Godaa Kahuwaa Bonchiyo Wodee Kaseegaappe Daruwaa Haggaazanau Injje Wode!
1. Laappuniyan, Hosppuniyaaninne Uddufuniyan kaseegaappe daruwaa oottana koshshiyoy aybissee?
1 Mata wode Godaa Kahuwaa bonchiyo heeran kaseegaappe daro wodiyau haggaazana danddayeetii? Daro heeran carkkuwaa hanotay loꞌꞌo; qassi gallassay qammaappe aduqqees. Aassiyaageetuppe amaridaageeti oosuwaappe piqaadiyaa ekkidi shemppiyo wode woy timirtte keettay gorddettiyo wode, haggaazana danddayoosona. Koshshay deꞌiyoogeeti nunaara Hosppune 17n Godaa Kahuwaa bonchanaadan, Hosppune 2ppe doommidi dumma zamachan eta shoobboos. Hegaappe simmin, he baalan beettidaageetu koshshaa denttettanau nuuni baaxetana; qassi Hosppune 25n doommiya saaminttan shiiqiya dumma haasayaa siyanaadan eta shoobbana. Laappuniyan, Hosppuniyaaninne Uddufuniyan kaseegaappe daruwaa oottiyo daro gaasoy deꞌiyoogee qoncce.
2. Kaseegaappe daruwaa haggaaziyo keehi loꞌꞌo ogee awugee?
2 Kaafiya Aqinye Gidiyoogaa: Kaseegaappe daruwaa oottiyo keehi loꞌꞌo ogee kaafiya aqinye gidiyoogaa. Nuuyyo ubbau oosoy dariyo gishshau, hegaadan oottanau kasetidi halchananne nu prograamiyaa giigissana koshshees. (Lee. 21:5) Intte ubbatoo oottiyo daro koshshennabatuppe amaridaageeta haroode oottana danddayeeta. (Pili. 1:9-11) Intte gubaaꞌiyan deꞌiya harati inttenaara issippe kaafiya aqinye gidanaakkonne eranau, intte aqinye gidanau koyiyoogaa etau aybissi yootekketii?
3. So asay kaseegaappe daruwaa haggaazana danddayiyoy ayba ogiyaanee?
3 Kaalliya So Asaa Goynuwaa omarssan intte so asaa hoolliyaa issippe tobbiyoogee loꞌꞌo. (Lee. 15:22) So asay ubbay hashetiyaaba gidikko, so asaappe amaridaageeti issi aginau woy hegaappe daruwau kaafiya aqinye gidana danddayoosona. Hegee danddayettennabadan qofaa intte qachikko shin? Issi issitoo omarssan haggaaziyoogan woy Qeeraa gallassinne Wogaa gallassi kaseegaappe daro wodiyau haggaaziyoogan so asay kaseegaappe daruwaa oottana danddayees.
4. Godaa Kahuwaa bonchiyo heeran kaseegaappe daruwaa haggaaziyoogee ayba anjjuwaa demissii?
4 Yihooway nuuni ayyo haggaazanau oottiyo ubbabaa akeekees; qassi nu yarshshuwaa nashshees. (Ibr. 6:10) Yihoowayyoonne haratuyyo immiyoogee ufayttanaadan oottees. (1 Odi. 29:9; Oos. 20:35) Keehippe ufayttanaunne anjjettanau, Godaa Kahuwaa bonchiyo heeran kaseegaappe daruwaa haggaazana danddayeetii?