa minnana danddayiyoo? A Qaalaa ubba galla nabbabiyoogaananne Yihooway ba asaa kase waati ashshidaakko wotti dentti qoppiyoogaana. (Maz. 68:20; 2 PHe. 2:9, 10) Gita waayiyaa wode kawotettati nu bolli denddiyo wode, nuuni xala gidananne awudeegaappenne aaruwan Yihoowan ammanettana koshshees. (Maz. 112:7, 8; Ibr. 13:6) Nuuni ha wodiyan Yihoowan ammanettikko, Googi nu bolli denddiyo wode nuussi koshshiya xalatettay deꞌana.d

NE ATOTETTAA LAAMOTAN NAAGA

17. Nuuni Armmageedoona olawu yayyana koshshennay aybissee? (Koyro sinttan deꞌiya misiliyaa xeella.)

¹⁷ Hagaappe kasetiya huuphe yohuwan beꞌidoogaadan, nuuppe daroti bantta kumetta deꞌuwaa wurssettaa gallassatun deꞌidosona. SHin nuuni gita waayiyaappe attanawukka hidootoos. Armmageedoona olay ha wurssetta gallassawu kuushsha gidana. SHin nuuni aynne yayyana koshshenna. Aybissi? Hegee Xoossay olettiyo olaa gidiyo gishshataassa. (Lee. 1:33; Hiz. 38:18-20; Zak. 14:3) Yihooway azaziyo wode, Yesuus Kiristtoosi Xoossaa wotaaddarata olawu kaalettana. Hayquwaappe denddida tiyettidaageetinne daro shaꞌu kiitanchchati Yesuusaara issippe gidana. Eti Seexaanaara, daydanttatuuranne saꞌan deꞌiya eta wotaaddaratuura olettana.—Dane. 12:1; Ajj. 6:2; 17:14.

18. (a) Yihooway gelido qaalay aybee? (b) Ajjuutaa 7:9, 13-17y sinttanaabaa neeni ammanettanaadan oottiyoy aybissee?

¹⁸ Yihooway, “Nena qohanau oottido ai miishshinne nena qohidi kantti kiyenna” yaagidi qaalaa geliis. (Isi. 54:17) Ammanettidi Yihoowayyo goynniya ‘zaway baynna daro asay,’ ‘gita waayiyaa’ paxa kanttana. Yaatidi eti aggennan Yihoowawu haggaazana. (Ajjuutaa 7:9, 13-17 nabbaba.) Sinttappe nuuni attanaagaa ammanettanaadan oottiya daro naqaashaa Geeshsha Maxaafay yootees. Yihooway ‘ammanettiyaageeta naagiyoogaa’ nuuni eroos. (Maz. 31:23) Yihoowa siiqiyaanne A sabbiya ubbay A geeshsha sunttay bonchchettin beꞌidi ufayttana.—Hiz. 38:23.

19. Mata wode nuna naagiya maalaalissiya hidootay aybee?

¹⁹ Seexaanan qohettennan ooratta alamiyan deꞌiya asaabaa qonccissiyaaba gidiyaakko 2 Ximootiyoosa 3:2-5y waani xaafettanaakko qoppa. (“He Wode Deꞌana Asaa Hanotaa” giya saaxiniyaa xeella.) Bolla Gididi Heemmiyaagaa yara gididi oottida Ishaa Jorj Gangasi, hagaadan giis: “Ubba asay Yihoowawu goynniyo wode saꞌay keehi loꞌꞌo soho gidana. Mata wode neeni ooratta alamiyan deꞌiyo maataa demmana. Neeni Yihooway deꞌiyoogaa keena wodiyaa deꞌana. Nuuni merinawu deꞌana.” Hegee tumuppe maalaalissiya hidoota!