Cenggurssan Giigidabata Waati Goꞌettana Danddayiyoo?
1. Xuufetuppe hara nuna maaddiyaabay aybee
1 Daroti jw.org sayttiyaappe keehi ufayssiyaanne tuma gididabaa nabbabiyoogaa dosoosona. (Era. 12:10) SHin neeni cenggurssan giigidabaa siya eray? Yaatiyoogee nu weyb sayttiyan kiyida darobaa siyanawu maaddees. Cenggurssan giigidabaa siyiyoogee nuna waati goꞌꞌana danddayii?
2. Buzo woy so asaa xinaatiyaa wode cenggurssan giigidabaa waati goꞌettana danddayiyoo?
2 Buzonne So Asaa Xinaatiyawu: Oge biiddi woy so giddon issi issibaa oottiiddi Geeshsha Maxaafay, maxeetee woy hara xuufee cenggurssan giigidaagaa ezggiyoogee nu wodiyaa loytti goꞌettanawu maaddees. (Efi. 5:15, 16) So asaa goynuwaa wode xannaꞌiyo xuufiyaa oyqqidi, cenggurssan giigidaagaa kaalliyoogee ufayssiya ogiyan xannaꞌanawu maaddees. Kaseegaappe loytti nabbabanawu baaxetiyaaba woy ooratta qaalaa tamaariyaaba gidikko, buzo xannaꞌiyo wode he doonan cenggurssan giigidabaa siyiyoogee keehi maaddees.
3. Nu moottan, cenggurssan giigidabaa siyidi goꞌettana danddayiyaageeti oonee?
3 Haggaazuwawu: Xuufiyaa nabbabanawu banttawu mule wodee baynnabadan qoppiya, nu moottan deꞌiya issi issi asati cenggurssan giigidaagaa siyanawu koyana danddayoosona. Woy qassi nuuni eta qaalaa erenna, Kawotettaa mishiraachuwaa ‘bantta qaalan’ siyiyaakko darin ufayttana asatuura nu gayttana danddayoos. (Oos. 2:6-8) Issi issi heeran qassi siyiyoogee he biittaa wogan meeze gididaba gidana danddayees. Leemisuwawu, Himong giyo biittaa wogan yelagati issibaa tamaariyoy cimidaageetuppe siyiyoogaana; qassi eti siyidobaa ubba wodessi hassayoosona. Unddenna Afirkkaa biittatunkka asay haysiyaa siyiyoogan darobaa tamaarees.
4. Nu moottan deꞌiya asaa maaddanawu, woygiya oyshata nu huuphiyaa oychana danddayiyoo?
4 Intte haggaazo moottan, i haasayiyo qaalan cenggurssan giigidabaa haasayissiyo ura sissana danddayeetii? Geella cenggurssan giigidabaa imeeliyan awu kiittin goꞌettana danddayiya uri deꞌanee? Woy qassi, nuuni yootiyoobaa ufayttidi siyiya uri gujjidi erana koyiyaaba gidikko, issi xuufiyaanne hegee cenggurssan giigidaagaa dawunlode oottidi siidiyan immana danddayiyooshsha? Cenggurssan giigida kumetta maxaafaa, broshuriyaa, maxeetiyaa woy trakttiyaa asawu immikko, hegaa irpportte oottana danddayoos. Xuufeta cenggurssan giigissiyoy nuuni buzo xannaꞌiyo wode goꞌettanaassa, qassi Kawotettaa tumaa zerettaa haratu wozanan zeranaassa.—1 Qor. 3:6.