Haggaazuwan Kaseegaappe Qara Gidiyoogaa—Oorattata Loohissiyoogaa

Hegee Keehi Koshshiyoy Aybissee? Oorattati tumaa haratuyyo yootiyoogaa gujjin, Yesuusi azazidobaa “ubbaa” naagana mala tamaarissana bessees. (Maa. 28:19, 20) Ooratta gidida daroti Tiꞌokiraase Haggaazo Timirtte Keettan kifiliyaa shiishshiyoogaa doommidaageeta, qassi bantta soo asawunne dabbotuyyo markkattiyoogaa doommidaageeta gidana danddayoosona. SHin eti tamaariyoobaa nashshiyoogaa doommiyo wode, qassi Yihooway ubba asay mishiraachuwaa siyanaadan koyiyoogaa akeekiyo wode, haggaazana koyiyoogaa yootana danddayoosona. (Roo. 10:13, 14) Oorattati xammaqettennan aassiyoogaa doommiyo wode, ayyaanaaban diccana mala etawu immiyo loꞌꞌo loohissoy eta keehi maaddees.—Luq. 6:40.

Waatana Danddayiyoo?

Aassiyoogaa doommida uri sabbakiyo wodenne tamaarissiyo wode goꞌettiyo xuufeta oyqqanaadan maadda. Neeni ne haggaazo borssan ay ay oyqqiyaakko, qassi neeni oyqqido xuufeta waata goꞌettanaakko yoota.
Nu Kawotetta Haggaazuwan deꞌiya, asaa haasayissiyoogaa doommanawu maaddiya qofaa issippe dooridi meezetite. Yaatidi, i hegaa loytti hassayanaadan minttetta. Intte haggaazo moottawu haniya, Haggaazo Timirtte Keettaa maxaafan, sinttaa 82n deꞌiya hanotaa meezetite. Haggaazuwawu bessiyaagaadan maayanaadaaninne alleeqettanaadan minttetta.—2 Qor. 6:3, 4.
Ubba wode loohissa. Aassiyoogaa mati doommida ura haggaazo moottaa karddiyaa bessa; qassi sooppe soo biidi haggaaziyo wode waati mazggabanaakko tamaarissa. Tumaa siyana koyiyaageetu adrashaa waati mazggabiyaakkokka bessa. I haggaazuwan jw.org sayttiyaanne Ubba Deriyaa Asawu Yootiyo Mishiraachuwaa giyo bukleetiyaa waati goꞌettanaakko tamaarissa. I haasayissidoogeeta zaaretti biidi oychanaadan minttetta.—1 Qor. 3:6.
Danddayancha gida; qassi galata. (Lee. 25:11) Awu leemiso gida. Neeni mishettada, qassi kehada oottiyoogee loꞌꞌo ayfiyaa demissana danddayees.

Ha Aginan Hagaa Oottanawu Mala:

Ne xinaatiyaara sooppe soo biidi haggaazite; qassi harata zaaretta oychanawu woy xannaꞌissanawu biyo wode aara issippe ba. Neeni xannaꞌissiyo asi baynnaba gidikko, darotoo haggaaziyo meezee baynna uri nenaara haggaazanaadan shoobba.