Eray?

Roomati Yesuusaagaadan mittaa bolli kaqqidi worido uri maara moogettanaadan paqqadiyoonaa?

YESUUSA naaꞌꞌu panggatuppe gidduwan mittaa bolli kaqqidi woridoogaa yootiya taarikiyaa daro asay erees. (Maa. 27:35-38) SHin, Yesuusa anhaa guyyeppe giigissidi gonggoluwan moogidoogaa Geeshsha Maxaafay yootiyoobay likke gidenna giidi amarida asay qoppees.—Mar. 15:42-46.

Kaqqidi worido ura gonggolo mala sohuwan giigissido duufuwan maara moogiyoogee waayi paqqadettana giidi amarida eranchchati qoppoosona. Danobaa oottidoogaa gaasuwan kaqqidi woridoogeeti waayi maara moogettana giidi he eranchchati qoppoosona. Ismizsooniyan giyo maxeetiyan xaafiya Ariyel Saaberi amaridaageeti hegaadan qoppiyo gaasuwaa yootiis: “Masqqaliyan kaqqiyoogee keehi iitabaa oottida ura qaxxayiyo oge, qassi Roomati hegaa mala asaa bonchchuwan moogoosona giidi qoppiyoogee eeyyatetta gidiyoogaa amarida eranchchati yootoosona.” Roomati danobaa oottidaageeta kawushshanawu koyiyo gishshawu, anhaa doꞌay maanaadan darotoo mittaa bolli aggiigoosona. Hegaappe simmin, doꞌay miishin attidabay makkaanan olettees.

Gidoppe attin, hayqqida amarida Ayhudatu anhay dumma hanotan oyqettidoogaa biittaa bookkidi demmidobay qonccissees. Koyro xeetu layttan kaqqidi worido issi bitaniyaa meqettati 1968n beettidosona. Hegeeti Yerusalaame katamaa matan issi Ayhuda keettaa asaa duufuwan beettidosona. Hegeeti meqettaa wottiyo saaxiniyan deꞌoosona. Hegeetu giddon meeshi meqettay deꞌees. Hegee mittaappe giigissido borddiyan 11.5 santti meetire misimaariyan xishetti uttiis. Saaberi hagaadan giis: “He meeshi meqettay Yehokihaanana giyo bitaniyaagaa. Hegee Yesuusi duufuwan moogettidoogaabaa yootiya Wonggeliyaa taarikee tuma gidana danddayiyoogaa qonccissiya naqaasha. Yesuusa wode masqqaliyan kaqqidi worido Ayhuda asi moogettanaadan Roomati paqqadidoogaa Yehokihaanana meeshi meqettay bessees.”

He meeshi meqettay qonccissiyoobaara gayttidaagan Yesuusa mittan kaqqido ogiyaa xeelliyaagan dumma dumma qofay deꞌana danddayees. SHin, danobaa oottidoogaa gaasuwan kaqqidi worido amaridaageeti moogettoosonappe attin, makkaanan coo olettokkona. Yesuusa anhay duufuwan maara moogettidoogaa xeelliyaagan Geeshsha Maxaafay yootiyoobay ammanttiyaaba gidiyoogee qoncce. He naqaashay Geeshsha Maxaafay yootiyoobaara maayettees.

Yesuusi dure asa duufuwan moogettanaagaa Yihooway kasetidi yootiis, qassi Xoossaa qaalay polettennaadan ooninne diggana danddayenna.—Isi. 53:9; 55:11.