Haggaazuwan Nuna Keehi Maaddiya Huuphe Yohuwaa
1. “Geeshsha Maxaafaappe Tobbiyoogaa” giya huuphe yohoy giigiyo naaꞌꞌa halchoy aybee?
1 Asau immiyo Wochiyo Keelan issi issitoo “Geeshsha Maxaafaappe Tobbiyoogaa” giya huuphe yohoy kiyees. Ha huuphe yohoy giigiyoy naaꞌꞌu halchuwaassa; hegeekka Geeshsha Maxaafaa qofaa ufayssiya ogiyan yootanaassanne issi issi qofaa waatidi hiillan qonccissana danddayiyaakko bessanaassa. (1 PHe. 3:15) Ha huuphe yohota waatidi loytti goꞌettana danddayiyoo?
2. Ha huuphe yohuwaa haggaazuwan waatidi goꞌettana danddayiyoo?
2 Hegaa Haggaazuwan Goꞌettite: Ha huuphe yohoy deꞌiyo Wochiyo Keelay kiyiyo wode amaridaagaa ekkidi son wottana danddayeeta. Haasayissiyo uri, siyanau koyiya uri woy Geeshsha Maxaafaa xinaatee issi oysha oychiyo wode woy he huuphe yohotun kiyida qofaappe issuwaa oychiyo wode, he huuphe yohoy deꞌiyo maxeetiyaa au immidi issippe tobbite. He huuphe yohuwaa oyqqida maxeetee intteyyo baynnaba gidikko, jw.org sayttiyaappe dawunlode oottana danddayeeta.
3. Ha huuphe yohotuppe issuwaa issi uraara waati tobbana danddayiyoo?
3 Ha huuphe yohotuppe issuwaa issi uraara waati tobbana danddayeetii? Issoti issoti oyshaa oychidaagee haasayissiyo uri giyoobaa xoqqu oottidi nabbabanaadan yootidi, eti qassi Yihoowa Markkay giyoobaa nabbaboosona. Eti hegaadan tobbiyoogee he uri nu ammaniyoobaa yayyennan pilgganaadan oottiyo gishshau, keehi loꞌꞌo gidana danddayees.—Zaa. 32:2.
4. Ha huuphe yohuwan kiyiya qofaa nu huuphiyaa loohissanau waatidi goꞌettana danddayiyoo?
4 Intte Huuphiyaanne Harata Loohissite: Ha huuphe yohota nabbabiyo wode, xiqiseta, leemisotanne qofaa qonccissiyo ogiyaa akeekite. Qofay ayba hanotan qonccidaakko akeekite. Yaatidi, haggaazuwan hegaadan oottanau malite. (Lee. 1:5; 9:9) Issi michiyaa, “Ha huuphe yohota nabbabiyoogee, ubbatoo gaana koshshiyaabaa eriya issi gooba aqinyeera haggaaziiddi ippe tamaariyoogaa mala” yaagaasu.
5. Nu xinaateti haggaazuwau giigettanaadan waati maaddana danddayiyoo?
5 Ha huuphe yohuwan kiyiya qofaa intte xinaateti haggaazuwau giigettanaadan maaddanaukka goꞌettana danddayeeta. Intte xinaatee aassiya uraadan hanin, he qofaa issippe nabbabite. Yaatiyoogan, intte xinaatee ba ammaniyoobaa hiillan qonccissiyoogaa meezetana danddayees. (Qol. 4:6) Ha huuphe yohoy nuuni nu haggaazuwaa ‘polanaadan’ Yihooway maaddiyo daro ogetuppe issuwaa gidiyoogee qoncce.—2 Xim. 4:5.