Yihooway Tana Waati Xeellii?
1. Geeshsha Maxaafay herega mala gididoy aybiinee?
1 Heregaa awude awude beꞌay? Heregay nuuni nu hanotaa an beꞌidi issi issibaa giigissanawu maaddiyo gishshawu, daroti galla galla a beꞌoos. Geeshsha Maxaafay heregan leemisettiis. Xoossaa Qaalaa nabbabiyoogee, Yihooway xeelliyo, nu wozanaa giddon deꞌiyaabaa nuuni akeekanawu maaddees. (1 Sam. 16:7; Yaaq. 1:22-24) Xoossaa Qaalay nu ‘wozanan deꞌiya koshshaanne qofaa shaakkees.’ (Ibr. 4:12) Geeshsha Maxaafaa galla galla nabbabiyoogeenne wotti dentti qoppiyoogee, nuuni mishiraachuwaa yootiyoogan kaseegaappe muruta gidanaadan maaddiyaabaa shaakki eranawu waati maaddii?—Maz. 1:1-3.
2. Geeshsha Maxaafay nuuni nu huuphiyaa qoranawu waati maaddii?
2 Geeshsha Maxaafaa Heregadan Goꞌetta: Geeshsha Maxaafan etabay xaafettido, Yihoowayyo ammanettidi oottida asatu taarikee nuuni Yihoowa ufayssiya eeshshay awugaakkonne akeekanawu maaddees. Leemisuwawu, Daawiti Xoossaa sunttawu mishettiis. (1 Sam. 17:45, 46) Isiyaasi waayissiya haggaazo moottan sabbakanawu xalidi eeno giis. (Isi. 6:8, 9) Yesuusi saluwan deꞌiya ba Aawaa keehi siiqiyo gishshawu, ba haggaazuwaa deexo oosodan gidennan, ufayssiyaanne woppissiya oosodan xeelliis. (Yoh. 4:34) Koyro xeetu layttan deꞌida Kiristtaaneti xalatettan markkattidosona; Yihoowan ammanettidosona; qassi mule hidootaa qanxxibookkona. (Oos. 5:41, 42; 2 Qor. 4:1; 2 Xim. 4:17) He leemisota wotti dentti qoppiyoogee haggaazuwaa murutissanawu halchidi nu huuphiyaa qoranawu maaddees.
3. Nuuni giigissana bessiyaabaa giigissanawu haganaa sugana koshshennay aybissee?
3 Giigissana Bessiyaabaa Giigissa: Issi uri ba meraa heregan beꞌidi giigissana bessiyaabaa giigissennaba gidikko, heregaa beꞌiyoogee aynne maaddenna. Nuuni giigissana bessiyaabaa eranaadaaninne hegaa loyttanaadan maaddana mala Yihoowa woossana danddayoos. (Maz. 139:23, 24; Luq. 11:13) Attida wodee guutta gidiyo gishshawunne nuuni oottiyoobay atotettaara gayttidaba gidiyo gishshawu, giigissana bessiyaabaa giigissanawu haganaa sugana koshshenna.—1 Qor. 7:29; 1 Xim. 4:16.
4. Xoossaa Qaalaa xeellidi hegaappe akeekidobaa oottiya uray ay demmii?
4 Yihooway xeelliyo, issi uraa wozanaa giddon deꞌiyaabay a bolla bagga meraappe keehi aadhiyaaba. (1 PHe. 3:3, 4) Xoossaa Qaalaa xeellidi hegaappe akeekidobaa oottiya uray ay demmii? “A naagiyaagee, siyidoogaakka dogennaagee, he urai ba oottiyo oosuwan anjjettana.” (Yaaq. 1:25) Nuuni Yihoowa ‘bonchuwaa heregadan zaaridi phooliyo’ gishshawu, ufayttananne haggaazuwan murutana danddayoos.—2 Qor. 3:18.