Neeni Kaafiya Aqinye Gidanee?
1. Kaseegaappe aaruwaa haggaazanau Godaa kahuwaa bonchiyo wodee injje gidiyoy aybissee?
1 Godaa kahuwaa bonchiyo wodee, nuuni kaseegaappe aaruwaa haggaazanau injje wode. Hegee, Yihooway ba Naꞌay yarshsho gidanaadan immiyoogan nuna keehi siiqidoogaa nuuni qoppiyo wode. (Yoh. 3:16) Hegee, nuuni Yihoowa keehi galatanaadan oottees; qassi abaanne i asau oottiyoobaa haratussi yootanaadan denttettees. (Isi. 12:4, 5; Luq. 6:45) Qassi he wodee, nuuni eriyo asaanne nu haggaazo moottan deꞌiyaageeta nunaara Godaa kahuwaa bonchanaadan dumma zamachan shoobbiyo wode. Qassi he shiiquwaa yiyaageeti gujjidi eranaadankka minttettoos. Laappuniyan, Hosppuniyan woy Uddufuniyan kaafiya aqinye gidiyoogan neeni kaseegaappe aaruwaa haggaazanee?
2. Laappunee kaafiya aqinye gidanau injje agina gididoy aybissee?
2 Laappunee Dumma Agina Gidanaadan Ootta: Laappunee kaafiya aqinye gidanau injje agina. Kaafiya aqinye gidanau koyiyaageeti 30 woy 50 saatiyaappe issuwaa dooridi haggaazana danddayoosona. Woradaa xomoosiyaagee Laappuniyan gubaaꞌiyaa xomoosiyaaba gidikko, i aqinyetuuranne dumma aqinyetuura shiiqiyo kumetta shiiquwan kaafiya aqinyetikka shiiqana danddayoosona. Laappune 1ppe biidi Masqqaynno, Laappune 26, 2013n bonchiyo Godaa kahuwaa gakkanaashin asaa shoobbiyo gishshau, zamachay kase wodeegaappe aduqqees. Qassi Laappuniyan ichashu Qeeraanne Woggaa gallassati deꞌoosona. Yaatin, neenikka hagee laytta giddon deꞌiya aginatuppe keehi dumma agina gidanaadan oottana danddayiyaakkonne aybissi loyttada qoppikkii?
3. Kaseegaappe gujjidi haggaazanau halchana danddayiyoy ayba ogiyaanee?
3 Haꞌꞌi Halcha: Kaafiya aqinye gidanau ne hanotaa loytta qoppanaunne giigissana koshshiyaabaa giigissiyo wodee haꞌꞌa. So asay hashetiyoogee keehippe koshshiyo gishshau, So Asaa Goynuwaa omarssan so asaa halchuwaa tobbanaunne hanotaa giigissanau wodiyaa bazza. (Lee. 15:22) Neeni kaafiya aqinye gidanau danddayennaba gidikko, hidootaa qanxxoppa. Haggaazuwaa kiyiyo wode daro saatiyaa haggaazanau ne hanotaa giigissana danddayay? Saaminttaa giddon haggaazuwaa kiyiyo gallassaa gujjana danddayay?
4. Laappuniyan, Hosppuniyaaninne Uddufuniyan kaseegaappe gujjidi haggaaziyoogan demmiyo goꞌꞌay aybee?
4 Laappuniyan, Hosppuniyaaninne Uddufuniyan kaseegaappe gujjidi haggaaziyo wode, Yihoowayyo oottiyoogaaninne haratuyyo immiyoogan keehi ufayttana. (Yoh. 4:34; Oos. 20:35) Hegaappekka aaruwan, nu goꞌꞌaa aggibayidi oottiyoogee Yihoowa ufayssees.—Lee. 27:11.