Trakttetun Asaa Haasayissiyoogaa Waati Doommiyoo?

Ichchashe 2018⁠ppe doommidi, Deꞌuwaanne Haggaazuwaa Xannaꞌiyo Xuufiyan koyro sinttan asaa haasayissiyo amaridabay deꞌees. Xuufeta coo immiyoogaappe asaa haasayissiyoogan xeelaa wottanaadan nuussi minttettoy imettiis. Aassiyaageeti haasayissiyo ogiyaa laammanaadan maaddanawu, Geeshsha Maxaafaa xalla goꞌettidi asaa haasayissiyoogaa waatidi doommanaakko asaa haasayissiyo amarida biidoti bessoosona. SHin, hegaa giyoogee nuuni sooppe soo biidi sabbakiyo wode nu xuufeta goꞌettana koshshenna giyoogee? Akkay gidenna! Leemisuwawu, traktteti asaa haasayissiyoogaa doommanawu maaddiya loꞌꞌo oge. Nuuni ubba traktteta goꞌettiyo wode kaallidi deꞌiya ogeta goꞌettana danddayoos:

1. Trakttiyawu koyro sinttan deꞌiya doori zaariyo oyshaa oychcha.

2. Naaꞌꞌantto sinttan huuphessan deꞌiya, Geeshsha Maxaafay yootiyo zaaruwaa bessa. Wodee deꞌikko, trakttiyawu gidduwan deꞌiya qofaa nabbabidi tobbite.

3. Trakttiyaa keettaawawu immada, attida qofaa injjetiyo wode nabbabanaadan minttetta.

4. Baanaappe kase, “Qoppana Koshshiyaabaa” giya sohuwan deꞌiya oyshaa bessa, yaatada Geeshsha Maxaafay yootiyo zaaruwaa tobbanawu wodiyaa keera.

Zaaretta oychchiyo wode, zaaruwaa tobbite, qassi haroode tobbana hara oyshaa oychcha. Nu websaytiyaappe woy nu xuufetun wurssetta sinttan deꞌiya issi oyshaa doorada oychchana danddayaasa. Bessiya wodiyan, Xoossaappe Yiya Mishiraachuwaa! giyo broshuriyaa woy Tamaarissanawu Goꞌettiyo Waanna Miishshatuppe xannaꞌissanawu goꞌettiyo hara xuufiyaa erissa.