Haggaazuwan Kaseegaappe Qara Gidiyoogaa—Haggaazuwawu Kiyennan Markkattiyoogaa Doommiyoogaa

Hegee Keehi Koshshiyoy Aybissee? Issi issi heeran ishati sooppe soo biidi haggaaziyo wode, darotoo son asa demmokkona. SHin nuuni kaamiyan issisaa biiddi, aakime keettan kayaa naagiiddi woy ooso sohuwaaninne timirtte keettan he asatuura gayttana danddayoos. Yihooway ubba asay Kawotettaa mishiraachuwaa siyanaadan koyees. (1 Xim. 2:3, 4) Asawu markkattanawu, darotoo haasayaa doommana bessiyay nuna.

Waatana Danddayiyoo?

• Akeekancha gida. Neeni haasayissanawu qoppido uri pashkkanne haasayanawu koyiya asee? Aara loytti haasayanawu hanotay injjetii? Issi issi ishati haasayissanawu qoppido uraa xeelliiddi pashkki goosona. Ikka zaaridi pashkki giikko, a haasayissanawu maloosona.

• Haasayissanawu yayyikko, ne wozanan qantta woosaa woossa.—Nah. 2:4; Oos. 4:29.

• Amaridabaa haasayiyoogan woy sarotiyoogan haasayaa doommana danddayaasa. Yesuusi Samaare biittaa maccaaseera haasayaa doommidoy Kawotettaa mishiraachuwaa yootiyoogaana gidenna. (Yoh. 4:7) Issi issitoo, nashshiyoogan haasayaa doommana danddayoos; leemisuwawu, “Ne naatu eeshshay keehi loꞌꞌo” gaana danddayoos. Oyshaa oychiyogankka haasayaa doommana danddayoos; leemisuwawu, “Mata wode hanidabaa siyadii?” giidi oychana danddayoos.

• Haasayaa doommoogaappe guyyiyan, mishiraachuwaa yootanawu mala; shin yaatanawu eesotoppa. ‘Oyttay saxxin saxxiyoosaa bessees’ giyoogaadan, hegaappe simmada neeni gaanabay bawu erettana. Neeni haasayissiyo uri eranawu koyanaadaaninne nena zaari oychanaadan denttettiya qofaa yoota. Leemisuwawu, intte haasayiyoobay soo asaabaa gidikko, “Naata dichiyoogaa xeelliyaagan issi xuufiyaappe loꞌꞌo zoriyaa demmaas” gaana danddayaasa. Intte haasayiyoobay mata wode hanidabaa xeelliyaagaana gidikko, “Ha giddon issi keehi ufayssiyaabaa nabbabaas” gaana danddayaasa. Neeni awu markkattennan i neeppe shaahettiyaaba gidikko, hidootaa qanxxoppa.

• Ekkana koyiya urawu immanawu, trakttiyaa woy hara xuufiyaa oyqqa.

Ha Aginan Hagaa Oottanawu Mala:

• Haggaazuwawu kiyennan markkattanawu halchada, guuxxiis giishin saaminttan issi uraara haasayaa doommanawu mala.