Mishiraachuwaa Yootanau Trakttiyaa Goꞌetta
1. Xoossaa asay trakttiyaa ayba ogiyan goꞌettidee?
1 Yihoowa Markkati daro wodiyaappe doommidi, mishiraachuwaa yootanau trakttiyaa goꞌettoosona. CHarles T. Rasilinne aara issippe oottiyaageeti 1880n, Wochiyo Keelaa nabbabiyaageeti asau immana mala Geeshsha Maxaafaa Tamaaretu Trakttiyaa giigissiyoogaa doommidosona. CHarles T. Rasili 1884n Kawotettaa oosuwaa aassanau qoppidi, ha wodiyan Watch Tower Bible and Tract Society of Pennsylvania geetettiya, Zion’s Watch Tower Tract Society (‘trakttiyaa’ giya sunttay hegan deꞌees) wore demmenna dirijjite oottidi mazggafissido wode, trakttee keehi koshshiyoogee erettiis. Geeshsha Maxaafaa Tamaareti 1918 gakkanaashin 300 miilooneppe dariya trakttiyaa asau immidosona. Trakttee haꞌꞌikka markkattanau keehi maaddiya miishsha.
2. Trakttee keehi maaddiyoy aybissee?
2 Keehi Maaddiyoy Aybissee? Traktteti keehi loꞌꞌosonanne beꞌanau ufayssoosona. Traktteti oyqqido qantta qofay keehi ufayssiyaabanne era gujjiyaaba. Maxeetiyaa woy maxaafaa nabbabanau salettiyaageeta trakttee ufayssana danddayees. Aassiyoogaa doommida ooratta uray woy naatikka trakttiyaa asau immanau metootokkona. Qassi trakttee guutta gidiyo gishshau, oyqqanaukka metenna.
3. Trakttiyaa goꞌꞌaa bessiya, ne siyidobaa woy xuufiyan kiyida temokruwaa yoota.
3 Daro asay tumaa siyidoy trakttiyaa koyro demmido gishshataassa. Leemisuwau, Heytti biittan deꞌiya issi maccaasiyaa ogiyaappe issi trakttiyaa demmaasu. A hegaa saꞌaappe dentta nabbabada, “Tumaa demmaas!” yaagaasu. Guyyeppe, Kawotettaa Addaraashaa baada, Geeshsha Maxaafaa xannaꞌiyoogaa doommada, xammaqettaasu; he ubbabay hanidoy he trakttiyan deꞌiya Xoossaa Qaalaappe denddidaagaana.
4. Aginaa giddon asau immiyo xuufee trakttiyaa gidiyo wode nuuni ay halchana koshshii?
4 Sooppe Soo Haggaaziyo Wode: Trakttee markkattanau keehi goꞌꞌiya miishsha gidiyo gishshau, Hidaare aginaappe doommidi, issi issi aginatun asau imettees. Nuuni asi koyiyo wode trakttiyaa immiyoogaa xalla gidennan, a goꞌettidi asaara haasayanau halchana koshshees. Haasayissido koyro galla woy zaaretti oychiyo wode, izaawu siyanau koyiyaaba gidikko, Geeshsha Maxaafay Tamaarissiyoy giya maxaafaa woy xannaꞌissiyo xuufiyaa haraa goꞌettidi Geeshsha Maxaafaa xinaatiyaa doomissana danddayoos. Sooppe soo haggaaziyo wode trakttiyaa asau waati immana danddayiyoo? Dumma dumma traktteti deꞌiyo gishshau, nu immiyo traktteta loytti erana koshshees.
5. Sooppe soo haggaaziyo wode trakttiyaa asau waati immana danddayiyoo?
5 Nu haggaazo moottaaranne asau immiyo trakttiyaara maayiya ogiyan asaa haasayissana koshshees. Trakttiyaa izaawussi immiiddi haasayaa doommana danddayoos. Keehippe loꞌꞌiya koyro sinttay izaawu nuuni yootiyoobaa siyanaadan oottana danddayees. Woy daro trakttiyaa bessidi izaawu bana ufayssiyaagaa dooranaadan yootana danddayoos. Asay kariyaa dooyanau koyenna moottan haggaaziyo wode, izaawu beꞌana danddayiyo ogiyan traktteta oyqqana danddayoos; woy i ba qofaa yootanaadan issibaa xooꞌiyaara immana danddayiyaakkonne oychana danddayoos. Trakttiyaa huuphe yohoy oysha gidikko, hegaa xeelliyaagan a qofay aybakko oychana danddayoos. Woy a qofaa denttettidi haasayaa doommanau maaddiya hara oyshaa oychana danddayoos. Yaatidi, keettaawaayyo trakttiyan deꞌiya qofaappe amaridaagaa nabbabidi, trakttiyan deꞌiya oyshata oychidi, i ba qofaa yootanaadan takki gaana danddayoos. Waanna xiqiseta Geeshsha Maxaafaappe nabbabana danddayoos. Trakttiyan deꞌiya qofaappe amaridaagaa tobbidi, haasayaa kuuyananne zaarettidi gayttana gallassaa keerana danddayoos. Intte haggaazo moottan haggaaziiddi asa demmibeenna keettan xuufiyaa wottidi biyoogee meeze gidikko, keettay gordda deꞌiyo wode yaa haa biya asau beettenna sohuwan issi trakttiyaa wottana danddayettees.
6. Ogiyan markkattiyo wode trakttiyaa waati goꞌettana danddayiyoo?
6 Ogiyan Markkattiyo Wode: Ogiyan markkattiyo wode trakttiyaa goꞌettay? Ogiyaara aadhiya asay eesotiyo gishshau, nunaara haasayanau eqqana koyenna. Eti tumuppe siyanau koyiya koyennaakko eranau metootana danddayoos. Eti nabbabanaakko agganaakko erennan, ooratta maxeetiyaa immiyoogaappe aybissi issi trakttiyaa immokkoo? Koyro sinttay beꞌanau loꞌꞌiyo gishshaunne trakttiyaa giddon deꞌiya qofaykka qantta gidiyo gishshau, guutta wodiyaa demmiyo wode asay a nabbabanau koyana danddayees. SHin asay eesotennaba gidikko, trakttiyan deꞌiya qofaappe amaridaagaa etaara tobbana danddayoos.
7. Haggaazuwau kiyennan trakttiyaa waati goꞌettana danddayiyaakko bessiya temokruwaa yoota.
7 Haggaazuwau Kiyennan Markkattiyo Wode: Haggaazuwau kiyenna wodekka trakttiyaa goꞌettidi markkattiyoogee metenna. Issi ishay au biyo wodekka gidin, amarida trakttiyaa kiisiyan oyqqees. I issi asaara leemisuwau, suuqiyan bayzziya asaara gayttiyo wode, ‘hanno nabbaba’ giidi trakttiyaa immees. Issi azinaynne machiyaa Niwu York Siti kataman issi heeraa beꞌanau biido wode, he sohuwan dumma dumma biittaappe yiida asay deꞌiyoogaa eridosona. Yaatiyo gishshau, Ubba Deriyaa Asau giya bukleetiyaanne dumma dumma qaalan giigida daro trakttiyaa ekki biidosona. Yaatidi, issi issibaa ogiyaa doonan bayzziya uri, parkkiyan woy quma keettan eta lanqqen uttida uri hara biittaa qaalaa haasayiyo wode siyidi, a qaalan giigida trakttiyaa immoosona.
8. Trakttee zerettaa mala gidiyoy aybiinee?
8 ‘Ne Zerettaa Zera’: Trakttee zerettaa mala gaana danddayoos. Issi goshshanchay ba zerettaappe mokkanaagee awugaakko erenna gishshau, ubbasaa gattidi zerees. Eranchchaa 11:6y hagaadan gees: “Maallado guuran gidinkka omarssan, ne zerettaa zeriyoogaa aggoppa; aissi giikko, maalladoogee lo77anaa omarssaagee lo77anaa neeni erakka.” Hegaa gishshau, markkattanau ha keehi maaddiya miishshaa goꞌettidi, nuuni ‘eraa zeriyaageeta’ gidoos.—Lee. 15:7.
[Sinttaa 3n deꞌiyaagaa qonccissuwaa]
Trakttee markkattanau keehi goꞌꞌiya miishsha gidiyo gishshau, Hidaare aginaappe doommidi, issi issi aginatun asau imettees