Woosay Nena Waati Maaddana Danddayii?

Kansseree Paameelo sakkees; qassi A akkamettaasu. SHin, A ba iita hanotaa genccanawu wolqqaa immanaadan Xoossaa woossaasu. Woosay O maaddidee?

Paameela hagaadan gaasu: “Kansseriyaa akkamettiyo wode, taani keehi yayyaas. Gidoppe attin, taani Xoossaa Yihoowa woossido wode, woppu gaasinne yayyiyoogaa aggaas. Tana haꞌꞌikka keehi sakkees; shin woosay taani loꞌꞌobaa qoppanaadan maaddees. Asay taayyo sahoy kehidaakkonne oychchiyo wode, ‘Tana sakkees; shin ufayttays’ yaagays.”

Woossanawu wolqqaama harggee oyqqanaashin woy keehi wolqqaama metoy gakkanaashin nuuni naagana koshshennaagee qoncce. Nuna ubbaa guutta woy daro metoy gakkees, qassi hegaa genccanawu nuuyyo darotoo maadoy koshshees. Woosay maaddana danddayii?

Geeshsha Maxaafay hagaadan gees: “Ne toohuwaa Xoossan wotta; i nena zemppissana. Xoossai audenne xilloti shabbirettanaadan oottenna.” (Mazamure 55:22) Hagee keehi minttettiya qofa! Yaatin, woosay nena waati maaddana danddayii? Neeni Xoossaakko suure ogiyan woossiyo wode, I neeni ne metuwaa genccanaadan neeyyo koshshiya ubbabaa immana.—“Woosay Nena Waati Maaddana Danddayii?” giya saaxiniyaa xeella.

Woosay Nena Waati Maaddana Danddayii?

Sarotettaa demmanawu

“[Xoossaa woossite]; qassi asa eratettaa ubbaappe aadhdhiya Xoossaa sarotettai intte wozanaanne intte qofaa Godaa Yesuus Kiristtoosa baggaara naagana.” (Piliphphisiyuusa 4:6, 7) Nena hirggissiyaabaa neeni Xoossaayyo yootiyo wode, ne woppu gaanaadaaninne unꞌꞌissiyaabay deꞌishinkka neeni loꞌꞌobaa oottanaadan I nena maaddana.

Xoossay immiyo aadhdhida eratettaa demmanawu

“Intteppe ooninne baayyo aadhdhida eratettai xayikko, borennan ubbau kehatettan immiya Xoossaa woosso. I ayyo immana.” (Yaaqooba 1:5) Nuuni unꞌꞌettiyo wode, issi issitoo iitabaa kuuyoos. Neeni aadhdhida eratettaa demmanawu woossikko, Xoossay ba Qaalan Geeshsha Maxaafan deꞌiya keehi maaddiya daro maarata nena hassayissana danddayees.

Wolqqaanne minttettuwaa demmanawu

‘Ubbaappe aadhdhiya wolqqay Xoossaagaa gidiyoogaappe attin, nuugaa gidenna.’ (2 Qoronttoosa 4:7) Yihooway Ubbaa Danddayiya Xoossaa gidiyo gishshawu, I neeni ne metuwaa genccanaadan woy nena gakkida paaciyaa xoonanaadan neeyyo koshshiya wolqqaa immana danddayees. (Isiyaasa 40:29) Geeshsha Maxaafay Yihoowa, “minttetto ubbaa Xoossaa” yaagees. “Nu waaye ubban i nuna” minttettana danddayees.—2 Qoronttoosa 1:3, 4.

NENA MAADDANA MALA WOOSSANAWU KOYAY?

Yihooway baakko woossanaadan nuna wolqqanttennaagee qoncce. SHin neeni woossanaadan I siiquwan shoobbees. (Ermmaasa 29:11, 12) Gidikkonne, ne woosaa I zaaribeennabadan neeyyo kase siyettikko shin? Hidootaa qanxxoppa. Siiqiya yelidaageeti bantta naati koyido ogiyan woy eti qoppidoosaara maaddennan aggana danddayoosona. Yelidaageeti etaagaappe loꞌꞌobaa etawu qoppennan waayi aggana. Gidoppe attin, siiqiya yelidaageeti bantta naata maaddiyoogee aynne sirissenna.

Xoossaa Yihooway ooppenne aaruwan siiqiya aawa; qassi nena maaddanawu koyees. Nuuni Geeshsha Maxaafaappe beꞌido kaaletota neeni loytta pilggiyaabanne hegeeta oosuwan peeshshanawu neeyyo danddayettida ubbabaa oottiyaaba gidikko, Xoossay ne woosaa keehi loꞌꞌo ogiyan zaarana!—Mazamure 34:15; Maatiyoosa 7:7-11.