Meezee Deꞌiyo Aassiyaageetuppe Tamaariyoogaa
Gubaaꞌiyan deꞌiya, meezee deꞌiyo aassiyaageeta wozanappe nashshoos. Issooti issooti Yihoowa daro layttawu haggaazidosona. Harati qassi mata wodiyan haggaaziyo hiillaa loytti tamaaridaageeta gidana danddayoosona. Eti sabbakiyoonne erissiyo ashkkara oottiyo oosuwaara gayttidaagan Yesuusi ha wurssetta wodiyan gubaaꞌiyaa waati kaalettiiddi deꞌiyaakko akeekidosona. (Maa. 28:19, 20) Wolqqaama paacee eta gakkiyo wode ‘ubbaappe aadhiya wolqqaa’ demmidi minnidi haggaazidosona. (2 Qor. 4:7) Haggaazuwaa meezetida hegaa mala asatuppe nuuni darobaa tamaarana danddayoos. Nuuni eta oychikko, eti tamaaridobaa ufayssan yootana. (Maz. 71:18) Hegaa gishshawu, nuuni etappe tamaaranawu hanotaa injjeyana bessees. Waatidi?
Etaara Haggaaza: Haggaazuwan loꞌꞌo ayfiyaa demmanawu, haggaaziyoogaa mati doommidaageeti woy darin meezetibeennaageeti loohana bessees. Kayma Kiristtaaneti waati haggaaziyaakko akeekan xeelliyoogan darobaa tamaarana danddayoos. (Usuppune 15, 2015, Wochiyo Keelan, “Mishettada Haggaaziyoogaa Aggoppa” giya huuphe yohuwan, “Meezetibeennaageeta Maadda” giyaagaa garssan heezzantto menttuwan deꞌiya qofaa xeella.) Hegaa mala asaara issippe haggaaziyoogan waana goꞌettadii?
Haggaazuwan gooba gidida uri nenaara haggaazanaadan shoobbana danddayay? He uri abbe paca gidikko, ne xinaatetuppe issuwaa issi issitoo a son xannaꞌissana danddayaasa. Xinaatiyaappe simmin, i akeekidobinne zoriyoobi deꞌikko yootanaadan aassiyaagaa oycha.
Etaara Wodiyaa Aatta: Haggaazuwan gooba gididaageetuura wodiyaa aattiyoogan eta loytta eranawu mala. Etappe issuwaa intte soo asaa goynuwan shoobbada issi issibaa oycha. He uri abbe paca gidikko, so asaa goynuwawu a son shiiqana danddayaasa. I tumaa waati siyidaakko oycha. I ayba anjjo demmidee? I Kawotettaa oosuwaara gayttidaagan diccin beꞌidobay aybee? Yihoowawu haggaaziyoogan ayba ufayssaa demmidee?
SHin etappe darobaa naagoppa. Yihoowa daro wodiyawu haggaazidaageetuyyo nuugaadan dumma dumma imoy deꞌees. (Roo. 12:6-8) Issooti issooti layttaa sugido gishshawu, nunaara daro wodiyaa aattennan aggana danddayoosona. Gidikkokka, eti daro layttawu ammanettidi Yihoowawu oottido gishshawu, etappe darobaa tamaarana danddayoos.