Yihooway Neeni Ay Hananaadan Oottanee?

1. Yihooway ba halchchuwaa polanawu waatii?

YIHOOWAY ba halchchuwaa polanawu koshshiya aybanne hanees. Leemisuwawu, Yihooway tamaarissiyaagaa, minttettiyaagaa, wonggeliyaa mishiraachchuwaa yootiyaagaa gidiis. I haniyo darobaappe hageeti amaridaageeta. (Isi. 48:17; 2 Qor. 7:6; Gal. 3:8) Gidoppe attin, Yihooway ba halchchuwaa polanawu darotoo asaa goꞌettees. (Maa. 24:14; 28:19, 20; 2 Qor. 1:3, 4) Qassi Yihooway ba sheniyaa polanawu koshshiya aybanne hananawu nuussi ubbawu koshshiya aadhdhida eratettaanne wolqqaa immees. Daro eranchchati yootidoogaadan, hagee Yihoowa sunttawu deꞌiya daro birshshettatuppe issuwaa.

2. (a) Yihooway nuna goꞌettiyoogaa nuuni issi issitoo sirana danddayiyoy aybissee? (b) Ha huuphe yohuwan ay xannaꞌanee?

² Nuuppe daroti Yihooway ba sheniyaa oottanaadan I nuna goꞌettanaadan koyoos; shin issoti issoti Yihooway eta goꞌettiyoogaa sirana danddayoosona. Aybissi? Eta layttaa, eta hanotaa, woy eta wolqqaa gaasuwan eti koyiyoogaa keenaa oottana danddayennabadan etawu siyettiyo gishshataassa. Harati qassi oottiiddi deꞌiyoogee gidana, qassi loytti oottana koshshenna giidi qoppana danddayoosona. Ha huuphe yohuwan, Yihooway ba halchchuwaa polanawu I nuussi koshshiyaabaa waati immanaakko beꞌana. Qassi Yihooway A ashkkara gidida attuma asaykka macca asaykka awu eeno gaanaadaaninne wolqqaa demmanaadan waati oottidaakko yootiya Geeshshaa Maxaafaa taarikiyaa pilggana. Wurssettan, Yihooway nuna goꞌettanaadan nuuni waani eeno gaana danddayiyaakko xannaꞌana.

YIHOOWAY NUUSSI KOSHSHIYAABAA IMMIYO OGETA

3. Piliphphisiyuusa 2:13n Yihooway oottanawu qaalaa gelidoogaadan, nuuni issibaa oottanawu koyanaadan waati maaddana danddayii?

³ Piliphphisiyuusa 2:13 nabbaba.b Yihooway inttena bawu eeno gaanaadan oottana danddayees. Waatidi? Leemisuwawu, nuuni nu gubaaꞌiyan deꞌiya issi urawu maadoy koshshiyoogaa woy gubaaꞌiyan oottana koshshiyo harabaa akeekennan waayi aggana. Woy maadoy koshshiyo sohoy deꞌiyoogaa macara biiroy nuussi yootanaadan kiittido dabddaabbiyaa cimati nuussi nabbabana danddayoosona. Hegee nuuni nuna hagaadan oychchanaadan oottees: ‘Taani maaddanawu ay oottana danddayiyaanaa?’ Woy issi wolqqaama oosoy nuussi imettana danddayees; qassi nuuni hegaa loytti oottiyoogaa erennan aggana danddayoos. Woy Geeshsha Maxaafaappe amarida xiqiseta nabbabi simmidi nuna hagaadan oychchana danddayoos: ‘Taani harata maaddanawu ha xiqisiyaa waata goꞌettana danddayiyaanaa?’ Issibaa oottanaadan Yihooway nuna wolqqanttenna. SHin nuuni ay oottanaakko qoppiyoogaa Yihooway beꞌiyo wode, I nuuni qoppidobaa oottanaadan nuna maaddanawu koyees.

4. Oottanaadan nuussi Yihooway wolqqaa waati immii?

⁴ Oottanaadan nuussi Yihooway wolqqaakka immees. (Isi. 40:29) Waatidi? Nuussi deꞌiya wolqqaa bolli gujjidi I ba geeshshaa ayyaanaa nuussi immees. (Kes. 35:30-35) Issi oosuwaa waati oottana danddayiyaakko Yihooway ba dirijjitiyaa baggaara nuna tamaarissees. Neeni issi oosuwaa waata oottanaakko shaakka erennaba gidikko, I maaddanaadan oychcha. Qassi saluwan deꞌiya nu keha Aaway ‘ubbaappe aadhdhiya wolqqaa’ immanaadan awudenne oychchana danddayaasa. (2 Qor. 4:7; Luq. 11:13) Yihooway attuma asatinne macca asati bawu eeno gaanaadaaninne wolqqaa demmanaadan oottiyoogan etawu koshshiyaabaa waati immidaakko Geeshsha Maxaafay daro leemisuwaa yootees. He leemisotuppe amaridaageeta xannaꞌiyo wode, Yihooway nena etaagaadan goꞌettana danddayiyo ogeta qoppanawu mala.

ATTUMA ASATI HANANAADAN YIHOOWAY MAADDIDOBAA

5. Yihooway Muusee ba asaa ashshanaadan goꞌettido ogiyaappenne wodiyaappe nu tamaariyoobay aybee?

⁵ Muusee Israaꞌeelata ashshiyaagaa gidanaadan Yihooway oottiis. SHin Yihooway A awude goꞌettidee? Hegee “Muusee Gibxxetu aadhdhida eratettaa ubbaa [tamaari]” simmidi, danddayiyoogaadan awu siyettido wodiyaanee? (Oos. 7:22-25) CHii, I Muusee ba huuphiyaa ziqqi oottiyaagaanne ashkke gidanaadan maaddidoogaappe guyyiyan goꞌettiis. (Oos. 7:30, 34-36) Keehi wolqqaama gidida Gibxxe kawuwaa haasayissanaadan Yihooway Muuseyyo xalatettaa immiis. (Kes. 9:13-19) Yihooway Muusa goꞌettido ogiyaappenne wodiyaappe nu tamaariyoobay aybee? Yihooway baagaa mala eeshshaa bessanawu baaxetiya asatanne wolqqaa demmanawu an ammanettiya asata goꞌettees.—Pili. 4:13.

6. Kawuwaa Daawita maaddanaadan Yihooway Barzzillaaya goꞌettido hanotaappe nuuni ay tamaariyoo?

⁶ Daro wodiyaappe guyyiyan, Kawuwaa Daawita maaddanaadan Yihooway Barzzillaaya goꞌettiis. Daawitinne A asay Daawita naꞌaa Abeseloomappe baqatiyo wode asay “namisettiis, daafuriisinne saamettiis.” Barzzillaayi he wode cima; I haratuura issippe gididi Daawitayyoonne aara deꞌiyaageetuyyo koshshiyaabaa kunttanawu ba shemppuwaa daafaban yeggiichchi attiis. I cimido gishshawu Yihoowayyo aynne maaddikke giidi qoppibeenna. SHin I bawu deꞌiyaaban maadoy koshshiyo Xoossaa ashkkarata kehatettan maaddiis. (2 Sam. 17:27-29) Nuuni hegaappe ay tamaariyoo? Nu layttay ay keena gidikkonne, nu heeran gidin woy hara biittan gidin koshshiyaabaa demmanawu metootiya nu ishanttanne michchontta maaddanaadan Yihooway nuna goꞌettana danddayees. (Lee. 3:27, 28; 19:17) Nuuni biidi eta maaddennan aggana danddayoos; shin maadoy koshshiyo wodiyaaninne sohuwan ishanttanne michchontta maaddanawu kumetta alamiyan oosettiya oosuwawu miishshaa immana danddayoos.—2 Qor. 8:14, 15; 9:11.

7. Yihooway Simoona waati goꞌettidee, qassi hegee minttettiyaaba gidiyoy aybissee?

⁷ Yerusalaamen deꞌiya ammanettida cima bitanee Simooni Masiyaa beꞌennan hayqqennaagaa Yihooway yootiis. Simooni daro layttawu Masiyaa naagido gishshawu, I yootidobay Simoona keehi minttettennan aggenna. A ammanuwaa gishshawunne A genccaa gishshawu Yihooway Simoona anjjiis. Issi gallassi, Simooni “ayyaanai kaalettin” beeta maqidasiyaa geliis. I yan guutta naꞌaa Yesuusa beꞌiis; qassi Kiristtoosa gidana he naꞌaabaa hananabaa yootanaadan Yihooway Simoona goꞌettiis. (Luq. 2:25-35) Yesuusi haggaazuwaa doommanaappe kase Simooni hayqqikkonne, Yihooway A goꞌettido gishshawu nashshiis; qassi sinttappe I daro loꞌꞌobaa demmana! Ooratta alamiyan, Yesuusa haaroy saꞌan deꞌiya asay ubbay anjjettanaadan waati oottiyaakko he ammanettida bitanee akeekana. (Doo. 22:18) Ayba ogiyankka Yihoowawu haggaazanaadan I nuna goꞌettiyo gishshawu nuunikka nashshoos.

8. Yihooway Barnnaabaasa goꞌettidoogaadan nuna waati goꞌettana danddayii?

⁸ Koyro xeetu layttaa M.Ln, Yooseefa giyo keha bitanee Yihoowayyo oottanawu eeno giis. (Oos. 4:36, 37) Yesuusi kiittidoogeeti A “Minttettiya Na7aa” giyo birshshettay deꞌiyo Barnnaabaasa giidoy I harata minttettiyaagaa gidiyo gishshataassa gidennan waayi aggana. Leemisuwawu, Yesuusa ammaniyaageeta Saaꞌooli yedettido gishshawu, I Kiristtaane gidi simmin, ishanttuppe daroti akko shiiqanawu yayyidosona. SHin Barnnaabaasi Saaꞌoola minttettiisinne maaddiis; qassi Saaꞌooli hegawu A keehi nashshennan aggenna. (Oos. 9:21, 26-28) Guyyeppe, Yerusalaamen deꞌiya cimati Sooriyaa Anxxookiyan haakkidi deꞌiya ishantta minttettanawu koshshiyoogaa akeekidosona. Eti oona kiittidonaa? Barnnaabaasa! Eti likke dooridosona. Barnnaabaasi “eti ubbaikka Godan bantta kumetta wozanaappe minnidi de7anaadan eta” minttettidoogee odettiis. (Oos. 11:22-24) Ha wodiyankka hegaadan Yihooway nuuni nu ishanttanne michchontta minttettanaadan maaddana danddayees. Leemisuwawu, siiqiyo uri hayqqidoogeeta minttettanawu I nuna goꞌettana danddayees. Woy sahettida woykko unꞌꞌettida ura biidi oychchanaadan woy silkkiyan minttettanaadan I nuna denttettana danddayees. Yihooway Barnnaabaasa goꞌettidoogaadan nena goꞌettanaadan eeno guutee?—1 Tas. 5:14.

9. Vasila giyo ishay loꞌꞌo cima gidanaadan Yihooway A maaddido hanotaappe ay tamaariyoo?

⁹ Vasili giyo ishay gooba cima gidanaadan Yihooway maaddiis. Vasili cima gidiyo wode awu layttay 26; I ishanttanne michchontta, ubba qassi metootidaageeta maaddanawu danddayikke giidi qoppiis. SHin, meezee deꞌiyo cimatuppenne Kawotettaa Haggaazuwaa Timirtte Keettaappe I loꞌꞌo loohissuwaa demmiis. Vasili kaseegaappe loyttanawu minni oottiis. Leemisuwawu, I oottana danddayiyo guuttabata xaafiis. I xaafidobata loytti oottido payduwan, kaseegaappe aaruwan xaliis. I haꞌꞌi hagaadan gees: “Kase taani yayyanaadan oottiyaabay haꞌꞌi tana keehi ufayssees. Gubaaꞌiyan deꞌiya issi ishaa woy issi michchiyo minttettanawu haniya xiqisiyaa demmanawu Yihooway tana maaddiyo wode, hegee tana keehi ufayssees.” Ishanttoo, Vasiladan Yihooway inttena goꞌettanaadan intte eeno giikko, gubaaꞌiyan loytti oottanaadan I intteyyo eraa immana danddayees.

MACCA ASATI HANANAADAN YIHOOWAY OOTTIDOBAA

10. Abigaala oottidobay aybee, qassi A oottidobaappe neeni ay tamaaray?

¹⁰ Daawitanne A asata Kawuwaa Saaꞌooli yedettiyo wode eti maaduwaa koyidosona. Daawitinne A asati Israaꞌeela asa gidida Naabaala giyo duriyaa miyo guuttabaa oychchidosona. Eti bazzuwan Naabaala wudiyaa naagido gishshawu oychchanawu yayyibookkona. SHin uuzee Naabaali etawu aybanne immennan ixxiis. Daawiti hanqquwaa eexxi kiyidi, Naabaalanne A son deꞌiya attuma asa ubbaa woranawu halchchiis. (1 Sam. 25:3-13, 22) Gido shin, puulanchcha gidida Naabaala machchiyaa Abigaala keehi akeekanchcha. A xalan Daawita tohuwan wullada, I haluwaa kiyidi suuttan oyshshettennaadan minttada oychchaasu. Daawiti maaduwaa demmanawu Yihoowan ammanettanaadan kehatettan zoraasu. Abigaala haasayido liiqo qaalaynne A akeekan oottidobay Daawiti ba qofaa laammanaadan oottiis. Abigaalo kiittiday Yihoowa gidiyoogaa I akeekiis. (1 Sam. 25:23-28, 32-34) Yihooway Abigaalo goꞌettanaadan oottiya eeshshata A bessaasu. Hegaadan, hiillanchchanne akeekanchcha gidiyoogaa bessiya michchontti eti bantta soo asaanne gubaaꞌiyan deꞌiya harata minttanaadan Yihooway eta goꞌettana danddayees.—Lee. 24:3; Tii. 2:3-5.

11. SHaaluuma macca naati oottidobay aybee, qassi ha wodiyan eta leemisuwaa kaalliyaageeti oonee?

¹¹ Daro xeetu layttaappe guyyiyan, Yerusalaame dirssaa gimbbiyaa zaarettidi gimbbanaadan Yihooway goꞌettido asatu qoodan SHaaluuma macca naati deꞌoosona. (Nah. 2:20; 3:12) Eta aaway biittaa haariyaagaa gidikkonne, wayssiyaanne bantta shemppuwaa daafaban yeggiya oosuwaa oottanawu bantta dosan eeno giidosona. (Nah. 4:15-18) SHaaluuma macca naati, ‘oosuwaa ixxida’ Taqoꞌa kataman deꞌiya halaqatu mala mule gidokkona! (Nah. 3:5) Dirssaa gimbbiyaa oosoy 52 gallassatu xallan polettin SHaaluuma macca naati ay keena ufayttidaakko qoppa! (Nah. 6:15) Ha wodiyan, dumma geeshsha oosuwan, hegeekka Yihoowawu sheerettiya keettaa keexuwaaninne zaaretti giigissiyo oosuwan bantta dosan oottiya michchontti ufayssan maaddoosona. He gooba, minni oottiyaanne ammanettida michchontti he oosuwan nuussi koshshoosona.

12. Xaabitiigaadan Yihooway nuna waati goꞌettana danddayii?

¹² Xaabita ba deꞌido wode ubban ‘loꞌꞌobaa oottanaadaaninne hiyyeesata,’ ubba qassi amꞌꞌeta maaddanaadan Yihooway denttettiis. (Oos. 9:36) Xaabita wozanappe kehiyaanne loꞌꞌo asa gidiyo gishshawu, A hayqqido wode daroti yeekkidosona. SHin, kiitettida PHeexiroosi O hayquwaappe denttin eti keehi ufayttidosona. (Oos. 9:39-41) Xaabita oottidobaappe ay tamaariyoo? Nuuni yelaga gidin woy cima gidin, attuma gidin woy macca gidin, nu ubbay nu ishanttanne michchontta maaddanawu etawu koshshiyaaba oottana danddayoos.—Ibr. 13:16.

13. Uruto giyo dungguuxa michchiyo Yihooway waatidi goꞌettidee, qassi A woygadee?

¹³ Uruto giyo dungguuxa michchiyaa misoonaawe gidanawu koyaasu. A naatettan, sooppe soo baada asawu trakttiyaa eesuwan immanawu bawu danddayettida ubbabaa oottawusu. A, “Taani ha oosuwan keehi ufayttays” yaagaasu. SHin, penggen eqqidi asaa haasayissiyoogeenne haratuyyo Xoossaa Kawotettaabaa yootiyoogee O keehi metees. Uruta dungguuxa gidikkokka, iyyo layttay 18 gidiyo wode, ubba wode aqinye gidaasu. A 1946n, Giiliyaade Geeshsha Maxaafaa Timirtte Keettan tamaaraasu; qassi guyyeppe Hawaynne Jaappaane giyo biittan haggaazaasu. He biittatun sabbakiyo oosuwan A bawu danddayettida ubbabaa oottanaadan Yihooway O goꞌettiis. Uruta 80 gidiya layttawu haggaaza simmada hagaadan gaasu: “Yihooway tana ubbatoo minttiis. Dungguuxiyoogaa agganaadan Yihooway tana maaddiis. Yihooway an ammanettiya oonanne goꞌettana danddayiyoogaa taani minttada ammanays.”

YIHOOWAY NENA GOꞌETTANAADAN EENO GA

14. Efisoona 3:16, 17y yootiyoogaadan, Yihooway nuna goꞌettanaadan koyikko, nuuni ay oottana koshshii?

¹⁴ Asi deꞌido wode ubban, Yihooway ba ashkkarata daro ogiyan goꞌettiis. I neeni ay hananaadan oottanee? Hegee daro baggi neeni wozanappe minna oottanawu eeno giyoogaara gayttidaba. (Efisoona 3:16, 17 nabbaba.) Yihooway nena goꞌettanaadan neeni eeno giikko, neeni minnada mishiraachchuwaa yootiyaagaa, gooba asttamaare, loytta minttettiyaagaa, mino oosanchcha, maaddiya lagge, woy I ba sheniyaa polanawu koyiyo aybanne neeni hananaadan Yihooway oottana danddayees.

15. Koyro Ximootiyoosa 4:12, 15y yootiyoogaadan, ha wodiyan yelaga ishantti ay oottanawu banttana Yihooway maaddanaadan woossana koshshii?

¹⁵ Yelaga ishantti shin? Wolqqaara deꞌiya attumaageeti gubaaꞌiyawu oottiyaageeta gididi gubaaꞌiyaa maaddiyoogee keehi koshshees. Daro gubaaꞌetun gubaaꞌiyawu oottiyaageetu qoodaappe cimatu qooday darees. Gubaaꞌiyan deꞌiya amarida yelaga ishantti kaseegaappe aaruwan oottana koyiyoogaa tamaarana danddayiyoonaa? Issi issitoo, amarida ishantti, “Aassiyaagaa gidada oottiyoogan ufayttays” yaagoosona. Neeyyookka hegaadan siyettikko, gubaaꞌiyawu oottiyaagaa gidanawu koyanaadaaninne ayyo haggaazanawu neeyyo danddayettida ubbabaa oottanawu wolqqaa immana mala Yihooway nena maaddanaadan woossa. (Era. 12:1) Nuuyyo ne maadoy koshshees!—1 Ximootiyoosa 4:12, 15 nabbaba.

16. Nuuni Yihoowa ay oychchana koshshii, qassi aybissi?

¹⁶ Yihooway ba sheniyaa polanawu I koyiyo aybanne neeni hananaadan oottana. Hegaa gishshawu, ba oosuwawu I nena eeno giissanaadan oychcha; qassi yaatada neeyyo koshshiya wolqqaa immanaadan A oychcha. Neeni yelaga gidin woy cima gidin, haꞌꞌi ne wodiyaa, ne wolqqaanne ne aquwaa Yihoowa bonchchissanawu goꞌetta. (Era. 9:10) Kaseegaappe aaruwan Yihoowawu haggaaziyo gita maatay neeyyo imettiyo wode, hegaa neeni oottana danddayennabadan qoppada sohuwaara ixxis gooppa. Bonchchoy bessiyo nu siiqo Aawawu danddayettida ubbabaa oottiyoogee tumukka gita maata!