Oyshaa Saaxiniyaa

◼ Gubaaꞌiyaa shiiquwaa wodenne haggaazuwaa wode moobayliyaa goꞌettiyoogaa xeelliyaagan maaddiya Geeshsha Maxaafaa maaray awugee?

“Ubbabau Wodee De7ees.” (Era. 3:1): Moobaylee asay ay wodenne kiitaa yeddanau woy issoy issuwaara haasayanau maaddees. SHin Kiristtaaneti bantta silkkiyaa gaasuwan qofay laalettenna mala naagettiyo wodeti deꞌoosona. Leemisuwau, nu shiiqoy Yihoowayyo goynniyo, ayyaanaabaa tamaariyoonne issoy issuwaa minttettiyo wode. (Zaa. 31:12; Maz. 22:22; Roo. 1:11, 12) Nuuni shiiqiyo sohuwaa gakkiyo wode, nu silkkiyaa gorddiyoo, qassi yiida kiitaa shiiquwaappe biyo wode nabbabiyoo? Silkkiyaa dooya wottanaadan oottiya keehi koshshiya allaallee deꞌikko, cenggurssay siyettenna ogiyan dooya wottana koshshees.

‘Wonggeliyaa Gishshau Ubbabaa Oottite.’ (1 Qor. 9:23): Issi issitoo, haggaazuwan moobayliyaa keehi maaddiyaabau goꞌettoos. Leemisuwau, sintta xeera gididi oottiya ishay hara moottan haggaaziyaageeta xomoosanau dawalana danddayees. Qassi aassiyaageeti koshshay deꞌiyo uraa oychanau woy Geeshsha Maxaafaa xinaatiyaa xannaꞌissanau baanaappe kase issi issitoo dawaloosona. Nu moobaylee nuuni haasayissiyo asaa qofay shaahettanaadan oottenna mala naagettana koshshees. (2 Qor. 6:3) Ishantta naagiyo wode, nu laggiyau dawaliyoogaappe woy kiitaa xaafiyoogaappe nu qofaa nu haggaazuwaaninne nunaara haggaaziya uran wottiyoogee loꞌꞌo gidennee?

Haratussi Qoppite. (1 Qor. 10:24; Pili. 2:4): Ubbatoo dawalidi woy kiitaa xaafidi ishantti awan haggaaziyaakko eranau qoppiyoogan, haggaazuwaa kiyanau shiiqiyo shiiquwaa wodiyan gakkiyoogaa mule sheneho gaana bessenna. Nuuni pooꞌissidi gakkiyoogee, darotoo ishantta zaarettidi maddabanaadan oottees. Qoppibeennabay gakkiyo wode issi issitoo pooꞌissidi gakkana danddayoos. Gidoppe attin, nuuni ubbatoo wodiyan gakkiyoogee Yihoowa giigissuwaa bonchiyoogaa, kaalettiya ishaunne nunaara haggaaziyaageetuyyo qoppiyoogaa bessees.