Haggaazuwau Kiyennan Markkattana Danddayeeta!

¹ Haggaazuwau kiyennan markkattin koyro tumaa siyida aappunati intte gubaaꞌiyan deꞌiyoonaa? He oyshaa zaaruwan garamettana danddayeeta. Haggaazuwau kiyennan markkattiyoogee nu galla galla oosuwan demmiyo asau, giishin oge biyo wode, dabbuwaa woy shooruwaa oychiyo wode, giyan, timirtte keettan, ooso sohuwaaninne hagaa mala sohotun mishiraachuwaa yootiyoogaara gayttidaba. Xammaqettida Yihoowa Markkati 200⁠ppe dariyo issi citan, xeetaappe 40 kushe gidiyaageeti koyro tumaa siyidoy, haggaazuwau kiyennan etau markkattidaageetuppe! Yaatiyo gishshau, ha sibikate hiillan loꞌꞌo ayfee beettees.

² Koyro xeetu layttan haggaazidaageeti darotoo haggaazuwau kiyennan markkattidosona. Leemisuwau, Yesuusi Samaariyaara kanttiiddi, Yaaqooba haattaa ollaappe haattaa duuqqiya issi maccaaseessi markkattiis. (Yoh.4:6-26) Toophiyaa biittaa suntta gidida issi bitanee Isiyaasa maxaafaa nabbabiyaagaa Piliphoosi: “Neeni nabbabiyoogaa akeekai?” yaagidi oychiyoogan haasayissiyoogaa doommiis. (Oos. 8:26-38) Kiitettida PHauloosi Piliphisiyuusan qasho keettan deꞌiiddi qasho keettaa naagiyaagau markkattiis. (Oos. 16:23-34) Guyyeppe PHauloosi oyqettidi issi keettan deꞌiiddi, “baakko yiya ubbaa mokkees. Bana ooninne diggennan Xoossaa kawotettaabaanne Godaa Yesuus Kiristtoosabaa” yootiis. (Oos. 28:30, 31) Neenikka, ubba dungguuxa gidikkokka, haggaazuwau kiyennan markkattana danddayaasa. Waatada?

³ Doommiyoogaa: Nuuppe dariya baggay erenna uraara haasayaa doommanau metootoos. Nuuni eriyo asaukka tumaa yootiyoogee yeellayana danddayees. SHin Yihoowa loꞌꞌotettaabaa, i ba ashkkaratussi immido alꞌꞌo tumaabaanne alamiyaa asay deꞌiyo deexo hanotaabaa wotti denttidi qoppiyaaba gidikko, hegee nuuni asaayyo yootanaadan denttettees. (Yona. 4:11; Maz. 40:5; Maa. 13:52) Hegaa bollikka, “nuuyyo minotettaa” immana mala Yihoowakko woossana danddayoos. (1 Tas. 2:2) Giiliyaade tamaare issoy: “Darotoo asaa haasayissanau tau deexxiyo wode, woosay maaddiyoogaa akeekaas” yaagiis. Intte haasayanau mammottiyaaba gidikko, intte wozanan woossite.—Nah. 2:4.

⁴ Haggaazuwau kiyennan markkattiyoogee, dambbiyaa kaallidi woykko xiqisiyan haasayaa doommana koshshees giyoogaa gidenna. Sohuwaara markkattana koshshiyaabadan qoppennan, haasayaa doommanau halchiyoogee maaddana danddayees. Aassiya daroti hegaadan oottiyoogee, wurssettan yayyennan mishiraachuwaa yootanau maaddidoogaa yootidosona. Izaawu haasayanau koyennaba gidikko, haasayanaadan sugana koshshenna. Haasayaa ashkketettan essidi bi aggite.

⁵ Issi dungguuxa michiyaa issibaa shammanau giyaa biidosan, koyro izaawussi pashkki gausu. He urikka pashkki giikko, amaridabaa yootausu. He uri loꞌꞌo zaaro immikko, gujjada yootanau hegee o minttettees. I yootiyoobaa akeekan siyada, izaawa ufayssiya mishiraachoy awugaakkonne akeekanau malausu. A asaa hegaadan haasayissiyoogan, daro xuufiyaa immanaunne ubba xinaatiyaakka doomissanau danddayausu.

⁶ Haasayissiyoogaa Doommiyoogaa: Asaa haasayissiyoogaa doommanau woygana danddayiyoo? Haattaa ollaa matan demmido maccaasiyo, Yesuusi uyanau haattaa baassi immanaadan oychiyoogan haasayissiyoogaa doommiis. (Yoh. 4:7) Yaatiyo gishshau, pashkki giidi sarotiyoogan woykko issibaa oychiyoogan asaa haasayissiyoogaa doommana danddayoos. Haasayissiiddi, intte Geeshsha Maxaafaa qofaa yootiyoonne tumaa zerettaa zeriyo injjiyaa demmana danddayeeta. (Era. 11:6) Issoti issoti asay eranau koyiyoobaanne oychanaadan oottiyaabaa denttiyoogan ayfiyaa demmidosona. Leemisuwau, haakime keettan taraa naagiiddi, “Taani naaꞌꞌantto mule sahettennaba gidernneesha” yaagiyoogan haasayaa doommana danddayeeta.

⁷ Nu yuushuwan deꞌiyaabaa loytti akeekiyoogeekka haasayaa doommanau maaddees. Loꞌꞌo eeshshay deꞌiyo naꞌaa akeekidaba gidikko, naꞌaa aawaa woy aayyiyo nashshanaunne “Neeni loꞌꞌo hanotan naꞌaa dichanaadan maaddidabi aybee?” gaana danddayoos. Issi michiyaa iira issippe oottiya asay ooso sohuwan haasayanau koyiyoobaa akeekada, eti dosiyo issibaa denttada yootaasu. Iira issippe oottiya issinna azina gelana haniyoogaa erada, waatidi bullachau halchana danddayiyaakko yootiya Beegottite! maxeetiyaa immaasu. Hegaappe denddidaagan, Geeshsha Maxaafaa qofaa gujjidi haasayanau danddayidosona.

⁸ Asaa haasayissiyoogaa doommiyo hara ogee nu xuufeta asay beꞌana danddayiyo sohuwan nabbabiyoogaa. Issi ishay asaa ufayssiya huuphe yohoy deꞌiyo Wochiyo Keelaa woy Beegottite! maxeetiyaa kessidi, cenggurssa sissennan nabbabiyoogaa doommees. Ba matan uttida issi uri maxeetiyaa xeelliyoogaa akeekikko, nabbabiyo huuphe yohuwaa xeelliyaagan issibaa oychees woykko qantta qofaa yootees. Hegee darotoo, i asaara haasayanaadaaninne markkattanaadan oottees. Nu xuufetuppe issuwaa, asi beꞌiyoosan wottiyoogee nunaara issippe oottiyaageeti woy issippe tamaariyaageeti hegaa xeelliyaagan eranau koyanaadaaninne oychanaadan denttettana danddayees.

⁹ Injjiyaa Medhiyoogaa: Sabbakiyo oosoy eesoyiyaagaa gidiyo gishshau, haggaazuwau kiyennan markkattiyoogaa halchennan oottiyoobadan xeellana koshshenna. Hegaappe dumma ogiyan, nu galla galla oosuwaa oottiyo wode markkattiyo injjiyaa medhanau baaxetana koshshees. Inttenaara gayttiya asaa xeelliyaagan kaseti qoppite; qassi loꞌꞌo hanotan haasayaa waatidi doommana danddayiyaakko akeekite. Ubbatoo Geeshsha Maxaafaanne koshshay deꞌiyo asau immana danddayiyo xuufeta oyqqite.—1 PHe. 3:15.

¹⁰ Aassiya daroti akeekancha gidiyoogan, haggaazuwau kiyennan markkattanau injjiyaa medhidosona. Minttidi naagiyo pooqe keettan deꞌiya issi michiyaa, yan deꞌiya asay wodiyaa aattiyo sohuwan issi loꞌꞌiya misilee deꞌiyoobaa goꞌettausu. Asay misilee loꞌꞌiyoogaa yootiyoogaa doommiyo wode, a he injjiyaa Geeshsha Maxaafay “ooratta saluwaanne ooratta sa7aa” xeelliyaagan yootiyo hidootaa yootanau goꞌettausu. (Ajj. 21:1-4) Haggaazuwau kiyennan markkattiyo injjiyaa medhiyo ogiyaa qoppana danddayeetii?

¹¹ Kaallidi Maaddiyoogaa: Koshshay deꞌiyoogaa bessida uraa, kaallidi maaddanau baaxetite. Koshshiyaaba gidikko, izaawuyyo: “Nenaara haasayidoban keehippe ufayttaas. Zaarettidi haasayanau awan gayttana danddayiyoo?” gaana danddayeeta. Aassiya issoti issoti bantta adrashaanne silkke payduwaa immidi, “Nuuni haasayidoban keehippe ufayttaas. Nuuni haasayidobaa gujjida eranau koyikko, ha adrashan zaarettidi gayttana danddayoos” yaagoosona. Koshshay deꞌiyo uraa intte kaallidi maaddana danddayennaba gidikko, hegaadan kaallana koshshiya gubaaꞌiyau immanaadan Hayyanaa Kaallada Maadda (S-43) giya qitsiyaa kunttidi intte gubaaꞌiyaa xaafiyau immite.

¹² Haggaazuwau kiyennan markkattido saatiyaa irpportte oottana koshshees. Yaatiyo gishshau, guutta daqiiqau haggaazidaba gidikkokka, hegaa dogennan xaafite. Hagaa hassayite: Aassiya ubbay haggaazuwau kiyennan galla galla ichashu daqiiqaa markkattiyaaba gidikko, hegee issi aginan 17 miiloone saatiyaappe bolla gidana danddayees!

¹³ Nuuni haggaazuwau kiyennan markkattiyo loꞌꞌo gaasoy deꞌees; hegeekka Xoossaanne asaa siiqiyoogaa. (Maa. 22:37-39) Yihoowa eeshshaanne a halchuwaa akeekidi nashshiyo wode, a “kawotettaa bonchchuwaabaa” yootanau wozanappe koyoos. (Maz. 145:7, 10-12) Nu shoorotuyyo wozanappe qoppiyoogee, wodee wurennan deꞌishin etau mishiraachuwaa yootiyo injje ubbaa goꞌettanaadan denttettees. (Roo. 10:13, 14) Guuttaa kasetidi qoppiyoogaaninne giigettiyoogan nuuni ubbaykka haggaazuwau kiyennan markkattana danddayoos; qassi ashkke gidida issi urau tumaa yootiyoogan ufayttana danddayoos.

[Oyshata]

1. (a) Haggaazuwau kiyennan markkattiyoogee woygiyoogee? (b) Haggaazuwau kiyennan markkattidaageetuppe koyro tumaa siyida aappunati ha shiiquwan deꞌiyoonaa?

2. Haggaazuwau kiyennan markkattiyoogaa xeelliyaagan Geeshsha Maxaafan deꞌiya leemisoti awugeetee?

3. Yeellatiyoogaa agganau nuna aybi maaddana danddayii?

4. Koyrottidi nuuyyo ayba halchuwaa kessana danddayiyoo, aybissi?

5. Issi dungguuxa michiyaa haggaazuwau kiyennan markkattanau aybi maaddidee?

6. Haggaazuwau kiyennan haasayaa waatidi doommana danddayiyoo?

7. Nu yuushuwan deꞌiyaabaa loyttidi akeekiyoogee, haggaazuwau kiyennan markkattanau waatidi maaddii?

8. Haasayissiyoogaa doommanau nu xuufeta waatidi goꞌettana danddayiyoo?

9, 10. (a) Haggaazuwau kiyennan markkattiyo injjiyaa waatidi medhana danddayiyoo? (b) Hegaadan waatidi oottana danddayidetii?

11. Haggaazuwau kiyennan markkattiyo wode demmido, koshshay deꞌiyo uraa waatidi kaalli maaddana danddayiyoo?

12. (a) Nuuni haggaazuwau kiyennan markkattido saatiyaa dogennan ubbatoo xaafi oyqqidi irpportte oottana koshshiyoy aybissee? (b) Haggaazuwau kiyennan markkattiyoogee ayba ayfe demissidee? (“Haggaazuwau Kiyennan Markkattiyoogee Ayfiyaa Demissees!” giya saaxiniyaa xeella)

13. Nuuni haggaazuwau kiyennan markkattanau aybi denttettana koshshii?

[Sinttaa 4n Deꞌiya qonccissuwaa]

Asaara gaytti simmidi, sohuwaara haasayissanau halchiyoogee inttena maaddan danddayees

[Sinttaa 5n Deꞌiya qonccissuwaa ]

Aassiya daroti akeekancha gidiyoogan, haggaazuwau kiyennan markkattanau injjiyaa medhidosona

[Sinttaa 5n Deꞌiya Saaxiniyaa]

Haasayissiyoogaa Doommanau Maaddiya Qofata

◼ Haasayissiyoogaa doommanau maaddanaadan woossite

◼ Dirbbenna, qassi ashkke milatiya asata doorite

◼ Haasayissiyo ura xeelliiddi haasayite, pashkki giite, haasayissiyo uri ufayttiyoobaa haasayite

◼ Loytti ezggite

[Sinttaa 6n Deꞌiya Saaxiniyaa]

Haggaazuwau Kiyennan Markkattiyoogee Ayfiyaa Demissees!

• Issi ishay ba kaamiyaa garaajjiyan ootissiiddi, yan demmido asatuyyo markkattiis; qassi dere haasayaa siyanaadan shoobiyaa woraqataa immiis. Layttappe simmin, awuraajjaa shiiquwan i kase erenna issi ishay a minttidi sarotiis. Hegee, i layttappe kase garaajjiyan demmidi, shoobe woraqataa immido asatuppe issuwaa! He bitanee dere haasayaa bi siyidi Geeshsha Maxaafaa xannaꞌanau koyiis. Haꞌꞌi inne a keettayiyaa xammaqettidosona.

• Haggaazuwau kiyennan markkattiyoogan tumaa siyida issi michiyaa, ba heezzu naatu baggaara demmiyo asata, baassi dumma gidida haggaazo moottan demmiyo asadan qoppaasu. I haggaazo moottay shooro asata, timirtte keettaaninne naatu aawatinne aayoti shiiqiyo wode demmiyo eta yelidaageeta gujjees. Asaara erettiyo wode ubban, naata dichanau Geeshsha Maxaafay o keehippe maaddidoogaa qanttan wozanappe yootausu; yaatada, harabaa denttada haasayiyoogaa doommausu. A haasayaa doomma uttido gishshau, kaallidi haasayiyoobau Geeshsha Maxaafaappe yootanau metootukku. A hegaadan oottiyoogan, 12 asati xammaqettanaadan maaddaasu.

• Inshuranssiyan oottiya issi bitanee issi micheekko yiido wode, a he injjiyaa goꞌettada markkattaasu. Payyatettaa, ufayssaanne merinaa deꞌuwaa tumuppe demissiyaabaa i koyiyaakkonne oychaasu. Ee gi simmidi, a yootiyo inshuranssee awugaakkonne oychiis. Geeshsha Maxaafay yootiyo hidootaa bessada issi xuufiyaa immin, i he galla qammi nabbabidi wurssiis. Geeshsha Maxaafaa xannaꞌiyo prograamee giigiis; gubaaꞌe shiiquwan beettiyoogaa doommiis; yaatidi, guyyeppe xammaqettiis.

• Issi michiyaa horophilliyan baydda, ba matan uttida maccaaseera haasayaa doommada markkattaasu. Horophilliyaappe wodhi simmin, michiyaa ba adrashaanne silkke payduwaa immada, Yihoowa Markkati i soo yiyo wode Geeshsha Maxaafaa xannꞌissana mala oychanaadan yootaasu. Wonttetta gallassi naaꞌꞌu Yihoowa Markkati i soo yiidosona. Maccaasiyaa Geeshsha Maxaafaa xannaꞌiyoogaa doommada, sohuwaara dichaa bessiyoogan xammaqettaasu; hegaappe takkennan heezzu xinaateta ba huuphe xannaꞌissiyoogaa doommaasu.

• Keehi sahettiyaanne cimida asati deꞌiyo sohuwan deꞌiya, layttay 100 gidido issi qooqenne ishay darotoo, “Nuussi Kawotettay koshshees” yaagees. Hegee, yan oottiyaageetinne sahettidi yan deꞌiya asay Kawotettay aybakko qonccissana mala a oychanaadan denttettiis. Yan oottiya maccaasatuppe issinniyaa i Gannatiyan ay oottana koyiyaakko oychaasu. I: “Ta ayfee xeellana, taani zaarettada hemettana, qassi taani haꞌꞌi uttada biyo gaariyaa taman xuuggana” yaagidi zaariis. I qooqe gidiyo gishshau, a ayyo maxeetiyaa nabbabanaadan oychees. He ishaa naꞌiyaa a oychanau yaa biido wode, maccaasiyaa ‘ha maxeetiyaa ta soo ekkada baana danddayiyaanaa?’ gaada naꞌiyo oychaasu. Issi narssiyaa naꞌeeyyo: “Hagan nuuni waannayidi haasayiyo ooratta qofay: “Nuussi Kawotettay koshshees’” yaagiyaagaa yaagaasu.

• Hooteeliyan qumaa maanau naagaydda eqqida issi michiyaa, i matan uttida cima asati polotikaabaa haasayiyoogaa siyaasu. Etappe issoy asaa haaroy nu metuwaa qaaranau danddayennaagaa yootiis. Michiyaa ba wozanan, ‘Hagee taassi hira wode’ gaada qoppaasu. Ba wozanan qantta woosaa woossada etakko shiiqaasu. Etaara eretta simmada, asaa naatu metuwaa qaariya aysuwaa, Xoossaa Kawotettaabaa yootada, ba oyqqido brooshuriyaa etau immaasu. Sohuwaara he hooteeliyaa alaafee ikko yiis. A kiyada baanaadan yootees gaada qoppaasu. SHin a yootiyoobaa siyidoogaanne baassikka brooshuriyaa immanaadan koyiyoogaa yootiis. A yootiyoogaa siyida, yan oottiya issinnakka afuttaa tigaydda ikko yaasu. A kase Geeshsha Maxaafaa xannaꞌiyaaro gidishin, zaarettada xannaꞌanau koyaasu.