Kaseegaappe Loytti Tamaarissanau Maaddiya Heezzu Qofaa
1. Kaseegaappe loytti tamaarissanau baaxetana koshshiyoy aybissee?
1 Yihoowa Markkati ubbay asttamaare. Nuuni koyro haasayissiyo wode, zaarettidi oychiyo wode woy Geeshsha Maxaafaa xannaꞌissiyo wode ubban tamaarissoos. Nuuni tamaarissiyoobay keehippe goꞌꞌiyaaba. Asay “atotettai beettiyo aadhdhida eratettaa” demmanau “geeshsha maxaafata” loytti akeekanaadan maaddoos. (2 Xim. 3:15) Hegee keehi gita maata! Kaseegaappe loytti tamaarissanau maaddiya heezzu qofata ane beꞌoos.
2. Akeekanau metenna ogiyan waati tamaarissana danddayiyoo?
2 Akeekanau Metennaagaa: Nuuni issibaa loytti eriyaaba gidikko, hegaa erenna urau yootiyo wode akeekanau metiya ogiyan yootiiddi deꞌiyoogaa dogana danddayoos. Hegaa gishshau, Geeshsha Maxaafaa xannaꞌissiyo wode, he qofaara gayttida keehi darobaa yootoppa. Yaatiyoogaappe, waanna qofaa mintta yoota. Loytti tamaarissiyoogee darobaa haasayiyoogaa gidenna. (Lee. 10:19) Darotoo waanna xiqisetu xallaa nabbabiyoogee loꞌꞌo. Xiqiseta nabbabi simmin, xannaꞌiyo qofaa kaafiya qaalata qonccissa. Maatiyoosa shemppo 5ppe 7 gakkanaashin deꞌiya, Deriyaa Bolla Timirttiyan keehi tuma gididabay qonccidaba gidikkonne, Yesuusi amarida qaalata dooridi akeekanau metenna ogiyan tamaarissiis.
3. Leemisuwaa goꞌꞌay aybee, darotoo ay mala leemisuwaa goꞌettiyoogee loꞌꞌo?
3 Leemisuwaa: Leemisoy qoppanaadan oottees, qassi dogennaadan maaddees. Loꞌꞌo leemisuwaa yootanau neeni leemiso erancha gidana bessenna. Yesuusi darotoo qanttanne akeekanau metenna leemisuwaa yootiis. (Maa. 7:3-5; 18:2-4) Misiliyaa woraqatan medhiyoogeekka keehi maaddana danddayees. Kasetidi loytti giigettiyoogee loꞌꞌo leemisuwaa goꞌettanau maaddana danddayees.
4. Oyshaa ayba ogiyan loytti goꞌettana danddayiyoo?
4 Oyshaa: Oyshay xannaꞌiya uray qoppanaadan oottees. Hegaa gishshau, oycha simmada naaga. Neeni eesotada zaariyaaba gidikko, ne xannaꞌissiyo uray ay akeekidaakko erana danddayakka. A zaaroy likke gidana xayikko, he oyshaa neeni zaariyoogaappe, i suure zaaranaadan maaddiya hara oyshaa oychiyoogee loꞌꞌo gidana danddayees. (Maa. 17:24-27) Nuuni ubbay polo asttamaare gidennaagee qoncce. Yaatiyo gishshau, nuuni tamaarissiyo timirttiyaa mintti qoppanaadan Geeshsha Maxaafay minttettees. Hegaadan oottiyoogee, nunanne nuuni yootiyoogaa siyiyaageeta merinau goꞌꞌees.—1 Xim. 4:16.