Yihoowa Sabbiyo Hara Injjiyaa
1. Nuuni Yihoowa ‘daroppe galatanaadan’ maaddanau ooratta giigidabay aybee?
1 Aadhida Laappuniyaa aginan, aassiyaageeti Laappuniyaaninne Hosppuniyan, qassi woradaa xomoosiyaagee gubaaꞌiyaa yiyo aginan ubbatoo kaafiya aqinye gididi 30-saate irpportte oottiyo ooratta giigissoy doommiis. Woradaa xomoosiyaagee gubaaꞌiyaa yiyo saaminttan issi aginay wuridi hara aginay doommiyaaba gidikko, aassiyaageeti he naaꞌꞌu aginatuppe awugaaninne 30-saate irpportte oottidi kaafiya aqinye gidanau oychana danddayoosona. Kaafiya aqinyeti ubbay woradaa xomoosiyaagee kumetta wode aqinyetuuranne dumma aqinyetuura shiiqiyo shiiquwaa kumettaa shiiqana danddayoosona. Yaagiyoogee, nuuni 50 saate irpportte oottanau danddayennaba gidikko, layttaa giddon oyddutoo, aginan 30 saate irpportte oottiya kaafiya aqinye gididi, Yihoowa “daroppe galatana” danddayoos giyoogaa.—Maz. 109:30; 119:171.
2. Woradaa xomoosiyaagee yiyo wode kaafiya aqinye gidiyaageeti ay maata demmiyoonaa?
2 Woradaa Xomoosiyaagee Gubaaꞌiyaa Yiyo Wode: Woradaa xomoosiyaagee gubaaꞌiyaa yiyo wode kaseegaappe daroti kaafiya aqinye gididi, aara issippe haggaaziyoogan issoy issuwaa minttettana danddayoosona. (Roo. 1:11, 12) Daro kaafiya aqinyeti woradaa xomoosiyaagaara haggaazanau he saaminttan issi gallassaa oosuwaappe shemppuwaa oychana danddayoosona. Hara ooso oottiya kaafiya aqinyeti i Qeeraa woy Woggaa gallassi etaara haggaazana danddayiyaakkonne oychana danddayoosona. Qassi, kaafiya aqinyeti aqinyetu shiiquwaa kumetta wode aqinyetuuranne dumma aqinyetuura issippe shiiqiyoogee keehi minttettiyaaba!
3. Godaa Kahuwaa Baalaa wodee kaafiya aqinye gidanau daro loꞌꞌo wode gididoy aybissee?
3 Laappuniyaaninne Hosppuniyan: Kase Godaa Kahuwaa Baalaa wodiyan 30-saate iripportte oottidi issi aginau kaafiya aqinye gididi haggaazidaageeti haꞌꞌi bantta “galataa yarshshuwaa” dakkuwan darissana danddayoosona! (Ibr. 13:15) Kaafiya aqinye gididi nu haggaazuwaa aassanau Laappuneekka Hosppuneekka daro loꞌꞌo agina. Layttan layttan he aginatun Godaa Kahuwaa bonchiyo baalaa yaanaadan asaa zamachan shoobboos. Qassi, daroti Godaa Kahuwaa Baalaa wodiyan bantta haggaazuwaa aassiyo gishshau, aassiyaageetuppe darotuura haggaazana danddayoos. Baalaappe simmin, baalaa yiida eranau koyiyaageeta zaarettidi oychoos; qassi dumma dere haasayaa siyanau eti yeemottanaadan denttettoos. Kaafiya aqinye gidana danddayiyo ha gujo qaadan goꞌettanaadan ne wozanay nena denttettennee?—Luq. 6:45.