Inttenaara Haggaaziya Uraa Maaddite
1. Haratuura haggaaziyo wode kiitettida PHauloosa leemisuwaa waati kaallana danddayiyoo?
1 Kiitettida PHauloosi ba mala Kiristtaanetuura gayttiyo wodiyaa issoy issuwaara ‘minettanau’ maaddiya wodedan xeelliis. (Roo. 1:12) Hara uraara haggaaziyo wode, he wodiyaa a minttettanaunne maaddanau goꞌetteetii? He uraara coꞌꞌu giidi takkiyoogaappe intte haggaazuwan murutanaadan maaddida qofaa ayyo yootana danddayeeta.
2. Nunaara haggaaziya uraa minttettanau ay oottana danddayiyoo, qassi hegaadan oottana koshshiyoy aybissee?
2 Minttettite: Mishiraachuwaa yootiya issoti issoti yayyoosona; hegee qassi darotoo eta hanotaappe woy cenggurssaappe erettana danddayees. Eta loytti minttettiyoogan xalanaadan oottana danddayoos. Eta minttettana danddayiyo issi issi ogeti awugeetee? Woradaa xomoosiya issi ishay banaara haggaaziya urau ikka yayyiyoogaa odidi, hegaa xoonanau darotoo woygidi woossiyaakko qoncciyan yootees. Hara ishay qassi minnanaadan bana maaddidabaa hagaadan giidi yootiis: “Moocu giyoogee hegau maaddiyo gishshau, issi issitoo he guuttabankka maaddana mala woossana koshshees.” Haggaaziyo wode intte minnanaadan maaddidabi deꞌii? Deꞌikko inttenaara haggaaziya urau hegaa yootite.
3. Nunaara haggaaziya uray haggaazuwan murutanaadan maaddiyaabaa ay yootana danddayiyoo?
3 Intte Goꞌettiyo Issi Issi Hiillaa Yootite: Geella intte heeran deꞌiya hanotaa goꞌettidi, intte muruta ogiyan haasayaa doommiyo, keehi maaddiya qofi woy oyshi deꞌii? Asaa haasayissiyoogaa doommanau maaddiya qofaa guuttaa laammidi loꞌꞌo ayfe demmidetii? Hegaabaa inttenaara haggaaziya urau yootite. (Lee. 27:17) Zaaretti oychiyo uraakko biyo wode, ay oottanau qoppidaakko, qassi hegaa waati polanau qoppidaakko yootite. Geeshsha Maxaafaa xannaꞌiya uraa tamaarissi simmidi, a maaddanau issi qofaa, xiqisiyaa woy tamaarissiyo ogiyaa aybissi dooridaakko inttenaara haggaaziya urau yootana danddayeeta.
4. Nu mala Kiristtaaneta maaddana koshshiyoy aybissee?
4 Koyro xeetu layttan deꞌida Kiristtaaneti maaddidoy ammanennaageetu xalla gidokkona. Eti issoy issuwaa maaddananne minttettana koshshiyoogaakka akeekidosona. (Oos. 11:23; 15:32) Kiitettida PHauloosi yelaga Ximootiyoosa loohissiis; qassi eridobaa haratuyyo yootanaadan minttettiis. (2 Xim. 2:2) Nuuni haggaaziyo wode nu mala Kiristtaanetuyyo loꞌꞌobaa oottiyoogaa dogennaba gidikko, eti murutanaadaaninne keehi ufayttanaadan oottiyoogaa xalla gidennan, saluwan deꞌiya nu Aawaykka ufayttanaadan oottoos.—Ibr. 13:15, 16.