Dumma SHoobiyaa
1. Nuuni 2014n shiiqiyo awuraajjaa shiiquwau asaa shoobbiyoogaa doommiyoy awudee?
1 Daro miishshaa kessadanne daafurada giigissido dumma qumaa ne laggetanne so asaa shoobbanau koyikko, neeni eta ufayttada shoobbiyoogee attenna. Hegaadankka, 2014 awuraajjaa shiiquwaunne daro biittaappe yiidaageeti shiiqiyo awuraajjaa shiiquwau ayyaanaaban gibiray giigiis. Awuraajjaa shiiqoy doommiyo gallassappe heezzu saaminttaa kasetidi, nuuni asay he shiiquwaa yaanaadan shoobbiyo maataa demmana. Nuuni he shiiquwau asaa ufayttidi shoobbanau aybi maaddana danddayii?
2. Nuuni awuraajjaa shiiquwau asaa minnidi shoobbanaadan aybi denttettii?
2 Yihooway awuraajjaa shiiquwan nuuyyo giigissido ayyaanaabaa gibiran nuuni ay keena goꞌettiyaakko qoppiyoogee, asaa minnidi shoobbanaadan denttettees. (Isi. 65:13, 14) Layttan layttan hegaadan asaa shoobbiyoogee loꞌꞌo ayfiyaa demmissiyoogaakka nuuni hassayana koshshees. Nuuni shoobbiyo issi issi asati nunaara shiiqoosona. SHoobbin yiya asay ay keena gidikkokka, nuuni he shiiquwau asaa minnidi shoobbiyoogee Yihoowa bonchisseesinne a kehatettaa qonccissees.—Maz. 145:3, 7; Ajj. 22:17.
3. SHoobbiyo woraqataa asau waatidi immana danddayiyoo?
3 Gubaaꞌiyaa cimati ha shoobiyaa woraqataa ishatinne michoti ubba asau waati immana danddayiyaakko, qassi asa demmibeenna keettan wottana bessiyaakko bessennaakko woykko dabaaban haggaaziyo wode asau immana bessiyaakko bessennaakko kuuyana koshshees. Qeeraanne Woggaa gallassi hanotay injjetikko maxeetetakka shoobiyaa woraqataara issippe immana koshshees. Aginan koyro Qeeraa gallassay shoobiyaa woraqataa immiyo wode peꞌiyaaba gidikko, he gallassi Geeshsha Maxaafaa xinaatiyaa doomissanau maliyoogaappe shoobiyaa woraqataa immanau baaxetana koshshees. Zamachay wuriyo wode, Yihooway giigissido gita ayyaanaabaa gibirau nuuyyo danddayettida keenan daro asaa shoobbidoogaa eriyo wode nuuni keehi ufayttana!