Xiqimita Aginan Intte Geeshsha Maxaafaa Xannaꞌissiyoogaa Doomissanee?
1 Xiqimita aginan asau immiyo xuufee Wochiyo Keelaanne Beegottite! maxeeteta. Koshshay deꞌiyoogeeta kaallidi maaddanau Tumaa Eranau Koyay? yaagiya tirakttiyaa immanaadaaninne Geeshsha Maxaafaa xinaatiyaa doomissanau baaxetanaadan minttettoy odettiis. Zaarettidi oychiyo wode hegaadan waatidi oottana danddayiyoo?
2 Tirakttiyaa Goꞌettiyo Ogiyaa: Hagaadan gaana danddayoos: “Taani inttiyo immido maxeetee dumma dumma hanotaynne haymaanootee deꞌiyo asay ubbay Geeshsha Maxaafaa xannaꞌanaadan minttettees. [Haasayissiyo uraassi Tumaa Eranau giya tirakttiyaa immada, koyro sinttan deꞌiya oyshata bessa.] Geeshsha Maxaafay zaaruwaa immiyo, keehi koshshiya amarida oyshati hagan deꞌoosona. Hagan deꞌiya oyshatu malaa oychi ereetii?” Haasayissiyo ura zaaruwaa siyi simmidi, i oychido oyshatuppe issuwaa tirakttiyaappe issippe beꞌite; qassi xiqisiyaappe issuwaa nabbaba. Hegee Geeshsha Maxaafay tamaarissiyoobaappe guutta leemiso gidiyoogaa qonccissidi, Geeshsha Maxaafay Tamaarissiyoy giya maxaafaa immite. Hegaappe simmin, huuphe yohuwaa kesuwan i doorido shemppuwau koyro menttota tobbana danddayoos. Woykko tirakttiyan tobbido qofaa gujjidi qonccissiya huuphe yohuwaa kessana danddayoos. Nuuni goꞌettana qofaa kaallidi deꞌiya sohotuppe demmana danddayoos:
● Xoossay tumuppe nuussi qoppii? (sinttaa 9-11, mentto 6-10)
● Olay, metoynne tuggay xayanee? (sinttaa 12, mentto 12-13)
● Nuuni hayqqiyo wode waaniyoo? (sinttaa 59-60, mentto 7-8)
● Hayqqida urassi hidooti deꞌii? (sinttaa 71, mentto 13-15)
● Xoossay siyiyo ogiyan waata woossana danddayiyaanaa? (sinttaa 166-167, mentto 5-8)
● Deꞌuwan waanada ufayttana danddayiyaanaa? (sinttaa 9, mentto 4-5)
3 Koyro zaarettidi oychiyo wode Geeshsha Maxaafay Tamaarissiyoy giya maxaafan xinaatiyaa doomissanaunne bessanau hanotay injjetennaba gidikko, hara wode yiidi tobbanau hanotaa ubba wode giigissana danddayoos. Izaawu koshshaa beꞌidi, maxaafaa assi immanaappe kase dumma dumma wodiyan zaarettidi oychiyo wode tirakttiyan deꞌiya oyshatun tobbanaukka doorana danddayoos. Keehippe maaddiya ha tirakttiyaa, Xiqimita aginan Geeshsha Maxaafaa xinaatiyaa doomissanaunne ‘tumaa eranaadan’ ashkketa maaddanau loyttidi goꞌettoos.—Yoh 8:31, 32.
[Oyshata]
1. Xiqimita aginan asau immiyo xuufee aybee?
2. Maxeetiyaa ekkida uraa zaarettidi oychiyo wode, Tumaa Eranau giya tirakttiyaa xinaatiyaa doomissanau waatidi goꞌettana danddayiyoo?
3. Asaa haasayissiyo ogiyaa hanotaadan waatidi laammana danddayiyoo?