Sinttanaabaa Xeelliyaagan Tumaa
Neeni sinttappe hananabaa qoppa eray? Mata wode hanana keehi koshshiyaabaa Geeshsha Maxaafay nuussi yootees; qassi hegee saꞌan deꞌiya ubba asaa maaddana.
“Xoossaa kawotettai gakkana matattidoogaa” nuuni waati eranaakko Yesuusi qonccissiis. (Luqaasa 21:31) Harabata gujjin, daro olay deꞌanaagaa, biittay wolqqappe qaaxxanaagaa, daro sohuwan koshay deꞌanaagaanne wurssiya harggee yaanaagaa I kasetidi yootiis; ha wodiyan nuuni hegeeta beꞌiiddi deꞌoos.—Luqaasa 21:10-17.
Asaa haaruwan ‘wurssetta gallassatun’ hananabaappe issoy asaa iitatettaa gidanaagaa Geeshsha Maxaafay nuussi yootees. Naaꞌꞌantto Ximootiyoosa 3:1-5n deꞌiya qofaa nabbabana danddayaasa. He eeshshatanne oosota neeni ha wodiyan akeekiyo wode, ha xiqisee haꞌꞌi polettiiddi deꞌiyoogaa neeni maayettiyoogee qoncce.
Hegaa giyoogee woygiyoogee? Saꞌan deꞌoy keehi giigana mala oottana Xoossaa Kawotettay gita laamiyaa ehaana wodee matiis. (Luqaasa 21:36) Geeshsha Maxaafay Xoossay saꞌawunne an deꞌana asawu loꞌꞌobaa immanawu qaalaa gelidoogaa yootees. Amarida leemisota beꞌa.
LOꞌꞌO HAARUWAA
“Asai ubbai, kawotettati ubbainne dumma dumma qaalan haasayiya zareti ubbai ayyo haarettana mala, maatai, bonchchoinne kawotettai ayyo imettiis. A maatai merinau shaarettenna maataa; a kawotettai mulekka xayennaagaa.”—DAANEELA 7:14.
Hegee woygiyoogee?: Xoossay essiyo, ba Naꞌay Kawo gididi ayssiyo wode, kumetta saꞌaa haariya kawotettan ufayttana danddayaasa.
PAYYATETTAA
“Xiyoonen de7iya ooninne, ‘Taani harggais’ yaagenna.”—ISIYAASA 33:24.
Hegee woygiyoogee?: Neeni mule harggakka woy ne bollay sila gidenna; neeni hayqqennan deꞌana danddayaasa.
KUMETTA SAROTETTAA
“I sa7aa gaxaa gakkanaassi de7iya olaa teqqees.”—MAZAMURE 46:9.
Hegee woygiyoogee?: Olaynne I kaalettiyo tuggay ubbay deꞌenna.
SAꞌAY LOꞌꞌO ASATUN KUMANA
“Iitaa oottiyaageeti . . . de7okkona. . . . Ashkketi biittaa laattana.”—MAZAMURE 37:10, 11.
Hegee woygiyoogee?: Xoossawu azazettiya asati deꞌana; shin iita asati deꞌokkona.
KUMETTA SAꞌAY GANNATE GIDANA
“Asati keettata keexxidi, etan de7ana; woiniyaa turatakka tokkidi, eta aifiyaa maana.”—ISIYAASA 65:21, 22.
Hegee woygiyoogee?: Kumetta saꞌay loꞌꞌiya soho gidana. Xoossay A shenee ‘saꞌan’ hananaadan nuuni woossiyo woosaa polana.—Maatiyoosa 6:10.