Xoossan Nashettanawu Aggennan Woossite

Xoossay asay woosaa baggaara banaara haasayanaadaaninne banttawu siyettiyaabaa yootanaadan oottiis. Hananabaa yootiya Daawiti, “Abeet woosaa siyiyaagoo, asai ubbai neekko yaana” giidi woossiis. (Mazamure 65:2) SHin nu woosay siyettanaadaaninne Xoossay nuna anjjanaadan waati woossana danddayiyoo?

ASHKKETETTAN WOZANAPPE WOOSSA

Neeni woossiyo woosay tumuppe neeyyo siyettiyaabaa, hegeekka ‘ne metuwaabaa Xoossaayyo yootanaadan’ maaddees. (Mazamure 62:8) Wozanappe woossiyo woosaa Ubbaa Danddayiyaagee nashshees.

XOOSSAA A BUZO SUNTTAN XEESA

Xoossaayyo bonchcho sunttati daroti deꞌikkonne, A buzo sunttay issuwaa xalla. “Taani Yihoowa;a hegee ta sunttaa.” (Isiyaasa 42:8, NW) Yihoowa giyo sunttay Xoossaa Qaalan 7,000 gidiya sohotun deꞌees. Hananabaa yootiya daroti Xoossaa woossiyo wode A buzo sunttaa bonchchuwan goꞌettidosona. Abrahaami “Hai Godai [“Yihoowa,” NW] . . . taani gujjadakka haasayais” yaagiis. (Doomettaabaa 18:30) Nuunikka woossiyo wode Yihoowa giya Xoossaa suntaa goꞌettana bessees.

NE QAALAN WOOSSANA DANDDAYAASA

Nu haasayiyo qaalay ayba gidikkonne, nu qofaanne nuussi siyettiyaabaa Xoossay akeekees. A Qaalay, “Xoossai asa som77o xeellenna; shin dere ubban baassi yayyiyaagaanne xillo ooso oottiyaagaa [nashshees]” yaagees.—Oosuwaa 10:34, 35.

SHin, Xoossay nuna anjjanaadan woosaappe harabaakka oottana koshshees. Kaalliya huuphe yohuwan, nuuni ay oottana koshshiyaakko pilggana.